DANIAL 11 - PATHIAN LEKHABU THIANGTHO (BSI)

¹ Chuleh, kei chu, Media mi Darius, lal kum khatna’n, ama panpi ding leh hi’hât dingin ka vaum tai.

² Tu’hin, la kiang ah thudik hil ta’ng ka. Persia lenggam ah Leng dang pathum hung dingdok nalai in au. A lak ua a pali’na chu a dang cheng sâng in hausa zaw’n tin, a hausakna ziak ah hi’hat a hizaw phat leh, Grik lenggam do dingin mi zosia hun choktho in a.

³ Ziaphat chuleh, gâlhat tak lal khat hung dingdok ta’n tin, ama chun lenggam lian tak chung ah vaihawm in, a nop dan dan in bangkim bawl ta’n a.

⁴ Himaleh, a thilhitheina a pun zing lai in, a lenggam kek jak intin, a suan leh pâkte kiang ah hilo, a thuneina a vaihawm dan le hi diak lo in, van hui palite lak ah hop jak in um ta’n ah; a lenggam chu bawdaw ah um in, ziate bep hilo midangte kiang ah piak hita’n a.

⁵ Simlam ah leng chu hung hat deu deu intin, a sepai hotulian pakhat chu ama sâng in hung hatzaw’n tin, ama lenggam sâng ah lianzaw ah vai hun hawm ta’n a.

⁶ Kum bang jat a hem zaw nung in kizop khawm intiu in, simlam ah leng chanu chu mallam ah leng chanu kiang ah kizop khawmna sudet ding in chia in a. Himaleh, a thuneina chu chang zing pua’n tin, a suante’nle daisawt diak pua’n a. Ama chu, a suanteu tawh, a cha leh ama panpi zosia nutsia in um ta’n au.

⁷ Ziaphat chuleh, ama mun ah chun a suante lak ah kipat in bâk pakhat hung dingdok in a. Ama chun sepaite do intin, mallam lengpa kulpi’ lût in, do in, zo ngal in a.

⁸ A ûm leh bêl uh dangka leh sana kisiam zosia, a milimteu leh a pathianteu natiang gâl lâk in, Aigupta lam ah pawmang in au. Mallam lengpa a do chu kum bang jat a hem chawl ta’n a;

⁹ chuleh, simlam leng chun mallam lal hun do intin; himaleh, ama gam lam ah naw kit in um ta’n a.

¹⁰ A chapate chun do pek intiu in, sepai hon tam tak pui khawm in, tuisuagiat gual ah malam zuan in, a mêlmateu kulpi tiang in vado in au.

¹¹ Simlam lengpa chu lungna ma ma in hung kuandok intin, mallam lengpa do ta’n tin, sepai tam tak chung ah thunei himaleh, mallam lal chun zo ta’n a.

¹² Mi tam tak sal ah a pui mang lai in, a lungthim in kiletsak ma ma intin; chuleh, a mun sâng sawm sang za tawden ta’n a; himaleh, gual zo zing diak pua’n a.

¹³ Mallam lengpa chun sepai tam zaw diak, a masa sâng ah tam zaw hun siam intin, kum bang jat a hem zaw in hung do kit têi in a; sepai hon tam tak tawh matchâk nasa tak in hun zathuap ta’n a.

¹⁴ Ziaphat chuleh, mi tam tak simlam lal do dingin hung kuandok in au. La mite lak ah thununglote chule kilâkna hi’bukim ding in hung kuandok in au; himaleh, lawsam in au.

¹⁵ Chuleh, mallam lal hung kuan in panmun siam intin, khawpi kul det tak chu la ta’n a. Tichun, mallam sepaite pang zo ta pua’n tiu in, a sepai doichuamteu le pang zo diak lo ding a hiu; mêlma do-na ding ah tha leh zung nei um talo ding ahi ziak un.

¹⁶ Amau do ah hung kuante chun a nop nop un bawl ta’n tiu in, amau dal zo ding kuama um ta pua’n au. Gam mêlpha ah chun mun chang ta’n tiu in, a leng un ama thu’n um ta’n au.

¹⁷ Chuleh, a lenggam pumpi hatna tawh gâlkuan ding chu lungtup ah nei intin, kichamna ding thuthungle siam intin, zia chu bawl zui ngal in a. Lenggam chu a zaw theina dingin a kichenpi ding numei pia’n a; himaleh, lawting pua’n tin, ama â ding ah phatchuamna um diak pua’n a.

¹⁸ Ziazaw chuleh, tuisuagiat pang lam ngat intin, tam tak la’n a. Himaleh, hotu lian pakhat in a mi simmawna chu hitawp in ah; a mi simmawna chu ama chung ma ma chu kit ta’n a.

¹⁹ Ziaphatchun, ama gam ngei ah kulpite lam chu ngat intin; ahi’n la, kisui in, kilîk intin, hawl mu zaw hita pua’n a.

²⁰ Ziaphat chuleh, ama mun ah lenggam lopina ding ah mi khat kisawl chu hung dingdok ta’n a; ahi’n la, ni tamlo nung in, lungnatna ziak leh kido’na ziak hikhel lo in, ama chu suksiat in um ta’n a.

²¹ Ama mun ah mi khat simmaw um tak, a chung ah le lenggam jana piak ah um kha lo chu hung dingdok intin; hetkhol lo in hung intin, dawhathiam in lenggam chu chang ta’n a.

²² Ama âng ah sepai zosia phiatnâm ah um in, thuthung siampa lal nasan hi’siat dim dem hi’n au.

