2 SAMUEL 6 - PATHIAN LEKHABU THIANGTHO (BSI)

David in Thuthung Thingkuang Jerusalem Tut

¹ David in Israelte lak ah kipat a têlchuam, mi sâng sawmthumte chu a ko khawm kit a.

² David leh a kiang ah um mi zosia chu Baal-Judah ah kipandok in, Pathian thuthung thingkuang, sepai honte Lalpa cherubte chung ah a lalchutpha kitungpa min ah kisa chu valadok dingin a kuan tau hi.

³ Pathian thuthung thingkuang chu kângtalai thak pakhat a puak sak un, zia chu tâng gam ah Abinadab In ah kipat chun a hun puak dawsak un. Pathian thuthung thingkuang pua kângtalai thak chu Abinadab chate Uzzah tawh Ahio in a hun tawl ua;

⁴ Ahio chu thuthung thingkuang ma lam in a chia a.

⁵ David tawh Israel Inkuante zosia chu Lalpa ma-âng ah chun a theitawp uh sua ah La sa kawm in, mût-ham, pêkgit, khetgitthei zosia tawh vaikhutbet tawh thua in a lâm malam pek ui.

⁶ Nakon phualjawl a hung tun phat un, Pathian thuthung thingkuang chu, a kaitu bawngchal in a hun suklîn khak ziakin, Uzzah chun a khut in a vak tûk a.

⁷ Uzzah chung in Lalpa lungnatna a hung puang ta’n; thuthung thingkuang a khut ah a tûk ziakin, Pathian in a chung in khut a tha ta’n, Pathian thuthung thingkuang kiang in a thi den ngal tai.

⁸ Uzzah chung ah Lalpa lungnatna a puanjak ziak ah chun David chu a lungna ta’n. Ziaziakchun, zia mun chu tu’ni tiang hin Perez-Uzzah a sak den tau hi.

⁹ Zia ni’ chun David in, “Bangti’n Lalpa thuthung thingkuang chu enkol thei ding ka hita diam?” a ti ziakin, Lalpa chu a lau ta ma ma ziang a.

¹⁰ Tichun, Lalpa thuthung thingkuang chu David khawpi sung ah a puak lut nop lo phatin Git mi Obed-edom In ah chun a koi zaw tai.

¹¹ Lalpa thuthung thingkuang chu Git mi Obed-edom In ah chun tha thum sung a um ta’n; chun, Lalpa‘n Obed-edom leh a chanaute chu a malzawl tai.

¹² Pathian thuthung thingkuang ziakin Obed-edom chanaute leh a nei a lamteu chu Lalpa‘n a malzawl hi, ti Lengpa David kiang ah a hil tau a. Tichun, David chu a kuan ah, Obed-edom In ah kipat Pathian thuthung thingkuang chu David Khawpi ah kipak tak in a vapaw ta’n;

¹³ Pathian thuthung thingkuang jawnte chun kãl guk a suan si’n ua leh bawngchal pakhat leh gancha kivakthau pakhat jel kithoina’n a that jel hi.

¹⁴ David chu Lalpa ma-âng ah chun a theitawp in a lâm ta’n; David chu thiampu puanâk ah kithuam ahi.

¹⁵ Tichun, David tawh Israel Inkuante zosia chun kiko thawm nasa tak tawh pengkul mût in, Lalpa thuthung thingkuang chu a vapaw tau hi.

¹⁶ Lalpa thuthung thingkuang chu David khawpi a hun puak tung phat un, Saul chanu Mikhal in tukvan ah kipat chun Lalpa ma-âng ah Lengpa David lâm ah kichawm chawm chu a vak mu phât in, a lungthim in a jachatpi tai.

¹⁷ David in a koina ding ah puanbûk a bawlna mun ah, a umna ding tak ah chun Lalpa thuthung thingkuang chu a koi tau ah; tichun, David in hâlmang thillat leh kichamna thillat dingte chu Lalpa âng ah chun a lân tai.

¹⁸ David in hâlmang thillat leh chamna thillatte a lat zaw phat in, mipite chu sepai honte Lalpa min in a malzawl tai.

¹⁹ Israel mipi zosiate kiang in, a numei a pawsal kidang lo in, mi tin kiang in vaithum tang khat tawh, sa bâk khat tawh grep ho vaithum tâng khat chiat a hawm a. Ziazaw chun, mipite zosia chu a In lam chiat un a chia kit tau hi.

²⁰ David chu a In sung mite malzawl dingin a hung kit ah. Himaleh, Saul chanu Mikhal chu David lamtua dingin a hung pawt ah, a kiang in, “Tu’ni hin Israelte lengpa chu a lopi na e! A suak numeite lak ah mi zakmaw, mi manlote gual in ngawnchang in la hung um ziang lawm lawm ah!” a tia.

²¹ David in Mikhal kiang ah chun, “Lalpa, la pa leh a Inkuanpite zosia thasâng ah, Lalpa mipi Israelte zosia chung ah leng hiding ah ei têlpa, ama Lalpa ma-âng ah lâm ka hi.

²² Zia sâng ah kha zâpi um zaw ah le um nalai ding ka hi; keima mit mu ziang ah le bangmalo gual in hung um nalai ding ka hi; himaleh, nang in la gen suaknute mit mu ah chun ja um tak hi tho tho ding ka hi,” ti’n a dawnhu a.

²³ Tichun, Saul chanu Mikhal chun a thi tiang in cha him him a nei puai.