AMOS 3 - PATHIAN LEKHABU THIANGTHO (BSI)

Israelte Mawna leh A Gawtna

¹ Aw Israel mipite, Aigupta gam ah kipat ka puidaw Inkuan zosiate haw, nang uh demna thu Lalpa‘n a gen hi ngaitha tau in:

² Khawvel ah Inkuan zosia lak ah, nang uh bep hi ka het la hiu in, ziaziakchun, la dukdaklo’nau zosia ziakin hun gawt ding ka hi.

³ A kitiam lawk a hilo ngal ua leh, bangti’n mi pani kiton thei ding a hiu em?

⁴ Gammâng ah sakeibaknei in mat ding nei lo in, bangti’n kitum ding a hem? Bangma that lo in sakeibaknei vanglai a kul sung in, a mawk ngîk ngai em?

⁵ Thâng umlo pi’n vacha mawk awk ziang ding a hem? A chuan pel umlo in thâng chu bangti’n pel ziang thei ding a hem?

⁶ Khawpi sung ah launa umlo in kuan, pengkul a mût ngai ah a hem? Lalpa sawl hilo in siatna’n khawpi a tun khum ngai em?

⁷ A dik tak in Lalpa Pathian in a suak, jawlneite kiang ah thugûk hil masa lo in, bangma a bawl ngai puai.

⁸ Sakeibaknei kitum lau lo kua a hem um ding? Lalpa Pathian in a gen ta’n, kua a hem îm thei ding?

⁹ Ashdod ah kulpite kiang leh, Aigupta ah kulpite kiang in puangdok un: “Samaria tâng chung ah kikhawm unla, a sung ah bang gual buaina tung ah, a lak ua nuaisiana umte chu en tiam un” ti’n gen un.

¹⁰ A kulpiteu ah thagum sua’na leh, kisuamna kholkhawmte chun, thil dik bawl ding dan a hepuau hi, Lalpa‘n a tii.

¹¹ Ziaziakchun, Lalpa Pathian in zia gual hin a gen hi: Gam chu mêlmate’n ûm kîmvêl intiu in, la kivênna zosia lâk piak in, la kulpiteu suksiat hin’au, ti in.

¹² Lalpa‘n zia gual hin a tii: Belampu’n sakeibaknei kam ah kipat sakeng pani a hem, a bil them khat a hem a hukdaw gual in, Samaria ah chêng Israelte chu chutna ning khat leh lupna kilning khat a hem tawh hukdok in um in’au, ti in.

¹³ Ngai unla, Jakob Inkuante chu hiatsak tau in, ti’n sepai honte Pathian, Lalpa Pathian chun a tii.

¹⁴ A bawsiatnateu ziak ah Israel ka gawt phat leh, Bethel mâichâmte gawt khawm ing ka tin; chun, mâichâm kîte sâtbot in um in, tual ah kia’n au.

¹⁵ Chuleh, phalbi leh nipi In chu suchim ing ka tin; saiha Inte mangthai intin, In lopite chu bei ta’nau, Lalpa‘n a tii.