2 TIMOTHI 1 - PATHIAN LEKHABU THIANGTHO (BSI)

Chibai Bûkna, Kipak Thu Genna leh Tîlkhona

¹ Paul, Khrista Jesu ah um hinna thutep dungzui ah Pathian doi gual ah Jesu Khrista sawlchâk hin:

² Ka cha doitak Timothi kiang ah, Pa Pathian leh, Khrista Jesu I Lalpau ah kipat hepina, jangaina leh chamna um ta hen.

³ Ka pu leh pate’n a la ho gual un, sia leh pha thiang tak nei ah a na ka sep, Pathian kiang ah sûn leh jan ah ka pauchapnate ah chun nanghaw hun hezing in, kipak thu ka gen zing sek ahi.

⁴ La mitthituite ka hetzing ziakin, kipakna ka dim theina dingin hun mu ka nuam ma ma hi.

⁵ Ginna tak tak nangma ah um chu ka hezing hi; zia ginna chu a lim in la pi Loisi leh, la nu Euniki ah a um in, tu’hin nangma ah le a um hi ti ka hechian tai.

⁶ Ziaziakchun, ka khut ngak ziak ah Pathian thilpiak nangma ah um kha, sêmkuang kit dingin ka hun hiatsak hi;

⁷ Pathian in launa thagau ei pepua’n, thilhitheina leh hepina leh kithununna thagau ei pia zaw ngal a.

⁸ Chutichun, I Lalpau thu hiatsak leh, keima ama min ah suangkul ngâkpa hile ei jachatpi kin la; chanchinpha ziak ah thokgimna hi, Pathian thilhitheina dungzui in ei thokpi zaw’n.

⁹ Ama chun I thilhite dungzui hilo in, ama thiltup leh a hepina dungzui in ei hukhing in, kona thiangtho in ei ko a. Zia hepina chu khawvel kisiam ma ah, Khrista Jesu ah ei piak a hita’n;

¹⁰ himaleh, tu’hin, I Hukdampau Khrista Jesu hung kilat ziakin hi’lat in a um tai; ama chun thina chu hi’bei in, chanchinpha ah chun hinna leh thi theilona a hun tâklang tai.

¹¹ Zia chanchinpha â ding ah chun, tângsam leh sawlchâk leh thuhilpa hiding ah guat ka hi’n,

¹² tu’ ah ka thoknate hile zia ziak chu ahi. Himaleh ka zak a cha puai, ka ginna ka ngakna pa chu ka hia’n; a kiang ah ka vopsak chu zia ni â ding ah chun a chingtup thei hi ti ka he ngal a.

¹³ Khrista Jesu ah um ginna leh hepina ah chun, thuhilna dik keima ah kipat la hiatte kha tudet zing ta’n.

¹⁴ Eimau ah chêng Thagau Thiangtho kithuapina’n, nangma ah vopsak hita go thilpha tak chu chingpha ta’n.

¹⁵ Asia gam ah um zosia’n ei nusia zo tau hi ti la hia’i; a lak un Phigela leh Harmojinia le a pang ui.

¹⁶ Lalpa‘n Onesiphora Inkuanpite chung in jangaina pia ta hen; ama chun ei la hi’hal jel sek in, ka thikkol hile ei jachatpi pawngal a;

¹⁷ Rom khua a hung tun in thanuam tak in ei hung hawl ah, ei hung kimupi hi.

¹⁸ Zia ni phat chuleh, Lalpa ah kipat jangaina mu dingin Lalpa‘n ama chu guat ta hen. Ephesa khua a nasep zosia khale la he ma ma hi.