DANIAL 5 - PATHIAN LEKHABU THIANGTHO (BSI)

Belshazzar Luaithe’na

¹ Lengpa Belshazzar in a milian leh lalte sang khat â dingin luaithena thupi tak a siam ah, mi sangkhatte chu tawh zu a dawn khawm tau a.

² Zu a kham phatin, Belshazzar in a pa Nebukadnezar in, Jerusalem tempul ah kipat sana leh dangka ah kisiam ûm leh bêlte chu hun la’, a milian leh lalte tawh, a jiteu, a thâikêmteu zosia tawh zu dawnna mat ding ah hun choi dingin thu a pia.

³ Tichun, Jerusalem ah Pathian In, tempul ah sana leh dangka ûm leh bêlte chu a hun la tau a; lengpa tawh a milian leh lalte, a jiteu leh a thâikêmteu chun ziate ah chun zu a dawn tau a.

⁴ Zu a dawn phat un, sana, dangka, sum-eng, thîk, thing leh suang ah kisiam pathiante chu a pakcha tau a.

Bâng Ah Khut In Lekha A Hun Zik

⁵ Zia hun lai tak ah chun, mihing khutbom a hung kilang ah, lengpa Inpi sung ah thaumei tunna kiang ah bâng chu a hun zik ta’n. Lengpa’n zia lekha hun zikna khut chu a en zing a.

⁶ Lengpa mêl chu a hung dâng ta’n, a lau ma ma ziang tai. A pum in a kithing ah, a khûp a kitattua ta mai a.

⁷ Dawithiamte, Kaldaite leh âisân thiamte hun ko dingin a kikojak ta’n; chun, Babulon ah mipilte kiang ah chun lengpa’n: “Kuale zia lekha kizik hi sim ah, ei hilchian piak thei taphot chu, puansandup silsak ah, a ngawng ah sana khi awsak hi’ntin; chuleh, ka lenggam ah vaihawm a pathumna pansak ding ka hi,” ti’n a gen a.

⁸ Tichun, lengpa mipil zosia chu a hung khawm tau a; himaleh, zia lekha kizik sim thei leh lengpa kiang ah hilchian piak thei kuama a um puau hi.

⁹ Tichun, Lengpa Belshazzar chu lau ma ma’n, a mai a dâng in, a milian leh lalte le a lungdong zo tau a.

¹⁰ Lengnu’n, a milian leh lalte holimna a het phat in, luaithe’na Indan ah chun a valût a. Lengnu chun, “Aw Lengpa, damsawt in! La ngaituana’n hun sulau ki’hen la, la mêlle dâng ziang ki’hen.

¹¹ La lenggam sung ah hin pathian thiangthote thagau chênna mi pakhat a um hi. La pa dam lai ah khan, ama chun pathiante gual ah thil kisêlgu hiattheina, hetdik theina leh pilna a nei hi. La pa Nebukadnezar in ama chu mitvaidawi thiamte, âisân thiamte, Kaldaite leh dawithiamte zosia chung ah hotu’n a la siam a;

¹² ama Danial, Lengpa khan Belteshazzar a sak chun, thagau pha, hetna, mang hilchet theina, thugil hilchian theina leh thu haksate hetna a um hi. Tu’hin Danial chu ko unla, ama’n hun hilchian piak ding ahi,” a vatia.

Danial In Lekha Kizik Hilchian

¹³ Ziaphatchun, lengpa kiang in Danial a hun pui lût tau a. Lengpa’n Danial kiang in, “Judai gam ah leng, Judate lak ah kipat ah sal ah a puite lakah pang, Danial chu nangma la hi em?

¹⁴ Nangma ah hin pathiante thagau chu a um in, thugûk hiattheina, thil hiattheina leh pilna mak tak la nei hi ti ka la hia’n.

