DANIAL 6 - PATHIAN LEKHABU THIANGTHO (BSI)

Danial A Heksiatnau

¹ Darius in a gam pumpi, gambung za leh sawmni ah khen in, gambung tin chung ah vaihawm dingin mi za leh sawmni guat dingin lem a sa’n;

² ziate zosia chung ah gam pumpi vaihawmtu liante lak ah pang dingin, Danial tawh mi pathum a koi ah; lengpa chawldam tak ah a umtheina dingin, gambung tin ah vaihawmte chun a thuu chu zia mi pathumte kiang ah chun a tut sek un.

³ Danial in ngaituana thagau pha tak a nei ziakin, a vaihawmpi teni leh gambung tin ah vaihawmte zosia sâng ah, sep leh bawl bangkim ah chungchuang ahi’na a hi’lang pai ta’n; tichun, lengpa chun a lenggam pumpi vaihawm ding ah koi a gaw tai.

⁴ Tichun, a seppi te’ni leh gambung tin ah vaihawm pawlte chun, lenggam thu ah Danial demna ding a hawl tau a. Himaleh, ama chu mi ginum, sep leh bawl bangkim ah diktat leh thiangtho ahiziak in, a demna ding leh hêkna ding a mu zo puau a.

⁵ Zia mite chun, “Zia Danial hi vang Pathian tawh a kikâl thu lam ah a hilo ngal leh demna ding mu puai tiu,” a kitiu a.

⁶ Tichun, gam pumpi vaihawmte leh gambung tin chung ah vaihawm mite chu lengpa kiang in a hung tau a, a kiang in, “Aw lengpa Darius, damsawt in!

⁷ Gam zosia chung ah vaihawmte, gambung tin ah vaihawmte, danthiam mi zosia leh thudot mite zosia hin, lengpa’n thupuan khat bawl hen la, khau tak in mi a zui leh a zui lo hetchian hihen la; tichun, kuale nangma, Aw lengpa, ni sawmthum sung nangma hun ho lo ah mihing a hem, pathian a hem, a dang khat ho taphot chu sakeibaknei kul sung ah pai lut ziang ding hi hen.

⁸ Tu’ ma ma hin aw lengpa, thupiak chu hidet ziang inla, lekha kizik ah hin la suainam ziang in; tichun, Mede leh Persiate dan sukdanglam theilo ahi dungzui ah sukdanglam thei hi talo dingin,” a tiu a.

⁹ Ziaziakchun, Lengpa Darius in zia lekha leh thupiak ah chun a suai a nam ngal tai.

Sakeibaknei Kulsung Ah Danial A Pailutnau

¹⁰ Lekha kizik chu lengpa’n lem a sakpi’na’n a min a zik tai ti Danial in he maleh, a In ah chia to kit in, a Insawng chung lam ah tukvan Jerusalem lam nga’ hong in, a bawl ngai gual in, ni khat ah thumvei khiangkho ah Pathian kiang ah pauchap in, a min chu a pâk zing sek a.

¹¹ Ama hêkna ding hawlte chu a hung un, a Pathian kiang ah ja’ngaina don ah Danial pauchap lai tak a hung mu tau a.

¹² Tichun, lengpa kiang in a hung un, a thupiak lekha kizik thu chu a hung gen tau a: “Aw lengpa! Ni sawmthum sung chu kua’n le pathian hileh, mihing hileh, aw lengpa, nang hilo ho taphot chu sakeibaknei kul sung ah pai lut ding ahi ti ah thupiak lekha kha la zik ta hilo a hem?” ti’n a dong tau a. Lengpa chun, “Mede leh Persiate dan sukdanglam thei tâk lo ahi dungzui in, thupiak chu zui ding him ahi,” ti’n a dawnhu tai.

¹³ Chuleh, lengpa kiang in, “Aw lengpa, Judai gam ah kipat sal ah mat Danial chun, la thupiak a ngaisak pua’n, la thupuan ah la min zikna khale ja’ lo in, ni khat ah thumvei a pauchap zing hi,” a tiu a.

¹⁴ Zia gual ah a hêknau chu a het phat in, lengpa chu a lungkham ma ma a. Danial a hukdaw theina ding dan sûn nitum in a ngaitua tai.

¹⁵ Ziaphatchun, a hêkte chu lengpa kiang ah hung in, “Aw lengpa, Mede leh Persiate dan thupiak leh, lengpa thupiaksa chu sukdanglam thei hi talo ahi ti hezing in,” a hung tiu a.

¹⁶ Tichun, lengpa’n thu a hun pia ta; Danial chu a kiang ah hun pui in, Sakeibaknei kul sung ah chun a sep lut tau a. Lengpa chun Danial kiang in, “Ginum tak ah a na la sep piak, la Pathian chun hun hukdok ta hen!” a tia.

¹⁷ Suang pakhat a hun lau ah, sakeibaknei kul kotkhak sit in a mang tau a; lengpa chun a min namna khutsebi zia suang chu tepte’ in, a milian leh lalte’n le a min namnau khutsebi ah tepte’ in, Danial chungchâng thu ah bangma sukdanglam thei lo dingin a bawl tau a.

¹⁸ Tichun, lengpa a Inpi’n a chia ah, zia jan chu an a ngawl tai; a an nêk ding a choi piak puau ah, a i-mu thei him him ta puai.

Sakeibaknei Lak ah Kipat Danial Hukdawna

¹⁹ Lengpa chu jingkal matak ah tho in, sakeibaknei kul lam ah kin tak in a chia a.

²⁰ Danial umna sakeibaknei kul a hun nai phatin, lungngai tak in Danial a hun ko ah: “Aw Danial Pathian suakpa, ginum tak ah a na la sep, la Pathian chun sakeibaknei lak ah kipat in a hun hukdok na em?” a hun tia.

²¹ Tichun, Danial in, “Aw lengpa, damsawt in!

²² Ka Pathian in a vansawlchâk a hun sawl ah, sakeibaknei kam chu a chi’sak ah, ei suna lo uh ahi; a ma-âng ah bangma bawlkhial ka nei lo ziakin; chuleh, aw lengpa, la ma-âng inle bangma bawlkhial ka nei puai,” ti’n a hun dawnhu tai.

²³ Ziaphatchun, lengpa a kipak ma ma ziang ah, kul sung ah kipat Danial ladok dingin thu a pia tai. Tichun, Danial kul sung ah kipat in a ladok tau ah, a Pathian gin ziakin liamna neuchale a nei puai.

²⁴ Lengpa thupiak in, Danial hêk ah pangte zosia kha, a jiteu, a chateu tawh sakeibaknei kul sung in a pai lut tau a. Kul sung ah tual chu man lo in, sakeibakneite chun a guu leh a chângteu a puaitel zo tau hi.

²⁵ Ziaphatchun, Lengpa Darius in, khawvel pumpi mi zosia, nam zosia leh pau zosiate kiang in lekha a zik ta’n: La lak un vangphatna sukpun in um ta hen!

²⁶ Thupiak ka bawl tai: Ka lenggam ah mi zosia’n Danial Pathian chu lau in, kithing tau hen: Ama chu Pathian hing, kumtuang dai ahi ngal a. A lenggam suksiat ni um pua’n tin, a lalna’n tawp a nei puai.

²⁷ Ama’n hukdok in a humbit ah, lei leh van ah tepte’na leh thilmakte a bawl ah; sakeibaknei thilhitheina kipat in Danial a hukdok ta’ngal ah, a ti tai.

²⁸ Tichun, zia Danial chu Darius vaihawm sungsia leh, Persia Lengpa Kuras vaihawm tiang in nuamsa tak in a um den tai.