DANIAL 9 - PATHIAN LEKHABU THIANGTHO (BSI)

A Mipite â Ding Ah Danial Pauchapna

¹ Ahasueras chapa Darius, Mede mi chu Kaldaite gam zosia chung ah leng ah a hung pan,

² a lal kum khatna chun, keima Danial in Lekhabu thiangtho ah jawlnei Jeremiah kiang ah Lalpa thu ah, Jerusalem khua kum sawmsagi sung suksiat ah um ding ahi, kiti guitunna ding thu chu ka muchian ta’n.

³ Ziaphatchun, anngawl ah saidip puan sil ah vut lak ah kitung in, Lalpa lam nga’n pauchapna leh dotpiakna ka nei ta’n.

⁴ Lalpa ka Pathian kiang ah gitlo thupha chawi in, zia gual hin ka pauchap a: Aw Lalpa, Pathian thupi leh lau um, nangma hun hepi ah la thupiak jawmte chung ah thuthung leh ja’ngaina vopzingpa,

⁵ ka gilo zo tau ah, ka la bawl khial zo tau in, nunsia tak ah um in ka la hel zo tau a; la thupiak leh la vaihawmnate ah kipat in ka la pêt mang zo tau hi.

⁶ Ka lengteu leh ka milian milalteu, ka pu leh pateu leh ka gam ua mipi zosia kiang ah la min ah thugente, la suak jawlneite thugen ka la ngaisak ta puau hi.

⁷ Aw Lalpa, nang vang la dik in, kei haw vang tu’ni ka um gual mau in, Judah mipite hileh, Jerusalem ah chêngte hileh, Israel mipi zosia hileh, a nai leh a gamla um, a gitlonau ziak ah la nawjakte a chênnau mun chiat un jachat um tak ah sukmualpho in ka um zo tau hi.

⁸ Aw Lalpa, la chung ah thil ka la bawlkhial tâk ziak un, kei haw leh ka lalteu, ka milian milalteu leh, ka pu leh pateu zosia chung ah mualpho’na huaisia tak a tung ta ahi.

⁹ Lalpa I Pathian uh vang ja’ngaina dim leh ngaidam zo zing ahi; ama chung in a la hel tamaleu hin,

¹⁰ a suak jawlneite mang ah I zui ding uh a dan koite chu zui lo in, Lalpa I Pathian uh aw chu I la mang ta’puau hi.

¹¹ Israel mite zosia’n la dan chu bawtsia zo ta’n, a hilo lam in ka kiheimang zo tau ah, la aw ka ngai nuam ta puau hi. Chuleh, la chung ah ka la gitlo tâk ziak un, Pathian suak Mosi dan lekhabu ah kizik, hânsia leh kipau tiamna zosia ka chung un but khum in ka um zo tau hi.

¹² Chuleh, kei haw thiamlona leh ka chung ua vaihawmte thiamlo’na thu a la gen kha, ka chung ua siatna huaisia tak tunsak in, a thugente chu a sudet ta’n; Jerusalem chung ah siatna tung tawhbang hi van nuai pumpi kuama dang chung ah bawl khâk hi nai lo ahi.

¹³ Mosi dan lekhabu a kizik gual gual in, zia thil phalo zosia hi ka chung un a tung tai. Ka thulim lona teu kiheisan ah, ama dikna lampi ka zuitheina ding un, Lalpa ka Pathian uh doisakna hawl in ka pauchap nai diak puau a.

¹⁴ Tichun, ka chung ua thil phalo a hung tun masangsia a la entha zing hi. Lalpa ka Pathian uh vang a thilbawl zosia ah dik suak a hisiat tawh; ama aw ka la ngaisak ta paw’ngal un.

¹⁵ Tu’hin, aw Lalpa ka Pathian uh, khut hât tak ah Aigupta gam ah kipat la mite puidok ah, tu’ni tiang ah minthang tak ah umpa ka gilo tau in, nunsia tak in ka la bawl zo tau hi.

