2 SAMUEL 3 - PATHIAN LEKHABU THIANGTHO (BSI)

Abner in David A Zopna

¹ Saul chanaute tawh David chanaute kikâl ah chun kidona sawt tak a um a. David chu a hat deu deu ah, Saul chanaute chu vang a jawngkhal deu deu tau hi.

² Hebron ah a um sung un David in chapa a hun neibe jel ah, ziate chu: a chapa upa pen chu Jezreel khua Ahinoam tawh a chapau Amnon ahi;

³ a pani’na chu Karmel khua Nabal ji thi’san, Abigail tawh a chapau Khileab, ahi’n; a pathumna chu Geshur Lengpa Talmai chanu Maakah tawh a chapau Absalom ahi;

⁴ a pali’na chu Haggith tawh a chapau Adonijah ahi’n; a pangana chu Abital tawh a chapau Shephatiah ahi’n;

⁵ a pagukna chu David ji Eglah tawh a chapau Ithream ahi. Zia cheng hi Hebron ah piang David chapate chu a hiu hi.

⁶ Saul chanaute tawh David chanaute a kido sung un, Saul chanaute lak in Abner chu a hung hat deu deu ta’n.

⁷ Zia hun ah chun, Saul thâikem pakhat, a min chu Rizpah kiti, Aiah chanu a um ah. Ishbaal in Abner kiang in, “Bang ding ah ka pa thâikem kiang ah giak la hi em?” ti’n a vau a.

⁸ Ishbaal thugen ziak ah chun Abner a lungna ma ma ta’n; tichun, “Judah te â ding ah uicha luchang lei batsak a hem? Tu’ni tiang ah hin la pa Saul chanaute â ding ah ka ginumna ziakin, a suapite, a lawi leh gualte leh nang hinna hi David khut ah ka piakdaw lo ahi; ahi’n, tu’hin nang in zia numei ziak ah hin lei awimaw ahi maw?

⁹ Lalpa‘n David kiang ah a tiam gual ah keima’nle ka hipiak lo ngei ngei leh, Pathian in Abner hi a law law ei law mai hen la, a huaisia zaw diak inle ei thuk hen;

¹⁰ Dan ah kipat Beer-sheba tiang ah Saul lenggam chu ladok in, Judate leh Israelte chung ah hin David in a lalchutpha a hun tundaw lo tâk leh aw!” ti’n a dawnhu tai.

¹¹ Ishbaal in Abner chu a lau ma ma ziakin, kam khat ziang inle a dawnhu ngam ta puai.

¹² Abner chun, Hebron ah David kiang ah thu vatut dingin palai a sawl ah; “Gam hi kua â ahi em? Kei tawh pankhawmna dingin thu ei tiam inla, Israelte zosia nang lam ah a hung pan theina ding un hun panpi leng ka ti ahi,” ti’n a vagensak a.

¹³ Ama chun, “A phai, nang tawh I kikâl ah thuthung siam ing ka. Himaleh, thil pakhat hun phût ding ka hi: keima ei mu ding ah la hung phat leh, Saul chanu Mikhal kha la hun pui lo leh vang ei mu ngai ngai pua’n la,” ti’n a dawnhu tai.

¹⁴ Ziaphatchun, David in Ishbaal kiang in palai a sawl ah, a kiang in, “Philistinte zekvun za khat a man ding ah ka piaksa, ka ji Mikhal kha ei pia kit ta’n,” ti’n a vagensak a.

¹⁵ Ishbaal inle Laish chapa Paltiel tawh kicheng lai Mikhal chu a valak piak a.

¹⁶ A pawsal chun a kitonpi ah, Bahurim chan ah kap kawm kawm in a zui pek ah. Ziaphatchun, Abner in a kiang in, “In lam ah chia kit in,” ti’n a sawl tai. Tichun, a chia kit tai.

¹⁷ Abner in Israel upate kiang ah chun thu a thot ah, “Hun bang chan a hem sung kha la chung ua leng ah pang ding ah David kha hawl hawl hilo la hiu em?

¹⁸ Lalpa‘n David kiang ah: Ka suak David mangcha’n ka mipi Israelte chu Philistinte leh a mêlmateu zosia lak ah kipat hukdok ding ka hi, ti ah thu a la tiam kha tu’hi a hun ahi tai,” ti in.

¹⁹ Abner chun Benjaminte kiang inle langchang tak in thu a gen a; ziaphatchun, Abner chun Hebron ah David kiang in, “Israelte zosia leh Benjamin Inkuante zosia’nle lem a sau hi,” ti’n a vagen tai.

