HEBRAITE 11 - PATHIAN LEKHABU THIANGTHO (BSI)

Ginna Umzia

¹ Ginna hi thil kinepnate um ngei ah hetna, thil I mu nailote hetchianna ahi.

² Ginna ziakin I pu leh pateu khan pâkchâk a la law tau hi.

³ Ginna’n zia khawvel hi Pathian thu ah kisiam fel zo ahi tai ti I hiau a; tichun, mutheite hi a kilang lo ah kipat siam ahi.

Abel, Enok leh Noah Etton Ding

⁴ Ginna’n Abel in Kaina sâng ah kithoina phazaw Pathian kiang in a lân a. Pathian in a thilpiak a pom ziakin, a thilbawl ziak chun midik ah pom a hi; thi ta maleh, a ginna ziakin thu a gen zing nalai hi.

⁵ Ginna’n Enok chu thina tep lo dingin lâk mang in a um a; Pathian in a lâk mang ziakin mu phâk ahi ta puai; lâk mang a hima’nle Pathian kipaksak mi ahi ti a hiatsak tai.

⁶ Ginna lo in Pathian chu sukkipak thei ahi puai; kuale Pathian kiang ah hung chun, ama chu a um ngei hi ti leh, ama hawlte chu kipakman pesek ahi, ti a ginchâk diu ahi.

⁷ Ginna’n Noah chu mu nailo thil thu ah Pathian hillawknate a pom ziakin, a Inkuante hukhinna dingin kuang a tu’n; zia chun khawvel thiamlo a chan in, ginna ziak ah dikna goluapa a hung hi tai.

Abraham Ginna

⁸ Ginna’n Abraham in a lua ding gam chu zuan dingin thu a awi ah; a zotna ding lam he masa lo in a kipandok ta’n.

⁹ Ginna ziakin a lua ding tiampiakna gam ah chun malzin gual in, puanbûk ah chun Isak leh Jakob gual in a la chêng ah; amau chule a goluapi dingte ahi ngal un.

¹⁰ Ama’n khawpi buldet Pathian siam leh sak chu a ngâk hi.

¹¹ Abraham in a kiang ah thutiampa chu ginum ah a ngai ziakin, a têkkûn nung in chisuantheina a nei kit ta’n, Sarah chule nau nei thei talo ding a la hi tai.

¹² Ziaziakchun, mi pakhat a thisa gual hita chun, van ah aksi leh tuisuagiat ah piaunêl jat ah tam a hun hingdok tai.

¹³ Ziate zosia chu ginna nei in, thil tiam vang mu man lo in a la thi tau a; himaleh, zia chu gamla tak ah thîl in, a la thi tau hi. Lei ah hin malzin leh khualzin mai a hiu ti a hiatsak zo tau in;

¹⁴ zia gual ah gente chun gam pakhat a hawl ui ti a taklang ui.

¹⁵ A hung pawtdawnau gam chu lunggul kit leu, kile’kitna ding lemchâng nei ma ma in au.

¹⁶ Himaleh, gam phazaw a thangai un, zia chu van-gam ahi. Ziaziakchun, Pathian in a Pathian uh kiti ding chu a zakcha puai; amau â ding ah khawpi khat a siam piak tak ziakin.

¹⁷ Ginna’n Abraham chu patep ah a um lai khan, Isak chu a lân a. Thutiam changpa chun a chapa changkhat chu a lân tai.

¹⁸ A chung thu ah chun zia gual hin a la kigen a, “Isak ah chun la suante hung kiti’n a,” ti in.

¹⁹ Pathian in mithisa le a kaitho thei tak tak hi ti a ginchâk ziakin, a thisa thokit gual in a chapa chu a mu kit ta ahi.

²⁰ Ginna’n Isak chun thil hung tung ding thu ah chun Jakob leh Esau a maljawl a.

²¹ Ginna’n Jakob chu a thi ding kuan in Joseph chate a maljawl ah; a tiangkhut ah kingân Pathian a la ho hi.

²² Ginna’n Joseph in a thi ding kuan in Israel chate pawtdawna ding thu a gen ah, a kivuina ding thu inle a vâithâk malam hi.

Mosi Ginna

²³ Ginna’n Mosi a pian ah khan, nausen mêlpha tak ahiziak in, tha thum sung a nu leh pa’n a selguu ah, lengpa thupiakle a lau puau hi.

²⁴ Ginna’n Mosi chu a pitin phatin, Pharaoh chanu’ chapa hi’ding a nuam pua’n;

²⁵ sawt lo sung bep gitlo nopchên limpi sâng in, Pathian mite tawh sukgentheina thok chu a têl zaw tai.

²⁶ Khrista a musitnau chu Aigupta ah gote sâng in hausakna thupi zaw’n a ngai ah, kipakman mu ding chu a thîl ziakin.

²⁷ Ginna’n lengpa lungnatna chu lau lo in, Aigupta chu a taisan ah, mutheilo Pathian chu a mu ziakin a thuak ham ham hi.

²⁸ Chatil thatpa chun, Israelte chatil haw a sukkhak lona ding in, ginna ziak in Chiakân kût chu mang in thisan a the’ hi.

Israel Mihangsante Ginna

²⁹ Ginna’n Tuipi San kha mualkâng, lei hul ah chia gual in a gâl kâi un, Aigupta mite’n le zia gual ah chun chia a guau ah, himaleh, a tum mang zo tau hi.

³⁰ Ginna’n Jeriko kulpi kha ni sagi a vêl nung un a chim tai.

³¹ Ginna’n nawchizuaknu Rahab khan enthate kha thamuang tak ah a tunsak ziakin, a ginglote manthaina khan a mangthai khawm ta puai.

³² Ahi’n, bang gen nalai ding ka hem? Gideon, Barak, Samson, Jephthah, David, Samuel leh jawlneite chanchinte gen leu hin hun inle ei dai pua’n tin,

³³ ziate chun ginna ziakin gamte a lau ah, dik tak in vai a hawm un, Pathian thutiamte a la chang un, sakeibaknei kam te a suchîp un;

³⁴ mei thilhitheina a sumit un, chemjam hiam takte a pumpel un, hatlona kipat in hatna a muu a, gâldona mihat leh mi gensim in a um un, namdang sepai honte a naw jak un.

³⁵ Numeite’n a mi thiteu thokit a muu hi. Midang khenkhat sukgenthei in a um un, thawkitna phazaw chu a chantheina ding un hukdawle a nuam puau hi.

³⁶ Midangte chun soina leh vokna a tuak un, kolbunate leh suangkul tânnate le a tuak ui.

³⁷ Suang ah se’ in a um un, thing-ât ah âttan in a um un, chemjam ah satlup in a um un, belam vun leh kêl vunte silsak in a um un; chaga leh gimthuak leh genthei tak in a um ui;

³⁸ amau â dingin lei chung hi umna tâk ei puai. Gamthip leh tâng ah te vâkvâi in, kawlhawm leh leihawm sung ah te’n a chêng sek ui.

³⁹ Ziate haw zosia hin a ginna ziak un pâkchât law maleu, thiltiam chu vang a chang nai puau hi;

⁴⁰ eihaw â ding ah thil phazaw a guanggal tâk ziakin, eihaw panglo ah bukimna a chan ding uh chu Pathian in a phal puai.