EPHESA 5 - PATHIAN LEKHABU THIANGTHO (BSI)

Khawvak ah Umna

¹ Chuleh, a cha doitakte gual in, Pathian nunchan zui tau in.

² Khrista’n ei hepi ah, ei uh â ding ah gimtui ah Pathian kiang ah thillat ah a kipiak gual khan, hepina nei zing tau in.

Khawvel Dan Haisan

³ Mithiangthote la hung hi’tâk ziak un, numei chung ah tatsualnate, buakna zosia leh ênna thute hi la lak un genkhâk le hita ki’hen.

⁴ Jamaw thute, thu manlo leh tawt thugente haw hi a kilawm ta puai; ziate haw sâng ah chun kipakna thu gen zaw tau in.

⁵ Mi hûkte, mi buakte, mi du-âm leh milim ho-te haw hin, Khrista leh Pathian gam ah chun chan him him a nei puau hi, ti he tau in.

⁶ Kuama’n thu manlo in hun thêm kiu hen; ziate ziak ah hin thu awilo chate chung ah Pathian lungnatna a tung sek hi.

⁷ Ziaziakchun, amau haw tawh kikop kiu in.

⁸ Malai khan thim ah mi la hiu a; himaleh, tu’hin vang, Lalpa ah chun vâk ah mi la hung hitau a; ziaziakchun, vâk chate gual in um tau in.

⁹ Thagau ga chu phatna zosia leh dikna leh thutak ahi ngal a.

¹⁰ Ziaziakchun, Lalpa pom tâk chu hawl zing un.

¹¹ Thim thilhi ga neilote ah chun panna nei kiu inla, zia sâng ah chun a dik lona hiatsak zaw tau in.

¹² A gûk ah thil kihi’ te hi a gen le zâchâk a um sek ngal ah;

¹³ himaleh, vâk in a suklat tapo chu muthei a hung hi tâk ziakin;

¹⁴ mu thei ah hung um zosia chu vâk ah mi ahi ngal in. Ziaziakchun, “Nang ipmu hak inla, mithi lak ah kipat hung tho ta’n, chutileh, Khrista chun vakna hun pia’n a,” a la tii.

¹⁵ La hin dan uh chu mingolte gual ah umlo in, mipilte gual in pilvâng tak in um zaw tau in.

¹⁶ Ni te hi a phat tâk lo ziakin, hun lemchâng a tam theipen hawl zing un.

¹⁷ Ziaziakchun, ngolhuai tak in um kiu inla, Lalpa lung lam chu hawl in hiatthiam gaw zawu in.

¹⁸ Zukham in um kiu in; zia ah chun kisûm lona a um sek hi; zia sâng ah chun Thagau in dim zaw tau in.

¹⁹ Pâkna La te, Pathian La te, thagau lam La te ah kihotua chiat in, Lalpa kiang in la lunggil zosiau in thilgi kilawm leh La sa in,

²⁰ I Lalpau Jesu Khrista min in, Pathian, Pa ngei kiang ah chun bangkim in kipak thu gen zing tau in.

Khristian Inkuan

²¹ Khrista la jana ziak un, nanghaw le kilutcha tua chiat un.

²² Jite haw, Lalpa kiang ah la kituklut gual un, la pawsalteu kiang in le kitulut un.

²³ Khrista chu ama taksa a kochuamte hukdampa leh a luchang uh ahi gual ma’n, pawsal chu a ji â ding ah luchang ahi ngal a.

²⁴ Kochuam chu Khrista thunuai ah a um gual hin, jite le bangkim ah a pawsalteu thunuai in a um diu ahi.

²⁵ Pawsalte haw, Khrista’n a kochuam a hepi ah, a thasâng ah a kipiakdaw gual in, nang unle la jiteu hepiu in;

²⁶ amau chu a sukthiantho theina dingin, a thu tui ah chun sil thiang in,

²⁷ a kochuam chu mêlhêmna bei leh thiangtho tak ah, ama â ding ah mêlpha leh gun tak ah a umtheina ding un a kipumpiak tangal a.

²⁸ Zia gual ma chun, pawsalte’nle a jiteu chu amau taksa gual ah a hepi ding uh ahi. Kuale a ji hepi chu ama kihepi ahi.

²⁹ Kuama’n ama taksa bâkte a haw ngai puai; Khrista’n a kochuam a duat gual in ama’nle, a chawm in a duat ding ahi;

³⁰ ama taksa bâkte chu I hingal un.

³¹ “Ziaziakchun, pawsal chun a nu leh pa nusia in a ji chu zawm ta’n tin, pumkhat hung hita’n au”.

³² Zia hi thugûk lopi tak chu ahi; ahi’n, Khrista leh kochuam a kikâl te’khinna ka mat ahi.

³³ Banghitaleh, la lak ua kua hi ziangleu chinle, nangmau la kihepi gual tak un, la jiteu le hepi chiat un; chuleh, ji chunle a pawsal chu a tak in ki’cha ta hen.