AMOS 9 - PATHIAN LEKHABU THIANGTHO (BSI)

Israelte Puksiatna

¹ Mâichâm bul ah Lalpa ding lai ka mu’n, zia gual hin a gen a: Kotbulte kithin hial masia khuampite chu khên in; a kithing bongte chun mipite luchang khen gawp hen la; zia thibang cheng chu chemjam in that ing ka; pakhatle tai mang lo in, khat ziang le suakcha pua’n au.

² Sheol tiang ah thûk kua cho maleu, zia kipat chun ka khut in ladok ing ka; van ah kaldok leule, zia kipat chun kaitha ding ka hi.

³ Karmel tâng ah kisêl maleu hawldok in, hun kaidok ing ka; ka mulo dingin tuisuagiat li tual ah kisêl maleu, zia tak ah chun gulpi thu pia’ng ka tin, amau a la chu’n a.

⁴ A mêlmateu âng in sal ah lût maleu, zia tak ah chun chemjam thu pia’ng ka tin, amau chu that in a; a phatna ding uh hilo, a siatna ding un a chung ua ka mit nga’ng ka.

⁵ Lalpa, sepai honte Pathian chun, lei a suk khâk leh a tuitha zo in, a sung ah chêng zosia’n a sûn un, Nail luipi gual in a khansak a, Aigupta ah Nail luipi gual in a kiamsak hi;

⁶ ama’n a pindan chungnung van ah a siam in, lei chung khû dingle a siam hi; tuisuagiat ah tuite a kodok ah, lei tual ah gawtui zuksak pa, a min chu Lalpa ahi.

⁷ Aw Israel mite, Kei â ding ah Ethiopiate gual tho hilo la hiu em? Lalpa‘n a tii. Aigupta gam ah kipat Israelte, Kaphtor ah kipat Philistinte leh, Kir ah kipat in Aram mite ka puidok pua a hem?

⁸ Lalpa Pathian mitte chu lenggam gilo chung in a chu hen; lei chung ah kipat in sumangthai ing ka; Jakob Inkuante bep chu hi’mangthai suak pua’ng ka, Lalpa‘n a tii.

⁹ Ngai un leidâl ah bu a ngelthia’n gual un, Israel Inkuante ngel dingin thu pia ding ka hi’n; ahi’n, suangchang khatle lei tual ah ketha pua’n a.

¹⁰ Ka mipite lak ah, “Siatna’n ei delpha pua’n tin, I chung unle tung pua’n a,” ti ah gilo zosia chu chemjam ah satlum in um in au.

David Lenggam Tundin Kitna

¹¹ Zia ni chuleh, David bawkcha a la pûk ta chu, tungding kit ing ka tin, a siatnate siampha’ng ka tin, a chipnate lem to ing ka tin, masang lai ah gual khan sapha kit ing ka tin;

¹² tichun, Edom mun ah um nalaite leh, ka min ah ka ko nam zosiate chu a neitheina ding un, zia bawlpa, Lalpa chun a gen ahi.

¹³ Lalpa chun, lei letpa’n bu âtpa a delphâk ah, grep chilpa’n, a chithe’pa a phâk ah, tângsâng tin in uain thum tak a vatsak ah, mual zosia ah uain thum tak a luanna ding hun chu, hung tung ding ahi tai, Lalpa‘n a tii.

¹⁴ Ka mi Israelte neinungna tungding kit ing ka tin, amau in khawpi chimsate chu siampha kit in lua in au. Grep phut intiu in, grep ga tuite chu dawn ta’n au; huante bawl intiu in, a ga ne ta’n au.

¹⁵ A gam un phu ing ka tin, a gam ding uh ka piak ah kipat chun bawdaw kit hita pua’n au, ti’n Lalpa, la Pathian un a gen hi.