EPHESA 1 - PATHIAN LEKHABU THIANGTHO (BSI)

Chibai Bûkna

¹ Pathian doilam ah Khrista Jesu sawlchâk Paul hin, Ephesa khua mi thiangtho, Khrista Jesu ah mi ginumte kiang ah chun:

² I Pau Pathian leh Lalpa Jesu Khrista ah kipat hepina leh chamna um ta hen.

Khrista ah Thagau lam maljawlna

³ I Lalpau Jesu Khrista Pa leh Pathian chu pâk in um ta hen. Ama chun van mun ah te’n thagau lam maljawlna chitin in Khrista ah chun ei maljawl a,

⁴ ama ah thiangtho leh demna umlo ding ah lei chung pian masang ah ei uh ei la têl tâk gual in.

⁵ Ama chun a doi leh tup gual tak in, ei uh hi Jesu Khrista vang ah a chate hiding in, hepina ziakin ei la guatlawk tai.

⁶ A hepina chun ama’n ei la lut ah, zia a hepina lopi chu I chawihoina ding un.

⁷ A hepina hau dungzui in, a thisan ah tatna chu chang in, I gitlonateu ngaidamna chu I chang tau ahi.

⁸ Zia hepina chun ama pilna leh lunggêl thiamna’n ei la vuk ta ahi.

⁹ Khrista ah a thiltup, a doilam dungzui ah a lunggil thugûk chu ei hiatsak ta ahi.

¹⁰ Zia a doilam lunggil chu, hunbî a hung tun phat leh, thil zosia: Van ah umte leh lei chung ah umte chu, Khrista ah gawm khawm in, suktua sik sek ding ti hi ahi.

¹¹ Ama doidan leh lemguat dan ah thil zosia sêm in, a tup gual ah a guatlawkna chu, ama golua I hi’na ding uh ahi.

¹² Ei haw Khrista ah ginna a la nga masate hi a lopina pâkna I hung hi theina ding un.

¹³ Ama ah chun nang uh le, thutak thu, la hukhinnau chanchinpha chu la het ua, la gin nung un, ama Thagau Thiangtho tiamsa ah chun tepte’ la hitau hi.

¹⁴ Zia chu ama lopina pâkna ding ah a chawksa, ama â te ngei tatdawna chu a bukim masang sia, ama golua dingte khâmlawkna chu ahi.

Paul Pauchapna

¹⁵ Lalpa Jesu ah la ginnau leh, mi thiangthote zosia chung ah hepina la latsak danteu ka la het ah kipat in,

¹⁶ ka pauchapnate ah chun hun hezing in, nangmau ziakin kipak thu ka gen zing hi.

¹⁷ I Lalpau Jesu Khrista Pathian, lopina Pa chu, ama hetna lam thu ah, pilna leh hiatsakna thagau a piak theina dingin.

¹⁸ Chutia, la lungthim mitteu chu hi’vâk a hung hi ah, la hettheina ding un, ama kona kinepnate, mi thiangthote golua ding a lopi dante,

¹⁹ chuleh, ama gingcha ei haw ah a thilhitheina te’ gual lo, a hatna lopi sep dan gual jel ah,

²⁰ Khrista ah a sep zaw tâk, chutia, ama mithi lak ah kipat kaitho ah, van mun ah te a chang lam ah chutsak ah;

²¹ lalnate, thuneinate, thilhitheinate, vaihawmna zosia chung leh, tu’ khawvel bep hilo ah, khawvel hung tung ding nangawn ah,

²² ama’n bangkim a keng nuai ah koi in, ama chu bangkim chung ah kochuam luchang in a siam a;

²³ zia kochuam chu a taksa ahi’n, ama chu bangkim ah bangkim sungdimpa bukimna chu ahi.