2 SAMUEL 8 - PATHIAN LEKHABU THIANGTHO (BSI)

David Gal Do-nate

¹ Zia nung ah chun, David in Philistinte a vado ah, a zo ta’n; tichun, David in Methegam-mah chu Philistinte khut ah kipat in a kilâk tai.

² Chuleh, Moabte le a zo kit ah; amau chu lei tual in a lupsak ah, te’na khauhual in a te’ ah; te’na khauhual chan ni tiang ah umte chu a tha dingte, te’na khauhual tawn khat sung ah umte chu a hawi dingte a hiu. Tichun, Moabte chu David suak in a lut tau ah, sia a choisak tai.

³ David in Euphrates luipi lam ah a gam tepte’na tungding kit ding ah a kuanna lam in, Zobah gam ah Rehob chapa, Leng Hadadezer chule a do malam hi.

⁴ David in a sakol sepai sang khat leh za sagi tawh, keng sepai sîng ni a lâkpiak ah. David in a kângtalai kai sakol zosia lak ah kipat in kângtalai za khat kai ding a hawi ah, a dang cheng chu a zapigui uh a sât tan piak tai.

⁵ Damaska khua Aramte chu Zobah khua lengpa Hadadezer panpi ding ah a hung phat un, David in Aramte chu sîng ni leh sang ni a that a.

⁶ Ziaphatchun, David in Damaska khua’ Aramte chu sepai a koikhum ta’n; tichun, Aramte chu David suak in a pang tau ah, sia a choisak tai. David chu a chiana lam lam in Lalpa‘n zaw’na a pejel hi.

⁷ David in Hadadezer sepaite sana phaw haw chu hun lâkpiak in, Jerusalem lam in a hun paw tung a.

⁸ Lengpa David chun, Hadadezer gam ah Betah khua kipat leh Berothai khua kipatte hin sum-eng thik tam tak a lakhawm hi.

⁹ Chun, Hamath Lengpa Toi chun, David in Hadadezer sepaite zosia a zo tai ti thu a la het phat in,

¹⁰ Lengpa Toi chun Lengpa David kiang in chibai bûk ding leh Hadadezer a zaw’na ziak ah kipakpi’na thu tut dingin a chapa Joram chu a sawl a. Zia lai ah chun, Hadadezer leh Toi chu kicho ah kido veu sek a hiu in. Joram in dangka thik, sana leh sum-eng thikte a puak piak a;

¹¹ ziate chu Lengpa David in nam dangte a zawsate lak ah kipat a gâl lâk zosia chu tawh Lalpa kiang in a lân a;

¹² ziate chu Edomte, Moabte, Ammonte, Philistinte, Amalekte leh Zobah khua Rehab chapa, Lengpa Hadadezer ah kipat a gâl lâk cheng chu tawh ahi.

¹³ David in a minthanna kham tak in gâl a zo tai. A hung kile’kit lam ah chun Chi Phâizawl ah chun Edomte mi sîng khat leh sang giat a hun that malam a.

¹⁴ Edom ah sepai a koi ah; Edom gam pumpi’n sepai a koi ah, tichun Edomte chu a leng un David suak a hitau hi. Chuleh, David chu a kiheina lam lam in Lalpa‘n zaw’na a pejel tai.

David Miliante Chu

¹⁵ Tichun, David in Israelte zosia chung in vai a hawm ta’n; chuleh, David in a mipi zosiate chung ah thudik leh doichuam nei lo in vai a hawm a.

¹⁶ Zeruiah chapa Joab chu a sepaite lak ah hotu lianpen in a pang ah; chuleh, Ahilud chapa Jehoshaphat chu chanchin tepte in a pang ah,

¹⁷ Ahitub chapa Zadok tawh Abiathar chapa Ahimelekh chu thiampu’n a pang un; Seraiah chu lekha zik in a pang hi.

¹⁸ Jehoiada chapa Benaiah chu Kherethte leh Pelethte hotu’n a pang un; chuleh, David chapate chu thiampu’n a pang ui.