EPHESA 4 - PATHIAN LEKHABU THIANGTHO (BSI)

Khrista Taksa ah Kipumkhatna

¹ Chutichun, keima, Lalpa ah suangkul ngâk hin, a kona tawh kiphutawk ah um ding leh,

² kingaitawmna tawh, nunnemna tawh, thokzawna tawh, hepina ah kidawtua zo tak ah um ding in,

³ kichamna kikân khawm ah, Thagau ah kipumkhatna chu tudet ding ah kipe zo dingin ka ni la hiu.

⁴ Ko la hi’nau, kinepna pakhat ah ko la hi gual un, taksa pakhat leh Thagau pakhat,

⁵ Lalpa pakhat, ginna pakhat leh baptisma pakhat ah um in;

⁶ Pathian pakhat, mi zosia Pa, ama chu bangkim chung ah um ahi’n, bangkim jal in a um ah, bangkim ah le a um hi.

⁷ Himaleh, Khrista thilpiak te’na dungzui in hepina chu piak I hi chiat ui.

⁸ Ziaziakchun, “Chung lam ah a chia to lai khan, matte chu sal in a pui ah, mite kiang ah chun thilpiakte a piai,” ti ahi.

⁹ (Aleh, mi leimun nuainung pen ah a kum suk masak zet lo chun, bangti’n “A chia to,” kiti thei ding a hem?

¹⁰ A kumsukpa ngei chu mi zosia chung lam pek, van ah kal to chu ahi’n, ama chun bangkim a sukdim theina ding in.)

¹¹ Tichun, khenkhatte chu sawlchâk hiding in, khenkhatte chu jawlnei hiding in, khenkhatte chu Pathian thugen dingin, khenkhatte chu kochuam vâk ding leh khenkhatte chu zilsak ah pang dingin thilpiak a pechiat a;

¹² mithiangthote chu nasepna matchâk ah thuam bukim ding leh Khrista taksa chu siam piting ah,

¹³ ginna leh Pathian chapa hetna lam ah I hung pitin ua, Khrista bukimna tawh kibang ah I hung kipum khat theina ding un.

¹⁴ Diklo tak ah juauthepna gual ah, pil gûkkhel ah mihing thêm kawm ah, ziltilna thigua’n langkhat langkhat ah a mût lumlet thei ding ah naupang I hi’ tâk lona ding un.

¹⁵ Himaleh, hepina thutak kigen in, I luchang uh Khrista ah chun bangkim in khanglian thei hitiu in;

¹⁶ ama ah chun taksa bâk zosia chu kilemtua ah, kisutua leh kizop khawm in, bâk tin in a sep ding chiat uh a sep phat leh, taksa chu khangto in, hepina chun ama leh ama a kilem to sek ngal a.

Hinna Lui leh A Thak

¹⁷ Ziaziakchun, zia hi Lalpa ah chun ka pom in ka phût la hiu: lungthim kisathei tak ah um, Jentelte gual in um ta kiu in.

¹⁸ Amau chu a hetnau sukthim piak a hiu ah, a lungthim mawl leh tâk ziak un, Pathian ah hinna chu chang talo a hiu hi.

¹⁹ Amau chun kihiatdaw theina nei talo in, hûkna chun a kipumpiak tau ah, buakna chitin chu du-âm tak in a bawl tau hi.

²⁰ Nang un vang zia gual chun Khrista chun la zil puau hi!

²¹ Thutak chu Jesu ah a um in, a thu he ah ama ah thuhil ah um la hita ngal un.

²² La nidang lai hindan uh, la mihing lui uh zuauthei leh hûkna ah pui mang ah umsa chu lîptha ding leh,

²³ la lunggil thagau uh chun hin thak ah hung um in,

²⁴ mihing thak, diktatna leh thianthona Pathian kibatpi ah siam ah chun kivan tau in.

Hinkhua Thak Mat Ding Dan

²⁵ Chutichun, zuau gen haisan in, I Invêngteu kiang chiat in thudik gen hitiu, a kizom khawm chiat I hingal un.

²⁶ Lungnau inla, ahi’n, gilo kiu in; la lungnatnau chu nisa’n tumpi ki’hen.

²⁷ Diabol chu panmun pekiu in.

²⁸ Gucha chun gûkchâk haisan hen la, a tasam kiang ah piak ding a neitheina dingin a khut ah dik tak in sêmgim zaw ta hen.

²⁹ Thu phalo him him la kam un pawt ki’hen la, a kul dungzui ah mi dang siamphatna phachuam ding bep pawt zaw ta hen; tichun, a ngaithate chun hepina a piak theina ding in.

³⁰ Ahi’n, Pathian Thagau Thiangtho chu hi’lungngai kiu in; tatna ni ding ah chun ama ah chun tepte la hi tangal un.

³¹ Thangtawmna, lungnatna leh siatsona, hânsiatna tawh kigensiatna zosia chu haisan tau in, lungthim sia zosia tawh.

³² Chuleh, kihepi tua ah, kilainatna nei in um unla, Pathian in Khrista ah a hun ngaidam gual in kingaidam tua tau in.