DANIAL 4 - PATHIAN LEKHABU THIANGTHO (BSI)

Nebukadnezar In Mang A Nei Kitna

¹ Lengpa Nebukadnezar in khawvel pumpi ah mi zosia, nam zosia leh pau zosia kiang in: Nasa tak ah maljawl in um tau in!

² Chungnung pen ah Pathian in, kei â ding ah tepte’na leh thil kidang tak a bawlte chu ka ngaitua in ka kipak hi.

³ A tepte’na bawlte chu a lamdang in, a thilmak bawlte chu a hatna e! A lenggam chun kumtuang a dai in, a lalna chu khang zosia â ding ahi.

⁴ Keima, Nebukadnezar chu ka In sung ah nuamsa tak in ka chêng ah, ka lal In sung ah nei leh lam nuam tak ah chên in ka um a.

⁵ Ei sudîpchâk ma ma mang khat ka nei in; ka lupna chung ah ka ngaituanate leh, ka luchang in kilâkna a mute chun ei sulau ma ma tai.

⁶ Tichun, Babulon ah mipil zosia ko khawm ah, ka mang ei hilchian piak dingin thupuan ka bawl ta’n.

⁷ Tichun, mitvaidawi thiamte, Kaldaite leh âisân thiamte chu a hung khawm un, ka mang chu a kiang un ka hil ah; himaleh, a hilchian thei a um puau hi.

⁸ A tawp in Danial, ama chu ka pathian minsak ah Belteshazzar kiti chu a hung in, ama ah chun pathiante thagau thiangtho a um ah; a kiang in ka mang chu ka hil ta’n.

⁹ “Aw Belteshazzar, mitvaidawi thiamte hotupa, nangma ah chun pathiante thagau thiangtho a chêng hi ti ka hia’n, nang â dingin thugûk hetdaw haksa a um puai. Ka mang hi ngai inla, ei hilchian piak ngal in:

¹⁰ ‘Ka lupna chung ah kilâkna ka mu chu: Lei lailung ah thing khat ka mu’n, a sâng ma ma hi.

¹¹ Thing chu a khang ma ma in, a detdo hi; a jik in van a supha’n, kawlkil tiang ah mi zosia’n a mu phau hi.

¹² A duate chu a mêlpha’n, a gate chu a tam ma ma in, mitin nêk khop a ting hi. A Lîm nuai ah chun gamsa chitin a um un, chunglêng vachate’n a bâk ah bû a sia ui; hinna nei zosia’n a gate chu a neu hi,’ ti in.

¹³ Ka lupna lum zing ah ka luchang in kilâkna a mute chu ka et zing lai in, vengtu thiangtho tak khat van ah kipat hung suk ka mu hen.

¹⁴ Ama chu ngai tak ah kiko in: ‘Thing chu phûk inla, a bâkte chu heu in; a duate chu jut thiang inla, a gate chu thejak in. A dailîm ah gamsate leh, a bâk ah vachate chule jam mang tau hen.

¹⁵ Ahi’n la, hamhing no lak ah chun a bulsum leh, a zung lei ah umte chu, thîk leh sum-eng in hên ta’n. Van daichîm in chapno hen la, gamlak ah gamsate tawh hampa lak in bual khawm tau hen.

¹⁶ A mihing lungthim chu, gamsate lungthim in then piak hi hen. Zia gual chun kum sagi um hen.

¹⁷ Zia thu hi mi thiangthote thupukna dungzui ah, vêngtute thupuan chu ahi; tichun, Hatchungnung pen in, mihingte lenggam zosia chung in thu a nei hi; ama’n a nop tapote â dingin lenggam a pia, mi niampente chule a chung un a koi sek hi, ti hi mi zosia’n a hiattheina ding un,’ ti’n a hung kiko tai.

¹⁸ Zia chu keima, Lengpa Nebukadnezar mang chu ahi. Tu’hin, nang Belteshazzar, ei hilchian piak in; ka lenggam ah mipilte zosia a hilchian thei a um paw’ngal un. Nangma ah pathiante thagau thiangtho a um ziakin, la hilchian thei ngal a,” ti’n a gen a.

Danial In Mang A Hilchianna

¹⁹ Ziaphatchun, Danial, Belteshazzar kiti chu, lungkham tak in chomkhat a um a. A ngaituanate chun a sudîpchâk ta’n. Lengpa chun, “Belteshazzar mang hileh, a hilchianna chun hun subuai kiu hen,” a tia. Belteshazzar in, “Ka lalpa, mang chu nang hun mudate chung ah tung hen la, a hilchianna chule la mêlmate chung in tung ta hen!” ti’n a dawnhu a.

²⁰ La thing mu, hung khang ah, det ma ma, a jik in van supha hial ah sâng, khawvel mun zosia kipat mu’thei,

²¹ a dua mêlpha ma ma leh a ga tam ma ma ah, hinna nei zosia nêk ding pia’, gamsa chitin in a lîm nuai a bêl uh, a bâkte ah chunglêng vachate chênna chu;

²² aw lengpa, zia thing chu nangma la hi! La hung khanglian ah, la hat ma ma tai. La lopina sukpun ah um in van a supha hial ta’n, la lalna’nle kawlkîmvêl tiang a huap tai.

