HABAKKUK 3 - PATHIAN LEKHABU THIANGTHO (BSI)

Jawlnei Habakkuk Pauchapna

¹ Shigio-noth dungzui ah jawlnei Habakkuk pauchapna:

² Aw Lalpa, la minthanna thu ka la he ta hen; aw Lalpa, la thilbawl tiza in ka ding mai hi. Keimau hun sung in hun hi’hal kit inla, ka hun sung ma mau hin hun hiatsak inla; la lungnatna tawp khawk inle ja’ngaina hemil kin.

³ Teman gam ah pat in Pathian a hung in, Paran tâng ah kipat in Mithiangtho chu a hung hi. (Selah) A lopina’n vante khi a tuam in, a pâkna aw’n lei chung a dim hi.

⁴ A vak dan chu nisa a bang in; a khut ah pat vâk zung a kikhawdok in, zia tak ah chun thilhitheina sêlgûk ahi.

⁵ A ma-âng in huipi a chia ah, pûl in a nung a zui hi.

⁶ A ding ah, lei a thing ah, a en ah, namte chu a kithing tau hi. Kumtuang tângte a kai chim in; kumtuang lampite ah chun kumtuang mual leh, tângte chu a niam tau hi.

⁷ Kushan puan In haksatna chu ka mu ta’n; Midian gam ah a puan In jakteu chu a kithing tai.

⁸ Aw Lalpa, luite chun a hun hi’thangtawm la hem? La sakol chung ah chuang ah, la sakol kângtalai gâl zo ding ah la chuan lai ah khan, luite chung ah lungna la hem, ahiloleh, tuisuagiat chung ah lungna la hi tam?

⁹ La thalpite la siamtup zo ta’n, la thalchangte chule la thu ah, kâpdaw ziang dingsa’n a um tau hi. (Selah) Lei chu luipite ah chun la khenjak tai.

¹⁰ Tâng liante’n a hun muu in a kithing tau a; tuikhangliante’n a hawt vêl un, tui thûk takte’n a awu a suau hi. Nisa’n a bân sâng tak in a jak hi;

¹¹ la thalchang leng vut vut leh, la thalpi te zol zolte ziakin, chung sûn ni leh sawlthapile, a mun sâng tak ua chun a ding den tau hi.

¹² La siatsona’n lei la chuan suak ah, hachangthak in namtin la chuanchil tai.

¹³ La mite hukdok dingin la hung pawtdok ah, la sathaunu’ ngei hukdok dingin. Migilo Inkuan luchang chu la khet gawp piak ta’n, a suangphûm ah kipat a Inchung tiang un la hawkdaw piak tai. (Selah)

¹⁴ Migentheite la nêk zaw ding uh lau ah kisêlte, chîmpei in a mut jak gual ah, naw mang gawte lak ah gâlhatte chu, a thalchang un a luchang uh la kâpthil piak tai.

¹⁵ La sakol in tuisuagiat chu la chuanchil ta’n; tichun, tuiliante chu a kinawk phuan bul bul ta mai ui.

¹⁶ Ka het phât in ka sunggil a kithing ah; a git chun ka mûknote lau in a kithinsak hi. Ka gusung un muatna a lut in, ka nuai ah ka kalsuante a kilîng hi. Kei uh ei do’te chung ah siatna nikhua hung tung ding chu; thipbek in ka ngâk ta mai ahi.

Buaina Hun Ah Muanna Leh Kipakna

¹⁷ Theichang kung selthak lo in, Oliv thingte’n ga sua lo in, loulai ah bu piang lo in, gan-gualte chule a huang ah um talo in, gan kul ah chun bawng hon pakhat chale, um talo ziang maleh

¹⁸ Lalpa ah chun kipak zing ing ka tin; ka hukdamna Pathian ah chun kipak zing ing ka.

¹⁹ Pathian, Lalpa chu ka hatna ahi; ama’n ka kengte hi sazuk keng gual in a siam ah, tângsâng tak ah chia thei dingin ei siam hi. La pu lian ding ah tingtang tawh sak ding.