EZRA 8 - PATHIAN LEKHABU THIANGTHO (BSI)

Ezra Kitonpite Inkuan Hotute Chu

¹ Ziate hi, Lengpa Artaxerxes hun lai ah Babulon saltânna kipat ei hun zuidokte khangthu leh, a Inkuan tinteu ah hotute min haw chu a hi:

² Phinehas suante lak ah kipat in Gershom ahi. Ithamar suante lakah kipat in Danial ahi.

³ Shekaniah leh David suante lak ah kipat in Hattush ahi. Parosh suante lak ah kipat in Zekariah tawh pawsal za leh sawmnga min khum a hiu.

⁴ Pahath-moab suante lak ah kipat in Zerahiah chapa Eliehoenai tawh pawsal za ni a hiu.

⁵ Zattu suante lak ah kipat in Jahaziel chapa Shekaniah tawh pawsal za thum a hiu.

⁶ Adin suante lak ah kipat in, Jonathan chapa Ebed tawh pawsal sawmnga a hiu.

⁷ Elam suante lak ah kipat in, Athaliah chapa Jeshaiah tawh pawsal sawmsagi a hiu.

⁸ Shephatiah suante lak ah kipat in, Mikael chapa Zebadiah tawh pawsal sawmgiat a hiu.

⁹ Joab suante lak ah kipat in, Jehiel chapa Obadiah tawh pawsal za ni leh sawmgiat a hiu.

¹⁰ Bani suante lak ah kipat in, Josiphiah chapa Shelomith tawh pawsal za leh sawmguk a hiu.

¹¹ Bebai suante lak ah kipat in, Bebai chapa Zekariah tawh, pawsal sawmni leh giat a hiu.

¹² Azgad suante lak ah kipat in, Hakkatan chapa Johanan tawh pawsal za leh sawmkhat a hiu.

¹³ Adonikam suante lak ah kipat in, a vainung lam deu ah hungte min haw chu Eliphelet, Jeuel, Shemiah, tawh pawsal sawmguk a hiu.

¹⁴ Bigvai suante lak ah kipat in, Uthai tawh Zakkar tawh pawsal sawmsagi a hiu hi.

Tempul ah Nasem Dingte

¹⁵ Chun, Ahava khawpi tiangah luang, luipi pang ah chun a leng un ka ko khawm ah, zia tak ah chun ni thum sung ka giak tau ah. Mipite lak leh thiampute lak ka et vêl vêl leh Levi suante lakah mi pakhatle ka mu zo pua’n;

¹⁶ ziaphatchun, a lak ua hotu ah pang Eliezer, Ariel, Shemiah, Elnathan, Jarib, Nathan, Elnathan, Zekariah leh Meshullam cheng tawh, a lak ua mipil Joiarib tawh Elnathan chu ka kosak a;

¹⁷ Kasiphia mun ah hotupa Iddo kiang in ka sawl in; Iddo kiang leh Kasiphia tempul ah nasêm ah pang a lawiteu kiang in, I Pathian In ah nasêm ding hun sawl in, ti’n ka hil a.

¹⁸ Pathian doisakna ka chung ua a um ziakin, hiatthiamna fel tak nei mi Israel suan ah mi, Levi phungah Mahli chapa a min Sherabiah chu a chapate tawh a Inkuan un, mi sawm leh giat chu a hung tau a;

¹⁹ amau tawh, Hashabiah tawh, Merari suante lakah mi Jeshaiah tawh a chapate tawh a Inkuan un mi sawmni a hung un;

²⁰ amau cheng ban ah chun, David leh a Siamângte’n Levite kithuapi ding mawng mawng ah Tempul ah nasêm ding mi, za ni leh sawmni a la guatteu chule a pang ua. Amau chu a min uh zikdaw a hiu hi.

Vênbitna Don ah Anngawl ah Pauchapna

²¹ Ziaphatchun, Ahava lui pang ah chun, Pathian âng ah kikoi niam ding leh, ka chateu tawh, ka nei leh lamteu pum ah bit takah ka zin theina ding ua lam dik ei kawkmu theina dingin, anngawlna ding thu ka puang ta’n.

