AMOS 7 - PATHIAN LEKHABU THIANGTHO (BSI)

Khaubepi, Mei leh Ettuakna

¹ Zia hi Lalpa Pathian in ei etsak chu ahi: Thâichi a lêp lam ga ding hung seldok hun ah chun, zia chu lengpa bu lak zaw phat ah hung seldok hun chu ahi’n; khaubepi tam tak a hun umsak a.

² Gam ah hampa zosia a nêk zaw phat un, keima’n: “Aw Lalpa Pathian, ngaidam in, la ngaidamna ka dawn hi! Jakob bangti’n pang zo ding a hem? Ama a neu ngal a!” ka ti ta’n.

³ Zia thu ah hin Lalpa‘n a lung a hei ta’n, “Zia gual chu hita pua’n a,” Lalpa chun a ti tai.

⁴ Zia hi Lalpa Pathian in ei etsak chu ahi: Lalpa Pathian in mei a ko ah, zia mei chun tuisuagiat leh gam chu a kâng tum tai.

⁵ Ziaphatchun keima’n: “Aw Lalpa Pathian, hâi ta’n, ti’n ka don a! Jakob bangti’n pang zo ding a hem? Ama a neu ngal a,” ka ti’n.

⁶ Zia thu ah hin Lalpa‘n a lung a hun hei ta’n, “Zia hile hita pua’ng ka,” Lalpa Pathian in a hun ti tai.

⁷ Zia hi ei hun etsak kit a: Lalpa chu ettuakna tawh kithua ah bâng kibawl pang ah hin a ding ah, a khut in ettuakna a chawi a.

⁸ Lalpa‘n ka kiang in, “Amos, bang la mu em?” ei hun ti’n. Keima’n, “Ettuakna,” ka ti’n. Ziaphatchun, Lalpa‘n: “Ngai in, ka mi Israelte lak in ettuakna koi ding ka hi; a chung ua gawtna tung ding chu lamang kit ta pua’ng ka tin;

⁹ Isak thoimualte chu nutsia hung hi’n tin, Israelte mun thiangthote chu suksiat hung hi’n tin, Jeroboam Inkuan lang dingin, chemjam tawh hung kuan ing ka,” a ti’n.

Amaziah In Lengpa Kiang Ah A Lawtna

¹⁰ Ziaphatchun, Bethel ah thiampu Amaziah chun, Israelte lengpa Jeroboam kiang in, “Israel Inkuan lak ah a lailung tak ah Amos in nang siatna ding a gûk in a gêl in; a thu gente chu gam in a thuak zo puai.

¹¹ Amos in zia gual hin a gen ngal a: ‘Jeroboam chu chemjam ah thi’n tin, matheilo in Israel chu, ama gam ah kipat in sal ah pui mang hung hi’n a,’ ti’n thu a thot ta’n”.

¹² Chun, Amaziah in Amos kiang in, “Aw nang thil mu’lawk theipa, Judai gam ah jam mang in, la nêk ding vakilaw in thu vahil lawk in;

¹³ Bethel ah hin vang hung gen ta kin, lengpa mun thiangtho leh a lenggam â ding ah tempul ahi ngal in,” a ti tai.

¹⁴ Ziaphatchun, Amos in Amaziah dawnhu in, a kiang in, “Jawlnei ka hipua’n, jawlnei chapa le ka hi diak puai; himaleh, kei chu gan-gual chingpa leh theipi kung enkol bep ka hi hen;

¹⁵ ka gan hon zuina kipat in Lalpa‘n ei ko dok ah; chuleh, Lalpa‘n ka kiang in, Chia inla, ka mi Israelte kiang ah thu vagen in,” ei ti’n.

¹⁶ Ziaziakchun, tu’hin Lalpa thu chu ngai ta’n: Nang in, “Israelte kâl in thu genlawk kin, Isak Inkuante kâl in thu hil kin,” lei ti’n.

¹⁷ Ziaziakchun, Lalpa‘n zia gual hin a gen hi: “La ji chu khawpi sung ah nawchizuak hung hi’n tin, la chapate leh la chanute chu chemjam in puk in au; la gam chu te’na khau ah hawm hi’n a; nangma chu gam thiang lo khat ah chun thi’n la tin, matheilo in, Israel chu a gam ah kipat, sal ah pui mang hung hi’n a,” ti’n a gen tai.