EZRA 3 - PATHIAN LEKHABU THIANGTHO (BSI)

Jerusalem ah Pathian Hona Tungding Kit

¹ Chuleh, tha sagi’na a hung hi’phatin Israelte chu khawpite ah chun a chên suak phat un, Jerusalem ah chun a hung kikhawm tau a.

² Jozadok chapa Jeshua tawh, a thiampu chanpite Shealtiel chapa Zerubbabel tawh a chanaute chu, Pathian mi Mosi dan dungzui ah Israelte Pathian kiang ah hâlmang thil latna ding mâichâm siam ding in a hung kipan tau a.

³ A kîmvêl ua mipite chu lau maleu le, mâichâm chu a umna mun ngai ma’ chun a hun lemdok kit tau a; chuleh, zia mâichâm ah chun Lalpa kiang ah hâlmang thilpiakte chu jingkal leh nitâk si’n in a la’n tau hi.

⁴ A dan kiziksa dungzui in bawkcha kût le a mang un; chuleh, nisi’n hâlmang thil latte chule nisi’n leh bawl ding ah a kiguat dungzui tak in a lân un;

⁵ ziazaw nung ah chun hâlmang thil latte, tha thak kûtte leh Lalpa a ding ah kût zek thiangthote bawl zing kawm in, mi tin in Lalpa â ding ah thawlawm a kiphalnau dungzui chiat un a lakhawm sek ui.

⁶ Tha sagi’na a ni khat ni kipat in, Lalpa kiang ah hâlmang thil latte chu a lân pan tauah. Himaleh, Lalpa tempul suangphûm dingte chuvâng a kilem pan nai puai.

⁷ Tichun, Persia Lengpa Kuras phalpiakna dungzui ah chun, suangsêk mite leh thing lam ah themthiamte kiang ah chun sum a piau ah, sidar thing haw Lebanon ah kipat tuisuagiat tiang leh Joppa khua tiang hun tawl khawm dingin, Sidon leh Tura mite kiang in nêk dingte, dawn dingte leh sathaute chu a pedok tau hi.

Tempul Suangphûm Ding Lepna

⁸ Jerusalem ah Pathian In a hung tun nung uh a kum ni’na a tha ni’na chun, Shealtiel chapa Zerubbabel tawh Jozadok chapa Jeshua chun, mipite zosia tawh, thiampute leh Levite, saltânna mun ah kipat hung pawt ah Jerusalem ah hung zosia chun na a hun sêm pan tau a.

⁹ Tichun, Jeshua chu a chapate tawh a chanauteu, Levi mite kum sawmni ah kipat a chung lam zosia, In sakna hotu dingin a guat ua. Kadmiel chu a chapate Binnui tawh Hodaviah tawh, Levi mi Henadad leh a chapateu leh a chanauteu chun Pathian In sate chu a panpiu a.

¹⁰ Insa mite’n Lalpa Tempul suangphûm ding a koi lai un, Israelte lengpa David thupiak dungzui in, Lalpa pâk dingin thiampute chu a thiampu van ua kithuam in pengkulte chawi in, Levite leh Asaph chapate chunle vai khutbette a chawi un;

¹¹ a kidawngtua in Lalpa pakcha’n La a sau a: “Ama a pha hen, Israelte chung ah a ngilneina’n kumtuang a dai hi,” a tiu a. Lalpa In suangphûm lep pat ahi tâk ziak ah kipak in, mipi zosia ngai tak ah kiko in Lalpa a pâkcha tau hi.

¹² Himaleh, thiampute, Levite leh Inkuan tin ah puitute lak ah têksia tam tak, a In masa suangphûm a la mu phate chun, zia In suangphûm kipan kit chu a muu in thasia tak leh ngai tak in a kap tauah, mi tam takte chu kipak ziakin ngai tak in a kap un,

¹³ tichun, gamla tak inle hiat thei ding khop ah ngai tak ah mipi kiko chiat a hiziak un, kipak ziak ah kiko tawh mipi kâ thawm chu kuama’n a hekhen thei ta puau hi.