²² Lengpa kiang in, ka Pathian uh doisakna khut chu ama hawlte zosia chungah um sek leh, ama dodâl leh nusia zosiate chungah a thilhitheina leh a lungnatna chu sek ahi ti ka la hil tâk ziak un, lam kâl ah mêlma ei hung do dingte lak ah ei vêng ding sepai hi’n, sakol chungchuang mi bang a hem jat vêl lengpa kiangah dot ding chu la ka zak a cha ta’n.

²³ Ziaziakchun, anngawl in zia gual chu bawl piak dingin ka Pathian kiang un ka don ngût ngût ziang tau ah; chuleh, ama’nle ka dotnau chu ei ngaitha tai.

Tempul â Ding ah Thawlawm

²⁴ Ziaphatchun, thiampute lak ah challang deu deu sawm leh ni ka sep chuam ah, ziate chu: Sherebiah, Hashabiah, leh a chanauteu a kiang ua um cheng chu tawh a hiu a.

²⁵ Tichun, ka Pathian uh In â ding ah lengpa leh a thudotte, a Siamângte leh zia tak ah Israel um zosiate thawlawm thilpiak, dangkate, sanate, ûm leh bêlte zosia chu ka te’daw piak sik sek tai.

²⁶ Amau khut ngei in, dangka talent za guk leh sawmnga, dangka ûm leh bêl za khat, talent za khat ah gik tawh, sana thiang talent za khat tawh,

²⁷ sana belbu sawmni daric sang khat man tawh, sum-eng thiang tak, sana gual ah mantam bêl pani le a pang hi.

²⁸ Chuleh, a kiang un zia gual hin ka gen a: “Nanghaw hi Lalpa â ding ah thiangtho la hitau in, ûm leh bêlte hile a thiangtho a hitau a; chuleh, zia dangka leh sana haw hile, la pu leh pateu Pathian, Lalpa â ding ah kiphalna dungzui ah thawlawm kichawikhawm ahi.

²⁹ Jerusalem ah thiampu hotu lianpente leh, Levite leh Israel Inkuan tin ah puipa chiat masang ah, Lalpa In pindan sung ah la te’daw masangsiau vêngtup ah chingtup dingin pilvâng ma mau in,” ti in.

³⁰ Tichun, thiampute leh Levite chun dangka, sana leh ûm leh bêlte chu a kiang ua te’daw piak ahi dungzui in, Jerusalem lam ah I Pathian In uh tut dingin a lakhawm tau hi.

Jerusalem Lam ah Kile’kitna

³¹ Chutichun, Jerusalem lam ah chia dingin a tha khatna, ni sawm leh ni ni chun, Ahava ah kipat in ka kipandok kit tau a; ka Pathian doisakna khut chu ka chung un a um ziakin, mêlmate leh ei lamchânte khut ah kipat chun ei vêng bit ta ahi.

³² Jerusalem ka hung tun phat un, ni thum sung chu ka um den tau a.

³³ A ni li ni chun sana leh dangka, ûm leh bêlte chu Pathian In ah, Uriah chapa Meremoth thiampu khut ah te’daw in a um ta’n; a kiang ah chun Levi mi Pinehas chapa Eleazar leh Jeshua chapa Jozabad leh Binmi chapa Noadiah le a um ui.

³⁴ A jat chu sim in te’ chit chiat ahi; chuleh, bangkim chu a gik dan chiat ah tepte ahi.

³⁵ Zia hun ah chun saltânna kipat hung pawtdok, saltâng kile’kitte chun, Israelte Pathian kiangah hâlmang thillat a piau a; Israelte zosia kikop dingin bawngchal sawm leh ni, belamchal sawmkua leh guk, belamno sawmsagi leh sagi, leh gitlo ngaidam dotna dingin kêlchal sawm leh ni le a lân tau a; zia haw zosia chu Lalpa kiang ah hâlmang thillat ah piak ahi.

³⁶ Luipi Gâl lam ah gam awpte leh thukhente kiang ah lengpa thupiakte chule a pedok tau a; tichun, amau haw chunle mipite leh Pathian In kisa chu a panpi tau hi.