¹⁵ Zia lekha kizik hi sim ah, ei hilchian piak dingin, mipilte leh dawithiamte ka kiang in a hun pui khawm un; himaleh, zia thu hilchetna hi ei gen piak thei puau hi.

¹⁶ Himaleh, nang in thu buai um tak tak te la hechian in, la hilchian thei hi ti ka la hia’i. Tu’hin zia lekha kizik hi la sim thei ah, a hilchianna lei gen piak thei chun, puan sandup hun silsak in, sana khi’ awsak hi’n la tin, lenggam ah vaihawm lian pathumna hiding la hi,” a tia.

¹⁷ Ziaphatchun, Danial in lengpa chu zia gual hin a dawnhu a: “La thilpiakte chu nangma chang in; ahiloleh, la kipakmante chu midang kiang in pia zaw ta’n! Banghileh, zia lekha chu lengpa â ding ah simdaw piak in, a hilchetna le hil ing ka,” a tia.

¹⁸ Aw lengpa, Chungnung pen ah Pathian in, la pa Nebukadnezar kiang in lalna, thupi’na, minthanna leh ja’umna a la pia’i.

¹⁹ Zia gual ah lopina a piak ziak ah chun, mi zosia, nam zosia leh pau zosia’n, ama chu lau in a kithing sek ui. Ama’n a nop nop hawi in, a ja’bawl nopte chu ja’na a pia’n, a koi niam nopte chu a koi niam ngal hi.

²⁰ Himaleh, a lungthim ah kisaktheina a hun nei ah, ki-uansak tak ah a lungthim a hikhau phatin, a lalchutpha’ kipat pai thâk in a um ta’n, a lopina chule lâkpiak ahi tai.

²¹ Mihing lak ah nawdaw ah um in, ganchate ngaituana lungthim piak in a um tai. Chungnung pen ah Pathian in mihingte lenggam chung in vai a hawm in, a nop nop a tungding sek hi, ti a hun hetdaw masangsia, gam sabiltungte tawh kipawl in, bawngchal gual in hampa’n a kivak tai.

²² Chun, a chapa, nangma Belshazzar in, zia zosia chu la hiatsapi’n le la lungthim la kheniam nuam nai diak pua’n;

²³ van ah Lalpa kãl in la kikoisang ta’ngal a! A tempul ah ûm leh bêlte chu la kiang in a hun lau ah, nang leh la milian leh lalte, la jite leh la thâikmte’n zu dawnna’n la mang tau a. Dangka leh sana, sum-eng, thîk, thing leh suang ah kisiam, bangma muthei lo, hethei lo pathiante chu la ho zaw tau a; himaleh, la hatna umna leh la lampi zosia kingakna Pathian chu la chawisâng nuam puai.

²⁴ Tichun, Pathian ah kipat in zia khutbom hi hung kilang in, zia lekha hi a hun zik tai.

²⁵ Chuleh, zik ah um lekha thu chu zia hi ahi: MENE, MENE, TEKEL leh PARSIN, ti ahi.

²⁶ A hilchianna chu zia gual hi ahi: MENE chu, Pathian in la lenggam khanggui ding a tiam chu a tung ta’n, a hitawp hun a tung tai;

²⁷ TEKEL chu, Bûkna ah bûk in la um in, la ting zo ta puai;

²⁸ PERES chu, la lenggam chu lâkpiak a hita’n, Mede tawh Persiate kiang ah piak ahi tai, ti’n a hilchian piak tai.

²⁹ Ziaphat chun, Belshazzar in Danial chu puan sandup silsak in, sana khi hun awsak un ti’n thu a pia; chuleh, a gam sung ah vaihawm liante lak ah a pathumna pang dinginle thupuan a bawl tai.

³⁰ Zia jan ma ma chun, Lengpa Belshazzar chu tha in a um tai.

³¹ Chun, Medeste Lengpa Darius in lenggam chu a la tai; ama chu kum sawmguk leh ni ah upa ahi.