²³ Chun, ama tawh pankhawmna ding ah thuthung siam zaw ahi’phatin, lepchia tak in hung um intin, mi tawmcha, pawl neucha tawh hat tak in hung um in au.

²⁴ Hetkhol lo in a gam sung ah a phatna pen chu hun do intin, a pu a pate’n le a la bawl khâk ngailo uh bawl in, gâllâk thilte, mi â a lâkpiakteu leh hausakna nasa tak kilâk ta’n au. Khawpi detdote lâk ding dan guanggal intin, ahi’n la, hun sawt dai pua’n a.

²⁵ Sepai tam tak tawh simlam lal do dingin a thilhitheina leh a hânsanna chu choktho intin; simlam lal chunle sepai nasa tak ah tam zaw mang in hun do ta’n a. Himaleh, lengpa annete ma ma’n a siatna ding a gûk ah a ngaitua ziak un lawting diak pua’n a.

²⁶ Ama zo intiu in, a sepaite naw mang in, a lak ua tam tak thalup in um ding a hiu.

²⁷ Lal panite hi thil phalo ngen bawl gua lunggêl zing a hiu a, dawkan khat in zuau thu gen khawm in au. Himaleh, lawting pua’n au, a tawpna ding uh guatsa ahi ngal a.

²⁸ Hausakna nasa tak tawh a gam lam in kile’kit ta’n tin, a lungthim tak vang thuthung thiangtho do’na hizing in a. Ama lungtup gual gual in bawl intin, ama gam ma ma kile’kit in a.

²⁹ A hun kiguatsa ah chun kile’kit intin, simlam ah hung in a; himaleh, tu’chung ah hin tu’ma lam ah gual khan um ta pua’n a.

³⁰ Ama do ding ah Kittim longte hung ding ahiziak in lungthuai intin, kile’kit ta’n a. A hachangthak ma ma intin, thuthung thiangtho do ta’n a. Hung kihei kit ta’n tin, thuthung thiangtho nusiate chu jawl ta’n a.

³¹ A sepai sawldokte chun tempul leh kul chu lua in, subuak in au. Nisi’n ah hâlmang kithoina chu subei in, hi’buakpa ki’dak um tak chu tungding ta’n a.

³² Chuleh, thuthung kãl ah gilo tak ah bawlte chu dawha thiam in pui kawi intin; himaleh, a Pathian â ding ah ginumte chu det tak ah ding zing in, thil bawlthei in au.

³³ Mipite lak ah pilte chun mi tam tak hiat thiamsak in au; ahi’n, hun chomkhat zaw leh chemjam leh meikuang, saltânna leh gâl lâk in pûk ta’n au.

³⁴ A pûk phat ua leh a panpi ding um pua’n a; tichun, mi tam tak in dawha phalo nei in kizoppi ta’n au.

³⁵ A lak ua mipil khenkhatte chu hi’thiantho a hiu ah, thiangtho ah, buak kâi lo ah a umtheina ding un, hun tawpni a tun masang sia’n pûk ta’n au; a hunbî guat ah umsa a tun ma’n zalenna um ding ahi ngal a.

³⁶ Lengpa chun a nop dan dan in bawl in a. Ama leh ama kichawisang intin, pathian zosia sâng ah lianzaw’n kingai intin, pathiante Pathian demna’n tizat um tak tak gendok in a. A chung ah lungnatna tunna ding huntiam a tun masia lawting ma ma intin; ahi’n, a thil tuak ding chu pumpel him him pua’n a.

³⁷ A pu leh pate ho leh biak pathiante chu bangma’n ngai pua’n tin, numeite ngaisân chule bangma’n ngai pua’n a; pathian zosia sâng ah thupi zaw a kingai ziakin, pathian khat chale lau pua’n a.

³⁸ Ziate sâng ah chun kulpite pathian chu a ja zaw’n; a pu leh pate’n a la hetkhâk lo uh pathiante ja bawl intin, sana leh dangka, suang mantam leh thilpiak lûl tak takte chu pia’n jana bawl zaw’n a.

³⁹ Gam dang pathiante panpi’na kineppi in kul detdote chu do in a. Ama doisakte hihausa’n tin, mi tam tak chung ah vaihawm ding ah guat in, a gam chu a sep man ding un hop piak ta’n a.

Khawvel Tawpna Ding Huntiam Chu

⁴⁰ Hun tawp ding phat leh, simlam chun ama hun do ta’n a. Himaleh, mallam chun a kângtalaite, a sakolte leh a longte mang in chîmpei gual in ama do dingin kuandok ta’n a. Gam tin zo in, tuisânglet gual in paltheng pek ta’n a.

⁴¹ Gam mêlpha ah hung lût intin; a sîng a sangte that gam in a; himaleh, Edom, Moab leh Ammon mi tam zaw te chu a thilhitheina lak ah kipat suakcha ta’n au.

⁴² Gamtin do dingin a khut lâmdok intin, Aigupta gam chu vang suakcha pua’n a.

⁴³ Sana, dangka leh Aigupta hausakna go thil zosia chung ah vaihawm in pang ta’n tin; Libiate leh Ethiopiate’n a nung uh zui ta’n au.

⁴⁴ Himaleh, sualam leh mallam ah kipat thuthangte chun lau zing in tin, mi tam tak nuaichâk dingin hachangthak ma ma in kuandok in a.

⁴⁵ Tuisuagiat tawh, tâng thiangtho mêlpha tak kikâl in a lal In puanbûk jak ta’n a. Himaleh, a tawpna chu hung tung tho tho intin, kuama’n panpi pua’n au, a hun ti tai.