2 SAMUEL 4 - PATHIAN LEKHABU THIANGTHO (BSI)

Ish-baal Thi’na

¹ Saul chapa Ishbaal chun Abner chu Hebron ah a thi tai ti a het phatin a hânsanna zosia a bei ta’n, Israelte zosia le a lungdong ziang tau hi.

² Saul chapa chun galbawlte hotu pani a nei ah; pakhat min chu Baanah ahi’n, a pani’na pa min chu Rekhab ahi. Amau teni hi Beeroth khua Benjaminte suan ah mi Rimmon chate a hiu a; Beeroth khua hi Benjaminte khaw lak ah simkhawmsa him a la hi.

³ (Beeroth khaw mite chu Gittaim khua’n a la galjam un, tu’ni chan hin gam dang mi gual in a chêng den nalai ui.)

⁴ Saul chapa Jonathan in chapa pakhat a nei ah, ama chu a kengbai ahi. Jezreel ah kipat Saul leh Jonathan thi thuthang a la het lai ua khan ama chu kum nga mi bep ahi nalai a. Zia lai ah chun ama donnu chun a la taipi leh a kinaw tâkluat ziakin a khetha khan, a keng chu a la sukbai khâk ahi. A min chu Mephibosheth ahi.

⁵ Sûnchang lai tak in Beeroth khua Rimmon chapate ni Rekhab tawh Baanah chu Ishbaal In ah a hung un, ama chu a la sûnchol lai tak ahi’n.

⁶ In sung lam ah gehu bu ladok ding ah kilep in, a gilpi a sut piak un; Ziazaw chun Rekhab leh Baanahte unau chu a kigêl mang tau a.

⁷ A lupna pindan ah a la lup lai tak chu lut in, a dawt lum un, a gawl a tan piak tau a. Tichun, a luchang chu Arabah lam ah jan khua’n a taipi tau hi.

⁸ Ishbaal luchang chu Hebron ah David kiang in a hun puau ah, lengpa kiang ah chun, “Zia hi la mêlmapa chapa Ishbaal luchang a hi; Saul in nangma thalup guan a la delzui zing ta maleh, tu’ hin, nang ka lengpau leh ka lal uh phuba chu Lalpa‘n, Saul leh a suante chung in a la ta ahi,” a ti tau hi.

⁹ David chun Beeroth mi, Rimmon chate Rekhab tawh a suapipa Baanah chu zia gual hin a dawnhu a: “Lau umna zosia lak ah kipat ei la hukdokpa Lalpa min chu sâl in ka gen ahi,

¹⁰ thupha hun tut ah kingai in, mi pakhat in, ‘Saul a thi tai,’ ti’n ei hung hil ah; Ziklag ah khan ama chu ka man ah, ka la that ta’n, zia chu a thutut kipakman ah ka piak a la hi.

¹¹ Migilo in mi diktat, a lupna lum hiat hiat lai vathat ziang chu a huaisia zaw hilo a hem! Tu’hin, a thisan phuba chu la lo ah, lei ah la hinkhuau hawi nalai ding ka hem?” ti in.

¹² Tichun, David in tangvalte chu thu a pia, amau chu a that tau a; a khut leh kengteu chu tanbot piak in, a pum uh chu Hebron khua dilpang ah chun a khâi tai. Himaleh, Ishbaal luchang chu a lau ah, Hebron ah Abner thân ah chun a vui tau hi.