HEBRAITE 4 - PATHIAN LEKHABU THIANGTHO (BSI)

Pathian Cholna Tiam Chu

¹ Ziaziakchun, lau hitiu, chutilochun, a cholna lutna thutiam um zing ngal in, la lak un a ting zo lo um kha tawl in lau.

² Chanchinpha a kiang ua gen ahi gual ma khan eihaw kiang ah le gen ahi ngal a; himaleh, a hiatteu chu a ginnau tawh a zop lo ziak un, a kiang ua thu kigente chu a phatchuampi puau hi.

³ Eihaw a gingte hi a cholna chun I lut tau a, khawvel siamtil ah kipat a nasepte chu zaw hitamaleh, “Ka cholna chun lut pua’n au, ka lungnatna ka sesap gual ah khan,” a ti tâk gual ma khan.

⁴ Mundang khat ah chun ni sagi thu zia gual hin a la gen a, “Pathian in a nasep chu a ni sagi ni chun a chawlngak san tai,” ti in.

⁵ Ahi’n, zia hin, “Ka cholna chun lut pua’n au,” a ti kit a.

⁶ Ziaziakchun, mi khenkhat a cholna lut ding ah um nak lai ziak un leh, a kiang ua thu a la kigen masaknate chun a gin lo ziak ua a lut lo ziak un,

⁷ sawt tak nung in David kam in, “Tu’ni hin,” ti’n ni bang jat a hem a tep kit a, “Tu’ni hin a aw la het ua leh, la lung uh tâksak kiu in,” ti in.

⁸ Zia cholngakna chu Joshua’n a la pia ta hileh chu, zia nung ah chun ni dang thu gen talo ding ahi’n.

⁹ Ziaziakchun, Pathian mite â dingin cholngakna a um zing nalai hi;

¹⁰ kuale a cholna lutte chu, Pathian in a nasep a cholsan gual khan ama’nle a nasepte chu a cholsan tai.

¹¹ Ziaziakchun, zia cholna chu lut dingin phatchuamngai tak in sêmgim hitiu; chutilochun, a ginlo ziak ua pûkte gual ah khan, kua a hem a la pûk kha’n lau.

¹² Pathian thu hi a hing ah, thil ahi’thei ah, chemjam hiamtua zosia sâng inle a hiam zaw’n, hinna leh thagau, gutua leh theng kikhen khop hial ah sun thei ahi; lungthim ah ngaitua leh tupte chu a hethei ngal ahi.

¹³ Thilsiam ama mit mu ah kilang lo a um pua’n; I chanchin uh I genna ding un, pa mit mu in thil zosia ngawnchang leh kihongsa kilang zing ahi.

Jesu, Thiampu Lian Chungnung pen

¹⁴ Ahi’n, van ah a la chia ta, Pathian Chapa Jesu, thiampulianpen, lopi tak chu I nei ziak un, I thugin uh hi tudet zing hitiu.

¹⁵ Thiampu lianpen, I hatlonateu ei hetpi phâk lo nei I hipuau ah, eihaw gual ah patepna tincheng a la tuak ta maleh, gitlona a la neilo chu nei I hizawu hi.

¹⁶ Ziaziakchun, hepina chu I chan theina ding uh leh panpi I ngai hun ua panpina chu dong ah, lungsiatna I mutheina ding un, jangaina lalchutpha chu hangsan tak in nai hitiu.