AMOS 1 - PATHIAN LEKHABU THIANGTHO (BSI)

Israel Kîmvêl ah Namte Chung ah Vaihawmna

¹ Judai gam ah lengpa Uzziah leh Israel gam ah lengpa Joash chapa, Jeroboam vaihawm hun lai in, lînlîng masang kum ni ah, Tekoa mun ah belam ching mi lak ah mi, Amos in Israelte chung thu a mu chu:

² Amos in: “Zion tâng ah kipat in Lalpa a kitum ah, Jerusalem ah kipat in a aw a sua hi; Belam chingte gan tatna hambuk a vuai in, Karmel tângvûm chu a keugawp tai,” a tii.

³ Lalpa‘n zia gual hin a gen hi: Damaska bawsiatna pathumte ziak leh, palite ziakin a chung ua gawtna ding chu lamang pua’ng ka; amau in Gilead gam chu bu vokna thik ah a vok tâk ziak un.

⁴ Tichun, Hazael Inkuan chung ah mei hun sawl ing ka tin, zia chun Ben-hadad kulpite chu kâng tum in a.

⁵ Damaska kotpi thikte chu hi’bong ing ka tin, Aven phâizawl lua mite leh, Beth-lehem ah kipat in, laltiang chawipa chu sâttha ding ka hi; tichun, Aram mite chu Kir gam ah sal ah lût in’au, Lalpa‘n a tii.

⁶ Lalpa‘n zia gual hin a gen hi: Gaza bawsiatna pathumte ziak leh, palite ziakin, a chung ua gawtna ding chu lamang pua’ng ka; amau in Edomte kiang ah piak dingin nam pumpi chu, sal in a pui lût ngal un.

⁷ Ziaziakchun, Gaza bâng kâng tum ding mei hun sawl ding ka hi; a kulpite kâng tum ding mei ngei chu.

⁸ Ashdod ah chêng zosia leh, Ashkelon ah laltiang chawipa chu sumangthai ding ka hi; Ekron chung in ka khut tha’ng ka tin, Philistin mi um nalaite chu mangthai in’au, Lalpa‘n a tii.

⁹ Lalpa‘n zia gual hin a gen hi: Tura bawsiatna pathumte ziak leh palite ziakin, a chung ua gawtna tung ding chu lamang pua’ng ka; amau in nam pumpi Edomte kiang ah a piakdaw ziak uh leh, ki-unauna thuthung a het zing lo ziak un.

¹⁰ Ziaziakchun, Tura bâng chung in mei hun sawl ding ka hi, a kulpite kâng tum ding mei chu.

¹¹ Lalpa‘n zia gual hin a gen hi: Edom bawsiatna pathumte ziak leh palite ziakin, a chung ua gawtna ding chu lamang pua’ng ka; ama’n a suapi chemjam in a del in; lainatna zosia haisan ah, a lungnatna vop zing in, a thangtawmna a vop zing ziakin.

¹² Ziaziakchun, Teman chung in mei sawl ing ka tin, Bozrah kulpite chu kâng tum in a.

¹³ Lalpa‘n zia gual hin a gen hi: Ammonte bawsiatna pathumte ziak leh palite ziakin, a chung ua gawtna ding chu lamang pua’ng ka; a gam kêkletna ding un, Gilead ah numei nauvop lai a phildaw ziak un.

¹⁴ Ziaziakchun, Rabah bâng mei in hâl ing ka tin, a kulpite chu kâng tum intin, kido ni ah kiko thawm tawh, chîmpei ni ah thigawpi tawh,

¹⁵ ziaphat chuleh, a lengpau chu a miliante pum in, sal ah pui in au; Lalpa chun a tii.