2 SAMUEL 9 - PATHIAN LEKHABU THIANGTHO (BSI)

Mephibosheth Chung ah David Nunnemna

¹ David chun, “Jonathan chung ah ja’ngaina ka suklat theina ding in, Saul Insung mi a dam nalai pakhat bêk um talo a hiu em?” ti’n a dawp a.

² Zia hun ah chun Saul Inkuante lak ah suak nasêm mi pakhat, a min Ziba a um ah, ama chu David kiang in a hun ko lut ua. Lengpa chun a kiang in, “Ziba chu la hi em?” ti’n a dong a. Chuleh, ama’n, “La suak hi ka hi!” ti’n a dawnhu tai.

³ Lengpa chun a kiang in, “Pathian ja’ngaina ka suklat theina ding in Saul Inkuan lak ah mi pakhat chale um talo a hiu em?” ti’n a dong a. Ziba chun lengpa kiang ah chun, “Jonathan in chapa pakhat a nei hi; ama chu kengbai ahi,” ti’n a dawnhu tai.

⁴ Lengpa chun a kiang in, “Ama chu khoitak ah a um em?” ti’n a dong a. Ziba chun, lengpa kiang in, “Lo-debar khua Ammiel chapa Makhir In ah um ahi,” ti’n a dawnhu tai.

⁵ Ziaphatchun, Lengpa David chun Lo-debar khua Ammiel chapa Makhir In ah kipat vapui dingin mi a sawl tai.

⁶ Saul chapa Jonathan chapa Mephibosheth chu David kiang a hung tung ta’n; tichun, a mai ah leitual si’n chibai bûk in a bokkhup ta. David chun, “Mephibosheth!” ti’n a ko a. Ama chun, “La suak ka hi,” ti’n a dawnhu a.

⁷ David in a kiang ah chun, “Lau kin, la pa Jonathan jal in la chung ah ja’ngai ding ka hi; chuleh, la pu Saul gam kha nang hun pia kit ing ka tin, nang in vang ka annêkna dawkan ah an la nêk zing ding ahi tai,” ti’n a dawnhu a.

⁸ Ama chun chibai a bûk kit ah, a kiang in, “La suak, uicha thisa gual bep hi bang ding ah ei chuti ngaisak la hi em?” ti’n a dawnhu tai.

⁹ Ziaphatchun, lengpa chun Saul suakpa Ziba chu a ko ah, a kiang in, “Saul leh a Inkuan ua a nei gothil zosiau chu la pu tupa kiang ah hin ka pia tai.

¹⁰ Nang tawh, la chateu tawh, la suakteu zosia’n ama â dingin a lou chu bawl piak unla, la pu tupa hin nêk leh châk a nei theina dingin, a ga piang zosia chu la hun puak khawm piak diu ahi; himaleh, la puu tupa Mephibosheth hin vang ka annêkna dawkan ah an a nêkden ding ahi tai,” ti’n a gen a. Zia hun ah chun Ziba in chapa sawm leh nga tawh suak nasêm mi sawmni a nei hi.

¹¹ Ziaphatchun, Ziba in lengpa kiang ah chun, “Lengpa, ka lalpa‘n la suakpa kiang ah la thupiak zosia chu, la suak hin bawl ding ka hi,” ti’n a dawnhu a. Mephibosheth chun lengpa chate lak ah pakhat gual in, David annêkna dawkan ah chun an a ne zing tai.

¹² Mephibosheth in chapa naupang tak khat a nei ah, a min chu Mika a hi. Chun, Ziba In ah chêng zosia chu Mephibosheth suakte a hung hitau a.

¹³ Mephibosheth chun lengpa annêkna dawkan ah an ne zing a hiziak in, Jerusalem khua’n a chêng tai. Ama chu a keng lang ni’ bâi a hi.