²³ Chuleh, van ah kipat vêngtu thiangtho in, “Thing chu phûk inla hi’sia’n; himaleh, lei ah a bulsum leh a zungte chu vang gamlak hampa hing lak ah thîk leh sum-eng in hên in; tichun, van dâichîm in chapno hen la, a chung ah hun sagi a kiak masia, gamlak ah gamsate lak in um ta hen,” ti ah hun gen lengpa’n la mu chu–

²⁴ Aw lengpa, Hat Chungnung chun ka lalpa, lengpa chung ah thil hung tungding ah thupuan a bawl thu, hilchianna chu zia hi ahi:

²⁵ Nangma chu mihingte lak ah kipat nawdaw in um in la tin, gamsate lak in hung chêng ta’n la. Chuleh, Hat Chungnung in mihingte lenggam chung in vai a hawm in, a nop nop kiang in lenggam a pesek hi, ti la hun hetdaw masang sia, hun sagi sung chu bawngchalte gual in hampa nêksak ah um in, van dâichîm in hun chapzing ta’n a.

²⁶ Chuleh, thingbul tawh a zung nusia ding ah thupiak dungzui in, Van ah umpa chu a Chungnung pen hi ti la hun hetdaw kit phat leh, la lenggam chu nang â ding ah phudet piak kit hi ta’n a.

²⁷ Ziaziakchun, aw lengpa, ka hun thuhilna hi pom mai ta’n: La gitlona haisan in thil dik bawl in; la bawsiatnate haisan in, tawden ah umte chu lainat ta’n; chutileh, nuamsa tak ah la khawsakna hi zopsau piak hiding la hi, ti’n a dawnhu a.

Nebukadnezar Paithâkna

²⁸ Zia thil zosia chu Lengpa Nebukadnezar chung in a hung guitung tai.

²⁹ Tha sawm leh ni a bei nung in, Babulon lengpa chu Inpi chung ah a vâkvel lai in,

³⁰ lengpa chun a lungthim in, “Zia Babulon khaw lopi tak hi, lengpa chênna ding ah ka thahâtna leh ka lalna thupi tak suklatna ding ah ka siamdaw hilo a hem?” ti’n a ngaitua a.

³¹ Zia thu chu gen zo man lo in, van ah kipat in aw a hung gi’n: “Aw Lengpa Nebukadnezar, nangma ah kipat in la lenggam chu lâkmang ahi tai!

³² Mihingte lak ah kipat in nawdaw in um in la tin, gamlak ah ganchate tawh tat khawmsak hiding la hi. Hat Chungnung in mihingte lenggam zosia chung in vai a hawm in; a nop nopte kiang in lenggam a piak sek ahi, ti la hun hetdaw kit masangsia’n, hun sagi sung bawngchalte gual ah hampa nêksak ah hung um ding la hi tai,” a hun tia.

³³ Zia thu chu phutlo in Nebukadnezar chung in a hung guitung ta mai a. Mihingte lak ah kipat nawdaw in a um ta’n, bawngchalte gual in hampa a ne’n, van dâichîm in a taksa a chap khum ah, a samte chu mupi mul gual ah sau in, a tinte chule vacha tin gual in a hung um tai.

Nebukadnezar In Pathian A Pakchakna

³⁴ A hunte chu a bei phatin, keima, Nebukadnezar in van lam ka etto ah, ngaituana pangai ka hun nei kit phatin; Hat Chungnung chu ka pâkcha tai. Ama kumtuang ah hingzingpa chu pâk in ka chawihoi ta’n: A lalna’n kumtuang a dai in, a lenggam in khang zosia a dai hi;

³⁵ lei chung ah chêng zosia hi bangmalo mai a hiu in, van ah um zosia chung leh lei ah chêng zosiate chung hin, ama’n a nop dan dan ah a bawl mai ahi. Kuama’n a khut chu a tutâng thei pua’n, a kiang inle, Bang ding ah la chuti bawl a hem? tithei le a um puau hi, ti in.

³⁶ Ziaphatchun, ngaituana pangai ka hun nei kit tai; tichun, ka lenggam lopina dingin, ka lopina leh ka thupi’na zosia chu piak kit in ka hung um tai. Ka thudot sekte leh ka milian milalte chun ei hung hawldok tau a; tichun, ka lenggam chung ah tundin kit in ka hung um a, lopina thupi zaw sêm piakbe in ka um tai.

³⁷ Tichun, keima Nebukadnezar in van ah Lalpa chu pâk ah, chawihoi in ja’na ka pia tai: “A thilbawlte chu a dik in, a lampite le vaihawmna dik ahi ngal a; chuleh, kisathei tak ah umte chu a hi’niam thei hi,” ka ti tai.