¹⁶ Aw Lalpa, dik tak ah thil la bawlna kineppi in, la lungnatna leh la hachangthakna chu la khawpi Jerusalem, la tâng thiangtho ah kipat ladok dingin ka ni la hi; keimau gitlo ziak leh ka pu leh pateu thulimlo’na ziakin, Jerusalem leh la mite hi ka kîmvêl ua mite zosia gensiat leh nuisan in ka um zo tau hi.

¹⁷ Ziaziakchun, tu’hin aw ka Pathian uh, la suakpa pauchapna leh dotna hi ngaitha’n la, nangma Lalpa min ziakin nutsia ah umsa la mun thiangtho hi tungding kit ta’n.

¹⁸ Aw ka Pathian, la bildaw inla, ei ngaitha’n. La mit hak inla, ka chung ua siatna tung leh, la min ah kiphuak khawpi hi hun en ta’n. Ka diknau suang hilo in, la ja’ngaina nasat ziak zaw’n la man ka hun don uh ahi.

¹⁹ Aw Lalpa, ngai inla; Aw Lalpa ngaidam in; aw Lalpa ngaitha’n la, khawdâng lo in hun bawl ngal in! Aw ka Pathian, nangma min ziak in, khawpi leh mipite chu nangma min ah kiminlaw ahi ngal un! ti in.

Hapta Sawmsagi Chu

²⁰ Pauchap ah, ka gitlo’na leh ka mipi Israelte gitlona thupha chawi ah, Lalpa ka Pathian âng ah, ka Pathian tâng thiangtho ah ding ah dotpiakna bawl a,

²¹ ka pauchapna thu ka gen zing lai in, nitâk lam kithoi hun in, mu’lawkna ka la musa, mi pakhat Gabriel chu, kin tak ah hung leng in ka kiang a hung tung ta’n.

²² Ama chu a hung ah ka kiang in, Danial, tu’hin la kiang ah pilna leh hiatthiamna pia ding ah hung ka hi.

²³ Thil don ah la pauchap tîl ah kipat khan thumal kam khat a hung pawt, zia chu hiatsak ding ah hung ka hi; nang chu nasa tak ah doichuam la hi. Ziaziakchun, a thu chu ngaitua inla, kilâkna chu hechian ta’n!

²⁴ Bawsiatna sukbutinna ding, gitlo’na sukbeina ding, bawlkhialna thoidamna ding, kumtuang ah dikna lâklutna ding, kilâkna leh thugenlawkna tepte’na ding leh mun thiangtho pen sathaunu’na ding in, la mipite leh la khawpi thiangtho chung ah hapta sawmsagi sung guat ahi.

²⁵ Chutichun, Jerusalem tundin kit ah, sak thak kitna ding ah thupiak a pawt daw ah kipat sathaunu’ ah um, lal hung um tiang chu hapta sagi hi’ntin; chuleh, hapta sawmguk leh ni sung chu a kotzingte leh a kulbângte chu, hun buai um tak sung in sak kit hita’n a.

²⁶ Hapta sawmguk leh ni zaw leh sathaunu’ ah um chu pai thâk in um intin, bangma nei ta pua’n a; chuleh, a hung ding lal sepaite chun khawpi leh mun thiangtho chu susia’n au. A tawpna tuisânglet gual hi’ntin, a tawpna dingin kido’na hung um in a. Siatna huaisia tung ding chu guatsa ahi tai.

²⁷ Ama’n hapta khat sung â dingin mi tampi tawh thuthung siam in au; hapta kimkhat zaw leh, kithoina leh thillatte hi’tawp ta’n a; ziate mun ah chun thilbuak bawlpa chung ah gawtna tung ding ah guatsa chu but khum ahi masia’n, thilbuak ki’dak um tak hun bawl ta’n a, ti in.