2 TIMOTHI 2 - PATHIAN LEKHABU THIANGTHO (BSI)

Khrista Jesu â Ding ah Sepai Pha Chu

¹ Chutichun, nang ka cha, Khrista Jesu ah hepina ah chun hat tak in um inla,

² hetpi tam takte lak ah ka kam ah thu la hiatte kha, mi ginum, midang hilsawn thei dingte kiang in pesawn in.

³ Khrista Jesu â ding ah sepai pha tak gual in haksatna ei thokpi in.

⁴ Sepai kuama’n dam sung khawsaknate ah hin a kisubuai ngai puai; sepai ding ah têl hotupa kipaksak ding bep chu a tup sek hi.

⁵ Chuleh, gualsiak kidemna ah chunle, min dan gual ah ahiloleh khuksak in a um ngai puai.

⁶ Lou ah sêmgimpa chu thâiga chang masa pen ahi ding ahi.

⁷ Ka thugen hi ngaitua in, Lalpa chun bangkim in hettheina hun pia ding ahi.

⁸ Mithi lak ah kipat thokit, David suan ah mi, Jesu Khrista chu hezing in, ama chu ka chanchinpha chu ahi.

⁹ Zia ding ah chun gimnate ka thuak ah, thilhi’khial gual ah kol busak hial in ka um tai. Himaleh, Pathian thu chu kol busak in a um puai.

¹⁰ Ziaziakchun, têlte ziak ah chun bangkim in ka thuak zo hi; chutia, amau inle Khrista Jesu ah hukdamna chu, kumtuang lopina chu tawh a mutheina ding un.

¹¹ Zia thugen hi a dik ahi: “A thina I thi khawm uh chun, a hinna ah chun hing khawm hitiu;

¹² I thok uh chun, ama tawh vaihawm khawm hitiu; ama I kilepsan uh chun, ama’nle ei kilepsan in a.

¹³ Gin umlo maleu hin, ama a gin um zing hi. Ama leh ama a kiphatsan thei pawngal a”.

Pathian Pom tâk ah Nasemte

¹⁴ Zia hi hiatsak kit inla, Pathian âng in hil in: Thu mai maite chung in kinial kiu hen, ziate chu bangma a phachuam pua’n, a ngaithate â ding in siatna ahi zawi.

¹⁵ Pathian âng ah pom tâk, nasemtu zachatna ding neilo, thutak thu chu dik tak ah hilchian thei mi hiding in la theitawp sua in.

¹⁶ Holimna polchete kiheisan in; zia chun mite Pathian ngaisak lona lam in a pui lût deu deu sek hi.

¹⁷ A thute chu meima hik gual in pung ding ahi; a lak un Humenai leh Phileta a pang un,

¹⁸ amau chun, thawkitna chu a tung zo tai, ti’n thutak a pêtmangsan tau a. Amau chun mi khenkhatte ginna a subuai tau hi.

¹⁹ Himaleh, Pathian suangphûm det tak chu a ding zing ah, zia tepte’na hi a nei hi: “Lalpa‘n ama â te chu a hia’i,” ti leh, “Lalpa min lam tapo in gitlona kiheisan hen,” ti hi.

²⁰ In lian tak sung ah chun sana leh dangka bêlte bep a um pua’n, thing leh bêllei ah kisiamte le a um ui; khenkhat gun tak ah mat ding a um ah, khenkhat mat mai mai dingle a um hi.

²¹ Kuale zia thil phalo ka gente lak ah kipat a kihi’thiantho chun, bêl manpha, In neipa â ding ah a thiangthosa leh mat tâk, nasep pha zosia ah matthei ngal chu hi’n a.

²² Khanglai nopnate chu jamsan inla, lungthim thiangtho tak ah Lalpa min lam taphot te tawh felna, ginna, hepina leh kichamna te hi del zaw ta’n.

²³ Kinialna ngolhuai leh umzia bei ah te’n pang kin; ziate chun kinaknate a suaksak sek hi ti la hiatsa ahi.

²⁴ Lalpa suak in kinak a chîn ding a hipua’n, mi zosia chung ah nunnem, thuhil thiam leh lungdia thei ahi zawk ding ahi’n,

²⁵ a lang lam ah pangte chu a jaicha’n hil hen. A lung uh a hei ua, thutak chu a hettheina ding un Pathian in ahi’thei tho ah,

²⁶ chutia chu, ama lung lam ahi ding ua, amau sal ah a la manpa diabol thâng ah kipat a suachâk theina ding un.