AMOS 5 - PATHIAN LEKHABU THIANGTHO (BSI)

Israelte Gitlona Sûnna La

¹ Aw Israel Inkuan ah mite haw, nang uh chung ah sûnna thu kâ La hi ngai tiam un:

² Thodok kit talo ding ah kipûk chu, nungak thiangtho Israel ahi; ama gam ah nutsia a hita’n, ama kaitho ding khat le a um ta puai.

³ Lalpa Pathian in zia gual hin a gen ngal a: Mi sâng khat pawtna khawpi ah chun za khat nutsia hi’ntin; za khat pawtna khawpi ah chun, sawmkhat nutsia hi’n au.

⁴ Lalpa‘n Israel Inkuan kiang in zia gual hin a ti ngal a: Ei hawl un, tichun hing in lau;

⁵ himaleh, Bethel hawl kiu inla, Gilgal ah lût kiu inla; Beer-sheba ah le gâl kâi kiu in; Gilgal chu matheilo in gam dang ah jam mang ding ahi’n, Bethel chu bangmalo hung hi’n a.

⁶ Lalpa chu hawl unla, hing tau in; achutiloleh, Joseph In sung ah kipat in, meikuang gual in pawtdok intin, Bethel kâng tum intin, a phelmit ding kuama um pua’n a.

⁷ Katei, vaihawmna dik gamsai suaksak a, diktatna lei tual ah paithate haw!

⁸ Bombial leh sizuhei suktun siam a, khawthim tak jingkal chansak a; khawvak chu janthim ah chansakpa, tuisuagiat ah tuite kodawk ah, lei chung ah gawtui zuksakpa chu, a min Lalpa ahi’n;

⁹ ama’n mihat do dingin kawlphe gual in siatna a sawldok in; tichun, siatna chu kulpite chung in a tung hi.

¹⁰ Kul kotkhak ah zilgaipa chu a huau a, thudik genpa chu a ki’dak ui.

¹¹ Migentheite la tawden un, A bu neisun lei man ding ah lak piak a, chênna ding suang In kisak maleu, a sung in chêng diak pua’n lau; grep huan pha takte la bawl un, maleh, a gatui dawn pua’n lau.

¹² La bawsiatnau a tam dan, la gitlonau a nasat dante, mi diktatte la sugenthei un, golgûkna la lau ah, vaihawmna kotkhak bul in mi tasamte la sawndok ui, ti ka he ngal a.

¹³ Ziaziakchun, mi pilvâng chu, zia gual hun ah chun thipbek in um in a; zia ni chu hun phalo ahiziak in.

¹⁴ La hintheina ding un gitlona hilo, phatna chu hawl tau in; tichun, la gensa gual in, Lalpa, sepai honte Pathian chun hun umpi ta’n a.

¹⁵ Gitlona huau inla, phatna ngaina tau in; kul kotbul ah vaihawmna dik din tau in; Joseph Inkuan a um nalai sunte chung ah Lalpa, sepai honte Pathian chun lungsiatna a hun nei khâk leh.

¹⁶ Ziaziakchun, sepai honte Pathian, Lalpa chun zia gual hin a gen hi: Khawlai zosia ah mauna um intin, lamlian zosia ah chun: “A khawk na e! A khawk na e!” ti’n’au. A sûn dingin lou bawlte leh, a kap dingin kâ La thiamte ko in’au;

¹⁷ grep huan zosia ah chun thûm leh mauna um in ah; la lak uh hun hawtheng ding ka hi’ngal a, Lalpa‘n a tii.

Lalpa Ni Thimna Ni Chu

¹⁸ Lalpa ni ngainate haw, la chung uh a gik na e! Bang ding ah Lalpa ni ngaina la hiu em? Zia ni chu vâk hilo in, thim ahi.

¹⁹ Mi pakhat sakeibaknei lau ah tai, savom tuak kha gual a hem; ahiloleh, In sung ah lût ah, a khut bâng ah a ngat leh, gul in a la chuk piak gual chu ahi.

²⁰ Lalpa ni chu vâk hilo in, vâkna him him nei lo thimna hilo a hem?

²¹ La kûtteu ka hua hen bangma’n ka ngai puai; la khawmpi gun takteu chule ka kipakpi puai.

²² Hâlmang thillat leh thâi thillatte hun lân maleu chin, a la pom lo ding ka hi; la chamna thillat uh gancha thau tak takte chule, hun ngaisak diak pua’ng ka.

²³ La Lasak gitteu ka kiang ah kipat lamang unla, la tingtang gi hawiteu le ngaitha pua’ng ka.

²⁴ Ahi’n, vaihawmna dik tui gual in luansak unla; diktatna chu lui tui luang let gual in.

²⁵ Aw Israel Inkuante haw, gamthip ah kum sawmli sung ah khan ka kiang ah thillat leh kithoina la lân ngai uh em?

²⁶ Sakkuth la lengpau leh Kaiwan la aksi pathian uh, la milimteu, nang uh â dingin hun kisiam in lau;

²⁷ ziaziakchun, Damaska khêl lam pek ah, sal ah hun pui mang ding ka hi, Lalpa‘n a tii; a min chu sepai honte Pathian chu ahi.