EZRA 6 - PATHIAN LEKHABU THIANGTHO (BSI)

Darius Thupiak Chu

¹ Ziaphatchun, Lengpa Darius in Babulon ah lengte lekhabu haw chu phêt dingin thu a pia.

² Media gam ah lal In Ecbatana ah chun, zia gual ah lekha kizikna lekhabu zial chu a mudok tau a:

³ Tepte’na: Lengpa Kuras in a lal kum khatna chun zia gual thupiak hi a la suadok hi: Jerusalem ah Pathian In chungchâng thu’n, zia In chu tundin kit hi hen la, kithoinate leh hâlmang thilpiak latna mun chu bawldaw kit hi hen; a sândan chu tong sawmguk hi hen la, a vailam le tong sawmguk ma hi hen la,

⁴ a bâng ah suang kisêk gual thum a chia zaw tak leh, a chung ah thing gual khat chiasak hihen la; sumlut ding zosia chu Lengpa sum lak ah kipat lakdaw hi hen.

⁵ Chuleh, Nebukadnezar in, Jerusalem Tempul ah Pathian In a kipat sana leh sum-eng ah kisiam ûm leh bêlte a puakdaw, Babulon a tut zosia khale Jerusalem tempul ah puak tung kit hi hen la, Pathian In ah chun a umna chiat un koi kit hi hen; ti’n a kizik a.

⁶ Tu’hin nanghaw, Luipi Gâl lam ah gam awpte Tettanai leh Shethar-bozenai leh nanghaw Luipi Gâl lam ah palaite haw, a la kikoi kiang unla;

⁷ zia Pathian In sakna thu hi a la subuai kiu in; Judate chung ah gam awppa leh Judate lak ah hotute chun, zia Pathian In chu a mun ngeiah chun a la sau hen.

⁸ Zia mai chule hilo in, Pathian In sakna ding ah hin Judate lak ah hotute kiangah a la bawl ding danuh le thu ka hun pia ahi: Luipi gâl lam ah leiman kimu zosia lak ah kipat in zia mipite matchâk ding hi kin tak in a la piau in.

⁹ Van Pathian kiang ah hâlmang thilpiak ah a kithoina ding ua poimawna a nei uh chun, bawngchalte, belamchalte leh belampite le a la piau inla; chuleh, Jerusalem ah thiampute â dingin nisi’n leh gehu, chi, uain, leh sathau haw chu tan lo in piak hiu hen la;

¹⁰ chutileh, van Pathian kiang in a pom tâk leh a lungdamna lam takah kithoina gimtui a lat ua, Lengpa leh a chate damtheina ding inle ei pauchap piak theina ding un.

¹¹ Kua’nle zia thupiak hi a sukdanglam chun, a In sung ah kipat thingtuai khat jukdaw hi hen la, zia ma ma chu a tûl ah siam hi hen. A In chule ki’dak buak khawmna mun hung hita hen.

¹² Jerusalem ah Pathian In suksiat gaw taphot leh, zia thupiak sukdanglam gawte chu, kua leng leh lal leh bang gual mi hiziang leh le, zia mun ah a min hi’det pa, Pathian chun sumangthai dik dek ta hen. Keima Darius in zia thu hi ka piak ahi; a dîn a dên in zui hi hen, ti’n a dawnhuna lekha chu a zik tai.

Tempul Sakzawna leh Latna Chu

¹³ Ziaphatchun, Lengpa Darius thupiak dungzui in, Luipi Gâl lam ah gam awppa Tattenai tawh Shethar-bozenai leh a lawiteu chun, Lengpa Darius thupiak dungzui takin kin takin a bawl tau a.

¹⁴ Tichun, Judate lak ah upate chun, jawlnei Haggai leh Iddo chapa Zekariah te ni thugen pansan in, In chu a sau ah, a masawn ma mau hi. Israelte Pathian thupiak leh Persia Lengte, Kuras, Darius leh Ahasueras thupiak dungzui in In chu a sa zo tau a;

¹⁵ chuleh, zia In chu Lengpa Darius lal kum gukna, Adar tha a ni thum ni chun zawthian ahi tai.

¹⁶ Israel mipite, thiampute leh Levite leh saltânna kipat hung kile’kit zosiate chun, zia Pathian In latna chu lim leh kipak tak in a lawm tau hi.

¹⁷ Zia Pathian In latna dingah chun, bawngchal za khat, belamchal za ni, belamno za li leh Israelte zosia gitlo thoina dingin, Israel Inkuan sawm leh nite dungzui in kêlchal sawm leh ni le a lân tau hi.

¹⁸ Tichun, Mosi lekhabu kizik dungzui in, Jerusalem ah Pathian hona nasêm dingin thiampute chu chan a kihawm ua, Levite le a panmun chiat un gual tuak a hitau hi.

Chiakân Kût Lopna

¹⁹ Tha khatna a ni sawm leh li tin ni chun, saltâng kile’kitte chun Chiakân Kût a mang tau a.

²⁰ Thiampute leh Levite chu a kisuthiangsa’n, a leng un a thiangsa ngen a hitau a. Tichun, saltâng kile’kit zosia â ding leh, a thiampu nasemteu â ding leh, amau mimal chiat â dingin, Chiakân Kût belamno chu a that tau hi.

²¹ Saltânna kipat hung pawt kit Israel mipi zosia leh, a chênnau gamtin ah namtinte lak ah kipat kisuthiangtho ah, Israelte Pathian, Lalpa hawl tapo in a ne tau a.

²² Kipak tak in thawipanglo Kût chu ni sagi sung a mang tau a; Lalpa‘n amau a sukkipak ziakin leh, Assuria Lengpa chun a lungthim amau ngaisak dingin a hei ziakin, Israelte Pathian chênna In sakna dingin nasa tak in a kithuapisak hi.