HAGGAI 2 - PATHIAN LEKHABU THIANGTHO (BSI)

Tempul Thak Lopi Dan Chu

¹ Lengpa Darius a lal kum ni’na, a tha sagi’na, ni sawmni leh khatna chun, jawlnei Haggai kiang in Lalpa‘n thu a hun gen a:

² Shealtiel chapa Judai gam awppa Zerubbabel leh Jehozadok chapa, thiampu lianpen Joshua leh, mipi nutsia ah um nalai sunte kiang ah chun zia gual hin vagen in:

³ Tu’masang ah zia In lopi dan kha a mu kha la lak un kua la um nalai awm? Tu’n bangti’n la ngai awm? La mit muu in bangmacha ahi puai maw?

⁴ Himaleh, aw Zerubbabel, kisuhangsan in, Lalpa‘n a tii; aw Jehozadak chapa thiampu lianpen Joshua, lungthuai him him kin; gam sung ah mipi zosiate haw, lungthuai kiu in, Lalpa‘n a tii. Sêm jel un, ka umpi zing ngal ah, sepai honte Lalpa‘n a tii.

⁵ Aigupta ah kipat la hung pawt lai ua, la kiang ua thu ka la tiam gual ah khan, la lak un ka thagau a chêng zing hi; lau kiu in.

⁶ Khatvei chu, tu’nung naicha sung in, vante, lei leh tuisuagiat leh khawmual hun loklîng ding ka hi, sepai honte Lalpa‘n a ti hen;

⁷ nam zosia hun chok lîng ing ka, tichun, nam zosia go thilte hun lakhawm ing ka tin, zia In hi hausakna’n hung dim ta’n ah, sepai honte Lalpa chun a tii.

⁸ Dangka chu kei â ahi’n, sana chule kei â ahi, sepai honte Lalpa chun a tii.

⁹ Zia In lopina nunung zaw chu a masa zaw sâng in nasa zaw’n ah, ti’n sepai honte Lalpa chun a gen hi; chuleh, zia mun ah hin vangphatna hun pia ding ka hi, sepai honte Lalpa chun a tii.

Vauhilna leh Thutiam Chu

¹⁰ Darius lal kum ni’na, a tha kua’na, a ni sawmni leh li’na chun, jawlnei Haggai kiang in Lalpa‘n zia gual hin thu a hun gen a:

¹¹ Sepai honte Lalpa chun zia gual hin a gen hi: Thiampute chu zia thu hi dong in:

¹² Kua a hem khat in, a puanmong ah sa thiangtho chûn hen la, zia puanmong chun vaithum a hem, buchîm a hem, uain a hem, sathau a hem leh nêk ding chi him him sukha ta leh, a suthiangtho ziang diam? In dang ah Thiampute chun, “Suthiangtho pua’n a,” ti’n a dawnhuu a.

¹³ Chuleh, Haggai in, “Mithiluang sukkhak ziak ah mi buak khat chun, zia thilte lak ah khat pen pen hi sukha leh zia chu a buak diam?” a ti kit a. Thiampute chun, “Ahi, a buak ngal hi,” ti’n a dawnhuu a.

¹⁴ Ziaphatchun, Haggai in hiti hin a dawnhu a; LALPA‘n, zia mite hi zia gual chu a hiu a; zia namte hile ka ma’n zia gual ma chun a um tau hi. A khutsuak zosiau le zia gual ma chu a hia, zia mun ah a thilpiak uh chu a thianglo ahi.

¹⁵ Himaleh, tu’hin, tu’ni kipat bang gual thil hung tung ding a hem ti ngaitua tau in. LALPA tempul ah suang pakhat chung ah suang pakhat a kikoi khawm masang in,

¹⁶ bang gual ah bawl la hiu em? Bu te’na dim sawmni la khawm ding ah kinempa’n, te’na dim sawm bep a la khawm ah; uain te’na dim sawmnga nei ding ah kinempa’n, uain te’na dim sawmni bep la nei ui.

¹⁷ Nangmau leh la sepgimnau ga zosia chu kumthu, muatna leh gial in ka hun sugam ta’n; himaleh, kei kiang ah la hung kile’kit nuam puau hi, LALPA‘n a tii.

¹⁸ Tu’hi a tha kuana, ni sawmni leh li tin ni a hita’n, tu’ni kipat hin ngaituau in. LALPA tempul suangphûm pat ni kipat in ngaituau in.

¹⁹ Bubûk ah buchi ding ah nutsia a um nalai em? Grepte, theichang kung, theibufai leh Oliv kungte chun ga sua nai lo a hiu em? Tu’ni kipat hin hun maljawl ding ka hi.

Zerubbabel Kiang Ah Pathian Thutiam

²⁰ Zia tha, ni sawmni leh li’na chun, LALPA‘n Haggai kiang in a niveina dingin thu a hun gen kit a:

²¹ Judah gam awptu Zerubbabel kiang in hiti hin gen in: Lei leh vante hun sulîng ding ka hi;

²² lenggamte lalchutpha paitha’ng ka; namte lenggam hatna susia’ng ka tin, sakol kângtalai leh a chung ah chuangte le paitha’ng ka; sakolte leh a chung ah chuangte chu kipûk in, mi tin chu a lawipa chemjam ah chun kipûk in au.

²³ Zia ni chuleh, sepai honte LALPA‘n: Aw Zerubbabel ka suakpa, Shealtiel chapa, hun panpi ing ka, sepai honte LALPA‘n a tii; khutsebi min namna gual in hun siam ing ka; nang ka hun têl ta ngal ah, sepai honte LALPA chun a tii.