EZRA 5 - PATHIAN LEKHABU THIANGTHO (BSI)

Tempul Sak pat Kitna

¹ Zia hun ah chun, jawlnei Haggai tawh Iddo chapa Zekariah in, a chung ua um zing Israelte Pathian min in, Jerusalem khua Juda mi umte kiang in thu a vagen tau a.

² Tichun, Shealteal chapa Zerubbabel tawh Jozadok chapa Jeshua in Jerusalem khua Pathian In a hun sa pan kit tau ah; amau chu Pathian mite chun hung umpi in a panpiu a.

³ Zia hun ah chun, Luipi Gâl lam ah gam awppa Tattenai tawh Shethar-bozenai chu a lawiteu tawh hung in, a kiang un, “Zia In hi sa ding leh kulbâng bawl zo ding ah hin kua’n thu a hun pia a hem?” a hung tiu a.

⁴ “Zia Insate min hi bang bang a hem?” ti inle ei dong nalai ui.

⁵ Himaleh, Pathian in Judah mite lak ah hotute chu a vên zing ziakin, a thuu chu Darius kiang in a tunah, a dawnhuna lekha ah kizik a mu kit masangsiau chu a nasep uh a cholsak puau hi.

⁶ Luipi Gâl lam ah gam awppa Tattenai leh Shethar-bozenai leh a lawiteu gam palaite, Luipi Gal lam ah umte chun, Lengpa Darius kiang in lekhathot a zik tau a.

⁷ Zia gual hin lekha chu zik in, thil um dan a hil tau hi: Lengpa Darius kiang ah thamuanna um ta hen!

⁸ Judai gam ah Pathian lopi tak In ah ka vachiau in. A In chu suang kisêk ngen ah kisa leh a liangjawl tiang kilem zo a hita’n; lunglut tak ah kisa ahi ziakin a masawn ma ma ziang hi.

⁹ A hotuteu kiang ah chia in, zia gual hin ka vadong un: “Zia In hi sa ding leh kulbâng bawl zo ding ah hin kua’n thu a hun pia a hem?” ka vatiu a.

¹⁰ Chuleh, a hotuteu min hun zikdaw ah hun hiatsak ding ti’n ka dong ua.

¹¹ Zia gual hin ei dawnhuu a: “Keihaw hih lei leh van Pathian suakte ka hiu in, tu’ma lam hun sawt tak ah kipat Israelte leng lopi tak khat in, Pathian In ding ah a la sak zawsa kha tu’ hih sak phat kit gawte ka hiu.

¹² Himaleh, ka pu leh ka pateu in van Pathian a la suklungnat ziak un, Kaldai mi, Babulon Lengpa Nebukadnezar khut in a la pedok in, ama chun zia In hi susia’n, a gam mipite hile Babulon lam in a la pawmang ta’n.

¹³ Ahi’n la, Babulon Lengpa Kuras in, a vaihawm kum khatna’n zia Pathian In hi tundin kitna dingin thupiak a bawl a.

¹⁴ Zia bep chule hilo in, ûm leh bêl sana leh sum-eng ah kisiam Pathian In ah um, Nebukadnezar in Jerusalem Tempul ah kipat a la puakdaw Babulon ah tempul ah a la koi haw zosia kha le, Lengpa Kuras in Babulon tempul ah kipat ladok in, a gamawptu Sheshbazar khut in a la pedok a.

¹⁵ Zia bân ah chun a kiang in, ‘Zia ûm leh bêlte hi la’n la chia in; chuleh, Pathian In chu a mun ma ma’n tungding inla, Jerusalem Tempul ah chun ziate hi la koi kit ding ahi,’ a ti tai.

¹⁶ Tichun, zia Sheshbazar chule hung in Jerusalem ah Pathian In suangphûm haw a hung lem pan a; zia hun ah kipat khan tu’ni tiang hin zia In chu kisa zo nai lo ahi,” a tiu a.

¹⁷ Tu’hin, Lengpa’n lem a sak chun, Babulon lal In ah lekhabute chu phêt in, Lengpa Kuras in Jerusalem ah Pathian In tundin kit ding thu hi a la pe him him em ti hawl hileh pha’n a. Zia thu ah hin Lengpa’n a dawi dan dan in keihaw lekha’n ei hun thot hen, ti’n a zik tau hi.