HEBRAITE 9 - PATHIAN LEKHABU THIANGTHO (BSI)

Lei ah Mun Thiangtho leh Van ah Mun Thiangtho chu

¹ Ahi’n, thuthung masa khanle, Pathian nasep dante leh mun thiangtho, zia lei chung ah munthiangtho chu a nei a.

² Khut ah siam biakbûk a um a; a tuatil pen in thaumei tunna dawkânte leh vaithumte a um hi; zia chu Mun Thiangtho a kitii.

³ Puanjak pani’na zaw in, biakbûk ah Mun thiangtho Chungnung pen a tiu chu a um hi;

⁴ zia chun gimtui hâlna sana bêl, thuthung thingkuang, sana tui ah luan khum chu tawh, a sung ah manna koina sana bêl tawh, Aron tiang seldok kha tawh, thuthung suangpêkte a um a.

⁵ A chung lam in jangaina chutpha lia dingin lopina cherubte chu a um un, ziate chu tu’hin a kip a kawi in gen thei puai tiu.

⁶ Zia thilte chu zia gual ah chun siam ahi; thiampute chu Pathian na sêm in biakbûk pindan masa pen ah chun a lut sek ui.

⁷ Himaleh, pindan pani’na ah chun thiampu lianpen bep chu, kum khat ah khatvei bep thisan chawi pum in ama â ding leh mipi zosia gitlona ziak ah thillân dingin a lut sek hi.

⁸ Thagau Thiangtho chun, biakbûk masa chu a din nâklai ziakin, Munthiangtho pen ah lutna lampi chu a kilang nai puai, ti a hiatsak hi.

⁹ Zia chu tu’lai hun ding genchetna ahi; thillat leh kithoinate chu a lân un, zia chun a sia leh pha hetnateu chu a subukim thei puai.

¹⁰ Ziate chu nêk leh dawn thu, kithiansakna chuam chuam leh paw lam dante tawh kisai ahi’n, siamphatna hun masia ding ah kibawl ahi.

¹¹ Himaleh, Khrista chu thilpha hung tung dingte thiampu lianpen hi ah a hung phatin, biakbûk bukim leh lopi zaw, khut ah sak lo, zia chu, zia lei thilsiam gual hi hilo, ti’na ahi.

¹² Kelte leh bawngnote thisan hilo in, ama thisan ngei in Mun thiangtho pen ah chun khatvei thu’ lut in, kumtuang tatna chu a siam ta ahi.

¹³ Kelte leh bawngchalte leh bawnglâ vutvamte thisan kithe khum in bawn taksa pawlam a thiansak leh,

¹⁴ Khrista thisan, Pathian kiang ah mêlhemna umlo, kumtuang Thagau jal ah kilân chun, nasep thisa ah kipat chun, a sia leh pha hetnau chu Pathian hing nasem dingin, bang gual bep in a hithiangtho zaw ta bep diam!

¹⁵ Ziaziakchun, ama chu thuthung thak palai a hung hita’n, thuthung masa nuai ah bawsiatnate kipat kote chun kumtuang goluana thutiam chu a chan theina ding un, a thina chun a tandok tai.

¹⁶ Thu kithunna chun a thungpa thina le a um sek hi.

¹⁷ Thu kithung chu a thungpa thinung ah nasêm thei bep ahi’n, a thungpa thi masia chu thahâtna a nei puai.

¹⁸ Ziaziakchun, thuthung masa kha le thisan panglo ah sukdet a la hi diak puai.

¹⁹ Mosi khan dan dungzui ah thupiak zosia a gen zaw in, bawngno leh kêlte thisan tawh, tui tawh, samulpat sandup tawh, husop a lâ, lekhabu leh mipite chu a thêkhum a;

²⁰ “Zia hi Pathian in la hi ding ua a piak thuthung thisan chu ahi,” a ti’n.

²¹ Zia ban ah chun, biakbûk ah matchâk zosia leh, biakbûk chung ah chun thisan chu a thêsuak a.

²² Dan dungzui in bangkim hi thisan ah sukthian thei ahi’n, thisan pawt lo in ngaidamna a um puai.

Khrista Kithoina Chun Gitlo Pawmang

²³ Ziaziakchun, van ah thil umte chu ziate ah chun sukthian ding him a hi; van thil tak takte ahileh vang ziate sâng ah kithoina phazaw ah sukthiantho in a um diu ahi.

²⁴ Khrista chu khut ah sak Munthiangtho, a tak etsakna mai ah chun a lut pua’n; ei uh â ding ah Pathian umna van mun ah chun a lut zaw tai.

²⁵ Thiampu lianpen, gancha thisan chawi ah kum si’n ah Mun thiangtho pen ah a lut sek gual in, ama chu kithawi dingin a lut puai.

²⁶ Chuti hiloleh, khawvel kisiam tîl ah kipat tam veipi thuak ta ding ahi’n; himaleh, hun tawp lam ah hin gitlo sukmanna dingin ama ngei chu khatvei thu’n a hung kipe ta ahi.

²⁷ Mihing â dingin khatvei thi guatsa ahi’n, ziazaw chuleh vaihawmna um in a.

²⁸ Ziaziakchun, Khrista chu mi tam tak gitlona ziakin khatvei piak in a um ta’n; a niveina’n gitlo paw ding hitalo in, ama a la ngâkte hukdam dingin hung kilang kit ding ahi.