3 JOHAN 1 - PATHIAN LEKHABU THIANGTHO (BSI)

Gaias Pâkchâkna

¹ Upa chun, doitak Gaias, thutak ah ka hepi kiang ah chun:

² Doitak, la thagau in maljawlna a don gual in, bangkim ah maljawlna la don ah, la dam theina dingin ka hun pauchap piak hi.

³ Suapite khenkhat a hung tung un, thutak ah la ginum dan leh, thutak ah la um zing dan ei hil un, ka kipak ma ma hi.

⁴ Ka chate thutak ah a um zing ui ti ka het khêl ah kipakna lianzaw ka nei puai.

⁵ Doitak, suapite chu la mêlhet lo hi maleu, a chung ua la hi taphot ginum tak in la hi jel a;

⁶ amau chun kochuamte kiang in la hepina chu a hiatsak tau hi. Amau chu a zinnau ah Pathian â ding ah kilawm him ah la sawldaw chun a bawlpha hi’n la.

⁷ Amau chun Khrista ziak ah kipandok in, ginglote ah kipat panpina pom lo ahi ngal un.

⁸ Chutichun, thutak naseppite I hi’theina ding un zia gual mite chu I khawtua ding uh ahi.

Diotrephia leh Demetria

⁹ Kochuamte kiang in lekha ka la thot ta’n, himaleh, Diotrephia, a lak ua chungnun chû sekpa khan ka thuneinau a zanuam puai.

¹⁰ Ziaziakchun, ka hung ahileh, I chungthuu ah thu dik lo a gente chu kophil ding ka hi. Zia bep chule hun tawk salo in, suapite chu a la lop nuam pua’n, a lop nuamte le zada in, kochuam ah kipat a nawdok nalai hi.

¹¹ Doitak, a phalo chu enton kiu inla, a pha chu enton zaw tau in. Thilpha bawl taphot chu Pathian ah kipat mi ahi’n; thil phalo bawl taphot chun vang Pathian a mu puau hi.

¹² Mi zosia’n le Demetria chu thutak ngei inle a pâkchau hi; Kei unle ama chu ka hiatsak un, ka hiatsaknau chu a dik ngei hi ti la hia’i.

¹³ La kiang ah thu tam tak gen ding ka nei hi; himaleh, lekhatui leh kawlom ah zik ka nuam puai.

¹⁴ Zia sâng ah chun, hun mu kin-gang ka kinem ah, kimaitua in kiho hi ti.

¹⁵ La kiang in thamuanna um ta hen. I gualteu in chibai a hun bûk ui. I gualteu kha a min uh lam chiat in chibai ei la bûk piak in.