HEBRAITE 7 - PATHIAN LEKHABU THIANGTHO (BSI)

Thiampu Melkisedek

¹ Zia, “Melkisedek, Salem lal chu, Chungnung pen Pathian thiampu ahi’n, Abraham in lal dangte a zaw ah, a kile’kit a la dawn ah, a la maljawlpa kha ahi”.

² Ama kiang in Abraham in a nei zosia lak ah sawm ah khat a pia’n; a min umzia chu a masa pen in, “Dikna lal” ahi’n; a ban in, “Salem lal,” ahi, zia chu, “Chamna lal,” ti’na ahi.

³ Ama chu nu neilo, pa neilo, suantu neilo, pian ni neilo, hin tawp ni le neilo; himaleh, Pathian Chapa gual ah siam, thiampu hizing ta ahi.

⁴ Ngaitua un, Abraham in a gâllâk zosia lak ah a sawm ah khat a la piakpa hi bang gual ah lopi ahi tam!

⁵ Abraham khalbe ah piang chiat hileule, dan dungzui in a suapiteu, mipite sawm ah khat chu Levi chi, thiampute chun a nêk ding ua thupiak a la hi’n.

⁶ Himaleh, zia suan lak ah simtel hilo mi chun, Abraham ah kipat sawm ah khat a la’, thutiam changpa chu a maljawl zaw tai.

⁷ Ahi’n, nial gual lo in a neuzaw chu a lianzaw’n a maljawl sek hi.

⁸ Thiampute ah chun vang, sawm ah khat chu a thi thei mihingte’n a lâk uh ahi’n, Melkisedek chung thu ah vang sawm ah khat chu a hing zingpa chun a la sek hi.

⁹ Chuleh, Levite sawm ah khat chang sek chun, Abraham ah khan sawm ah khat a la piai, ti’thei ahi;

¹⁰ Levi chu Melkisedek in sawm ah khat a lâk lai khan, a pa khalbe’ um nalai ahi.

Melkisedek Gual ah Thiampu

¹¹ Levite thiampu hi’na dan ah bawn mite’n thiamchang thei a hiu chun; zia hun lai ah khan mite chun Dan a la mu ngal un; chutichu ahileh, Aron thiampu hi’na dan gual hilo ah, Melkisedek thiampu hi’na dan khel khel ah thiampu dang um a ngaina thu bang ding ah gen ngai nalai ding a hem?

¹² Thiampu hina dan a danglam tâk ziakin dan le sukdanglam a ngai tai.

¹³ A chanchin I gen uh hi nam dang mi ahi, nam dang mi kuama’n mâichâm in na a sêm ngai puau hi.

¹⁴ I Lalpau hi Juda nam ah mi ngei ahi, ti a kilang a; zia nam lak ah hin Mosi’n thiampu hi’na ding thu a gen khâk lo ziak ahi.

¹⁵ Tichun, Melkisedek gual in thiampu dang a hung tai ti a kichian hi.

¹⁶ Ama chu taksa thupiak dungzui ah siam a hipua’n, hin tawp lo thilhitheina ah piang ahi zawi.

¹⁷ “Nang vang Melkisedek gual ah, kumtuang thiampu la hi,” ti ah a hiatsak tâk ziakin.

¹⁸ Thupiak masa chu a hat lo ziak leh a phatchuam lo ziakin, thenthâk ahi tai.

¹⁹ (Dan chun bangma a hi’bukim thei puai;) himaleh, kinepna phazaw chu puak lut a hung hi tai; zia chun Pathian I nai uh ahi.

²⁰ Zia chu kitiamna a um ziakin sukdet in a um a; thiampu dangte chu vang kitiamna panglo ah thiampu pang a hiu;

²¹ himaleh, zia pa hivang a kiang ah zia gual hin thu a kigen ziakin kitiamna panglo ah thiampu pang ahi tai: “Lalpa chu a kitiam ta’n, a gêlsa chu theng kit talo ding ahi; ama ngei chun, ‘Nang hi kumtuang thiampu la hi,’ a la ti tangal a,” ti in.

²² Zia dungzui ah chun, Jesu chule thuthung phazaw sukdetna pang ahi tai.

²³ Amau chun thina ziakin a sêm zawm thei ta puau in, thiampu tam tak a kithâk to to uh ngai him ahi;

²⁴ himaleh, ama’n vang kumtuang ah um zing ahiziak in, a thiampu hi’na chule danglam talo ahi.

²⁵ Ziaziakchun, amau pauchap piak ding ah kumtuang ah a hin ziakin, ama ziak ah Pathian hun naite chu a tawp tiang in a hukdam thei hi.

²⁶ Tichun, thiampu lianpen, thiangtho, poikhoi lo, buakna neilo, migilote ah kipat um chuam, vante sâng ah chungnung zaw ah siam, I mamawteu â ding ah hun tawk I nei uh chu a kilawm him ta ahi.

²⁷ Thiampu, ama gitlo thawi masa zet ah, mipite â ding ah thillat lat sek gual in, nisi’n a bawl a kûl ta puai; ama a kipiak ah khan khatvei thu’n a zo suak ta ahi.

²⁸ Dan chun mihing hatna neilo chu thiampu lianpen dingin a guat sek a; himaleh, kitiamna thu, Dan nung ah um bo chun, kumtuang â ding ah Chapa ah siam bukim chu ei pia ta ahi.