2 SAMUEL 7 - PATHIAN LEKHABU THIANGTHO (BSI)

David Kiang ah Pathian Thuthung

¹ Lengpa chu Lalpa‘n a kîmvêl ah a mêlmate zosia lak ah kipat a chawldamsak phatin, a leng In ah thamuang tak in a chêng ta’n;

² lengpa chun jawlnei Nathan kiang in, “En tiam in, keima sidar thing ah kisa In ah ka chêng ta’n, Pathian thuthung thingkuang ahileh vang puanbûk in a um nalai hi,” a tia.

³ Nathan chun lengpa kiang in, “Kipan inla, la lungtup gual tak in bawl mai in, Lalpa‘n a hun umpi ngal a,” ti’n a dawnhu tai.

⁴ Himaleh, zia jan ma ma ah chun Nathan kiang in Lalpa‘n zia gual hin thu a hun gen a:

⁵ “Chia inla, ka suak David kiang in, Lalpa‘n zia gual hin a gen hi va ti’n: Ka chênna ding In chu maw nang in la sak ding?

⁶ Aigupta gam ah kipat Israel mipite ka puidaw ah kipat, tu’ni tiang hin puanbûk leh biakbûk lak ngen in ka la chêng nalai in;

⁷ Israel mipite lak ah ka um tawl tawlna taphot ah hin, ka mipi Israelte chingtup ding ah nam upate pakhat cha kiang inle, ‘Ka chênna ding sidar thing In bang ziak ah ei sak piak lo la hiu em?’ ka la ti ngai puai.

⁸ Ziaziakchun, tu’hin, sepai honte Lalpa chun, ka suak David kiang in zia gual hin la gen ding ahi: Gancha chinna mun, belam hon la chinna mun ngei ah kipat hin, ka mipi Israelte chung ah Leng hiding in ka hun teldaw la hi’n,

⁹ la chiana lam lam in ka hun umpi in, la mêlmate zosia la ma-âng in ka hun thalup piak ta’n, khawvel ah mi thupite gual in la min hi’lian ding ka hi.

¹⁰ Chuleh, ka mipi Israelte â dingin mun pakhat guat piak ing ka tin, amau chu phudet ing ka tin; amau gam ngei ah chun thamuang tak in chênsak ding ka hi; ka mipi Israelte chung ah vaihawm dingte ka guat ni’ kipat in, migilote chun tu’ma lam gual khan sugenthei kit ta pua’n tin uh;

¹¹ tichun, la mêlmateu lak ah kipat chawldamna hun pia ta’ng ka. Zia bep chule hilo in, Lalpa‘n In sung det le hun pia ding ka hi, ti’n a taklang ta ahi.

¹² La dam sung nikhua a hung butin ah, la pu leh pate kiang ah la i-mut tak leh, la nung ah um ding suan leh pâkte hun pia’ng ka tin, nangma khâlbe ma ma ah kipat hung piang chun a lenggam hun sudet ding ahi.

¹³ Ama chun ka In ding ei sak piak intin; tichun, a lenggam lalchutpha chu kumtuang dai dingin sukdet piak ing ka.

¹⁴ Ama â dingin a pa hi’ng ka tin, ama chu ka chapa hita’n a. Thil a hi’khial phat leh vang chu, mihingte’n mol a mat gual un, mihingte ma ma mol ah mang in gawt ding ka hi.

¹⁵ Himaleh, la ma-âng ah ka paithâk, Saul ah kipat ka ja’ngaina ka lakdaw kit gual in ama chung in vang ladok pua’ng ka.

¹⁶ La Insung leh la lenggamte chu ka ma-âng ah hin sukdet hi’ntin, la lalchutpha chu kumtuang dai dingin namdet ta ding ka hi,” ti in.

¹⁷ Zia thute leh kilâkna a mu dan zosia chu Nathan in David kiang in a gen tai.

David Pauchapna

¹⁸ Ziaphatchun, Lengpa David chu Insung in a lut ah, Lalpa ma ah kitung in, “Aw Lalpa Pathian, kei hi kua ka hia, ka Insung hile bang a hiu ah zia tiang tiang hi lei pui tung ziang a hem?

¹⁹ Aw Lalpa Pathian, ziate hi vang nangma mit mu in thil neucha ahi; la suak Insung thu ding, hun sawt tak nung tiang ding lei gen piak nalai a. Aw Lalpa Pathian, zia thute hi mipite kiziltilna hung hita hen!

²⁰ Aleh, la kiang ah David in bang dang genbe thei nalai ding ahi em? Aw Lalpa Pathian, nang in la suakpa hi la hechian ngal a!

²¹ La suakpa hin a hiattheina ding ah la thutiam leh lungtupna ziak ah nang in zia thil lopi takte hi la bawl ahi ngal a.

²² Ziaziakchun, Aw Lalpa Pathian, nang chu la lopi hi; ka bil ua ka het dungzui un, nangma tawhbang kuama a um pua’n, nangma lo’ngal Pathian dang him him a um puai.

²³ La mipi Israelte tawhbang kua dang a um em? Lei chung ah kua nam le a Pathian, amau hukdok ding ah pui huai, ama min ding ah kisiam thil lopi leh tizat um takte bawl piak, amau â ding ah nam dangte leh a pathianteu nawdaw piak kua a um ah a hem?

²⁴ Chun, la mipi Israelte hi kumtuang ah nang â a hi’theina ding un nang in la sudet ta’n; tichun, aw Lalpa, nangma chu a Pathian uh la hung hi tai.

²⁵ Chuleh, tu’hin, aw Lalpa Pathian, la suak chung thu leh a Insung mite chungchâng ah la thugente chu kumtuang dai dingin sudet in la, la tiamsa dungjui in bawl in.

²⁶ Tichun, ‘Sepai honte Lalpa chu Israelte Pathian ahi,’ ti’n la min chu kumtuang ah choihoi in um ta hen; chuleh, la suak David Inkuante chu la ma-âng ah sukdet in um tau hen.

²⁷ Nangma, aw Sepai honte Lalpa, Israelte Pathian chun zia thute chu la suak kiang ah, ‘La Inkuante chu hun tundin piak ing ka,’ ti’n la gen ta’ngal in; Ziaziakchun, la suak hin zia pauchapna hi la kiang ah hun gen ngam ahi.

²⁸ Tu’hin, aw Lalpa Pathian, nang chu Pathian la hi’n, la thu chu thutak ahi; chuleh, zia thilpha hi la suak kiang ah la tiam ta hen;

²⁹ ziaziakchun, tu’hin la suakpa Insungkuan mite chu la ma-âng ah kumtuang ah ka um zing theina ding un malzawl in; aw Lalpa Pathian, nang in la gen ta’ngal in; tichun, la malzawlna chun la suak Inkuante chu kumtuang ah malzawl in um tau hen,” ti’n a gen tai.