HAGGAI 1 - PATHIAN LEKHABU THIANGTHO (BSI)

Tempul Bawl Thak Ding Ah Chialna

¹ Lengpa Darius a lal kum ni’na, tha gukna, ni masa pen ah chun; jawlnei Haggai mang in Shealtiel chapa, Judai gam awppa Zerubbabel leh Jehozadak chapa Joshua thiampu lianpen kiang in, Lalpa‘n thu a hun gen a:

² Sepai honte Lalpa chun zia gual hin a gen a: Zia mipite hin Lalpa Insakna ding hun a tung nai puai a tiu a.

³ Ziaphatchun, Lalpa‘n jawlnei Haggai kiang in zia gual hin thu a hun gen a:

⁴ Zia In hi suksiat ah um zing in nanghaw, In nuam tak ah la chên hun uh ahi em?

⁵ Tu’hin, sepai honte Lalpa chun: La umdan uh kisui thak tiam un.

⁶ Tam tak tak la tuu ah, tawmcha cha la la khawm ui; la neu ah la vâ diak puau in; puan la sil ua la kuama lum sa la um diak puau; kilaw ah sêmte’n le sakhau tawvang sung ah thun ding bep ah kilaw la hiu, a tii.

⁷ Sepai honte Lalpa chun: La umdan uh kisui thak tiam un.

⁸ Tâng ah chia to in thing hun puau in la In chu sau in; tichun, zia chun nuam sa’ng ka tin, chawihoi in hung um ta’ng ka, Lalpa‘n a tii.

⁹ Tam tak mu la kinêm un, ngai un, tawmcha la muu a; In ah la hun puak tung phat uh leh le ka mût mang kit sek a. Bang ziak ahi em? Sepai honte Lalpa chun a tii. A ziak chu ka In a sesa’ a um zing lai in, mi tin in la In ding chiat uh la ki-awlmaw tau a.

¹⁰ Ziaziakchun ahi, la chung lam ua van in daichîm ke ding tutâng in, lei inle a ga sua ding a tûktân hi.

¹¹ Lei chung ah te, tâng chung ah te, bu chung ah te, uain thak chung ah te, sathau chung ah te, lei ah kipat thil hung pawt him himte chung ah te, mihing chung ah te, gan-gual chung ah te leh khut nasep zosia chung ah khawkhâlna ka ko ta ahi.

¹² Ziaphatchun, Shealtiel chapa Zerubbabel, Jehozadak chapa thiampu lianpen Joshua tawh nutsia ah um sunte chu tawh, a Pathian awu leh Lalpa a Pathian un a sawl gual in, jawlnei Haggai thu chu a zawm tau a; tichun, mipite chun Lalpa chu a lau tau hi.

¹³ Tichun, mipite kiang in Lalpa thugen chu, Lalpa thupawpa Haggai in a gen sawn ta’n: Lalpa‘n ka hun umpi hi, a tii, a tia.

¹⁴ Chuleh, Lalpa chun Shealtiel chapa, Judai gam awppa Zerubbabel lungthim leh, Jehozadak chapa thiampu lianpen Joshua lungthim leh, mipi a um nalaite lungthim chu a chok tho ta’n; chutichun, a hung ua, sepai honte Lalpa a Pathian In uh chu a sa pan tau a;

¹⁵ tha gukna, a ni sawm ni leh li’na chun.