HEBRAITE 8 - PATHIAN LEKHABU THIANGTHO (BSI)

Thuthung Phazaw ah Palai Chu

¹ Tu’hin, thil I gen zosia ah a thupi chu zia hi ahi: Van ah Chungnung pen lalchutpha changlam ah kichu thiampu lianpen chu I nei ui;

² munthiangtho leh biakbûk tak tak, mihing sak hilo, Lalpa sak ngei ah nasempa chu.

³ Thiampu lianpen taphot chu thillat leh thilpiak lân ding ah namdet a hisek un; ziaziakchun, zia thiampu lianpen hinle bang a hem a lat a ngai a.

⁴ Ama chu lei ah um hileh, thiampu hilo ding ahi, dan dungzui ah thillân ding thiampute a um ziak un.

⁵ Mosi’n biakbûk a sak dingin Pathian in ahi ding dan a hil a, “Tâng ah ka hun etsak dungzui khan pha tak in en inla, bangkim zia gual tak ah khan bawl in,” a ti gual in; amau chun van lam thil etsakna a lim a la bawl ahi.

⁶ Tu’hin chu thutiam phazaw chung ah kiphu det, thuthung phazaw ah palai ahiziak in, Jesu chu nasep phazaw a chang tai.

⁷ Thuthung masa chu diklona neilo hileh vang, a pani’na ding hawl ngai lo ding ahi.

⁸ A diklonau chu Pathian in a mudaw ziakin zia gual hin a gen a: “Ni chu hung tung ding ahi, Lalpa‘n a tii; ‘Zia ni chuleh, Israel Insung mite tawh, Judah Insung mite tawh le, thuthung thak siam ing ka tin;

⁹ a pu leh pateu Aigupta gam ah kipat, puidok ah a khut ua ka kaibât lai gual kha hitalo in, ka thuthung a jawm pawngal un; ziaziakchun, ka ngaisak tâk lo ahi,’ Lalpa‘n a ti’n.

¹⁰ ‘Zia nite zaw chuleh, Israel Insung mite tawh kikâl ah ka thuthun ding chu, zia hi hi’n a,’ Lalpa‘n a ti’n: ‘A lungthim un ka dan chu koi ing ka tin, a lung sung un zik ing ka; chuleh, a Pathian uh hi’ng ka tin, amau chu ka mite hita’n au.

¹¹ Lalpa chu hia’n tiu in, kuama Invêngte leh suapite kihil ta pua’n au; a neupen ah kipat a lianpen tiang in, mitin in Lalpa chu hechiat ta’n au.

¹² A diklonau chung in jangai ing ka tin, a gitlonau leh bawsiatnau chu hezing ta pua’ng ka,’ a tia”.

¹³ “Thuthung Thak,” a ti ziakin a masa chu a thengtha tai. Tu’hin, a seta leh luita chu mangthai ding ahi tai.