2 SAMUEL 5 - PATHIAN LEKHABU THIANGTHO (BSI)

Israel Nam Pumpi Chung ah Leng hi ding ah David Sathau A Nu’nau

¹ Ziazaw chun, Israel nam zosia chu Hebron ah David kiang in a hung un, a kiang in, “En tiam in, la be leh phungte ka hiu hi.

² Tu’ma lam ah Saul ka lengpau ahi lai him ah khan le, Israelte a la puidok leh a la pui lût sektu kha nangma la hi’n. Lalpa‘n la kiang in, ‘Ka mipi Israelte chingtu ding chu nangma la hi’n, Israelte chung ah vaihawm ah la pan ding ahi,’ a la ti ahi,” a vatiu a.

³ Tichun, Israel upate zosia chu Hebron ah lengpa kiang in a hung ua; Hebron ah chun Lengpa David in Lalpa ma-âng in a kiang un thuthung a siam tai; chuleh, amau inle David chu Israelte chung ah leng ah pang dingin sathau a nu’ tau hi.

⁴ David chu vai a hawm lim in kum sawmthum ah upa ahi; chun, kum sawmli sung vai a hawm hi.

⁵ Hebron ah chun Juda mipite chung ah kum sagi leh tha guk vai a hawm ah; chuleh, Jerusalem ah chun Israel mipite leh Juda mipite zosia chung in kum sawmthum leh thum sung vai a hawm hi.

Lenggam Kigawmte Khawpi Ding ah Jerusalem

⁶ David tawh a sepaite chu a gam ah a la chêngsa Jebus mite nawdok guan Jerusalem do dingin a kuandok tau a. David in zia khua chu zo ding ah amau in a la ginchâk lo ziak un, “Zia tak ah hin hung lut thei pua’n la, mitthûm leh kengbaite mai inle hun nang zo ding a hiu,” a la tiu a.

⁷ Himaleh, David in zia kulpi det Zion chu a la ta’n, zia tak chu David khawpi a hung hiden tai.

⁸ Zia ni’ chun David in, “Jebuste that gam nuam taphot chun, David in a huat ma ma kengbai leh mitthûmte chu that dingin tuiluanna kuak lam ah chun chia to uh hen,” a tia. Ziaziakchun, “Mitthum leh kengbaite chu Tempul ah a lût lo diu ahi,” a ti sek ui.

⁹ David in kulpi chu a lua den ta’n, a min inle David Khawpi a sak tai. Millo ah kipat in khawpi sung tiang huap in David in khawpi kul ding chu a siam tai.

¹⁰ Lalpa, sepai honte Pathian in a umpi ziakin, David chu a hat deu deu tai.

¹¹ David Insa dingin Tura ah Lengpa Hiram in David kiang ah sidar thing tawh, thingbawl thiamte, suangsêk thiamte tawh palai a hun sawl a.

¹² Ziaphatchun, David in a mipi Israelte chung ah Leng hiding ah Lalpa‘n ama a sukdet dan leh a mipi Israelte jal ah a lenggam chu choisân ah um ahi ti a hun hechian tai.

¹³ Hebron ah kipat Jerusalem ah a hung um phatin, David in thâikem leh ji a hun nei belap ah; tichun, David in chanute leh chapate tam tak a hun nei belap nalai hi.

¹⁴ Jerusalem ah piang, a chate min chu: Shammua, Shobab, Nathan, Solomon,

¹⁵ Ibhar, Elishua, Nepheg, Japhia,

¹⁶ Elishua, Eliada leh Eliphelet a hiu hi.

Philistinte A Nawkitnau

¹⁷ Israelte chung ah Leng hiding in David sathau a nu’ tau hi ti Philistinte chun a hun het phat un, Philistinte zosia chu David hawl in a hung kuan tau ah; himaleh, David in a la het lawk ziakin, kuldetna lam in a chia suk a.

¹⁸ Philistinte chu a hung kuan un, Rephaim phâigam ah chun a hung kitiang tau hi.

¹⁹ David chun Lalpa kiang in, “Philistinte do dingin va kuan to ding ka hi em? Amau chu ka khut in lei pia diam?” ti’n a dong a. Tichun, Lalpa‘n, “Kuan in, Philistinte chu la khut ah hun pe ngei ngei ding ka hi,” ti’n a dawnhu tai.

²⁰ Tichun, David chu Baal-perazim lam ah a chia ah, zia tak ah chun David in Philistinte chu a zo tai. David in, “Lalpa‘n ka mêlmate chu tuisânglet gual in ei naw jak piak mai hi,” ti’n a gen a. Ziaziakchun, zia mun chu Baal-perazim a sak tai.

²¹ Philistinte chun zia mun ah chun a milim pathian uh a taisan ua; David leh a sepaite chun zia chu a thak mang tau hi.

²² Zia nung ah chun khatvei Philistinte a hung kuan kit un, Rephaim phâiguam ah chun a hung kitiang kit tau a.

²³ David in Lalpa a dot phatin, zia gual hin a hun dawnhu ah: “Va zuan to ziang kiu in; a nung lam un vel unla, begaw thing bul jawn ah chun do un.

²⁴ Begaw thing chung zawn ah mi lamjawt git la het phat ua leh kipan un; Philistin sepaite nuaisia ding ah la mapui ding un Lalpa hung kuandok hiding ahi,” ti in.

²⁵ David chun Lalpa thupiak gual in a bawl ta’n; tichun, Philistinte chu Geba ah kipat Gezer tiang in a nuaisia tai.