²⁰ Abner chu mi sawmni tawh kiton in, Hebron ah David kiang in a hung un, David chun Abner leh a lawite â dingin luaithe’na a siam tai.

²¹ Abner chun David kiang in, “Israelte zosia ka Lalpa lengpa kiang ah ko khawm dingin vachia ing ka tin, amau chun nang tawh kikâl ah thuthung a siam ua, nang inle la lung gual tak ah a chung ua vai la hawm theina dingin,” a tia. Tichun, David in Abner chu thamuang tak in a sawldok tai.

Joab in Abner That

²² Zia lai tak ah chun David suakte chu Joab tawh, a gâl bawlnau ah kipat gâllâk tam tak tawh a hung un. David in Abner chu a la sawldaw tak ziakin Hebron ah David kiang in Abner chu a la um talo in, thamuang tak in a la chiadok tai.

²³ Joab tawh a kiang ah sepai umte zosia a hung tun phat un, Joab kiang in, “Ner chapa Abner chu lengpa kiang in a hung ah, a kihopi zaw phatin thamuang tak in a sawl mang tai,” ti’n a hil tau hi.

²⁴ Ziaphatchun, Joab chu lengpa kiang in a chia ah, a kiang in, “Bang a hem la la bawl tak hi? Abner kha la kiang ah hung ngâl in, bang ding ah a la kihopi ah, thamuang tak ah a la chia mang kitsak ziang la hem?

²⁵ Ner chapa Abner kha nang hun thêm ah, la chia la hung leh la thilbawl zosia entha ding ah hung ei ve!” ti’n a gen tai.

²⁶ David kiang ah kipat Joab a hung pawt daw phatin, Abner delzui dingin mi a sawl ah; Sirah tuikhuk ah kipat in a hun pui kit tau ah; zia thu chu vang David in a hepuai.

²⁷ Hebron lam ah Abner a hungkile’kit phatin, Joab in kul kotkhak paw lam ah chun hoguk ding gaw dan in a pui chuam ah, zia tak ah chun a tumpi a sutthil piak tai. Tichun, Joab suapipa Asahel thisan a la sua ziak ah chun a thi ta ahi.

²⁸ Vainung lam deu ah David in zia thu chu a het phat in, “Zia Ner chapa Abner thisan chung thu ah hin, keima leh ka lenggam hin Lalpa ma âng ah bangtik chan inle thiammaw chang lo ding ka hiu.

²⁹ Joab leh a pa Inkuante zosia luchung in thiammawna chu ta hen! Joabte Inkuan lak ah hin meima nâi nei chi, phâk, tiangkhut ah lamzawt, gâl ah thi leh nêk ding bei a lak un um zing tau hen,” ti’n a samsia tai.

³⁰ Tichun, Joab tawh a suapipa Abishai chun, a suapipau Asahel kha Gibeon ah kido lai ah a la thalup ziakin Abner chu a that tau a.

³¹ Ziazaw chun, David in Joab leh a kiang ah um zosiate kiang ah chun, “La puan uh botthêk unla, saidip puan sil in Abner hi sûn un,” ti’n a gen a. Tichun, lengpa David chunle a luang chu a zui tai.

³² Abner chu Hebron ah a vui tau a. Lengpa chu Abner khûl ah chun a kap ta’n, mipi zosia chule a kap chiat tau a.

³³ Abner sûnna’n lengpa chun zia gual hin Kâ La a sa tai: “Mingol thi ah maw Abner la thi mai?

³⁴ La khutte chu kân a hipua’n, la kengte chule kol busak ahi puai; mi nunsiate gual mai in la thi ta mai hi!” ti in. Tichun, mipi zosia chule a kap kit tau a.

³⁵ Mipi zosia chun nitum masang ah bang a hem bêk ne dingin David chu a sawl un; himaleh, David chun, “Nisa tum masang ah an hileh nêkthei thil bang hiziang leh le ka nêk chun, Pathian in a law law ei law mai zaw hen,” ti’n a kitiam tai.

³⁶ Mipi zosia’n thil umdan chu a mu chiat un, a lungawi chiat tau a; lengpa’n a bawl taphot chu mipite’n le pha a sa chiat tau hi.

³⁷ Zia ni’ kipat chun Ner chapa Abner kitha’na chung ah hin lengpa’n maw a paw puai ti, Israelte zosia leh mipite zosia chun a hechiat tau a.

³⁸ Lengpa chun a sepaite kiang in, “Tu’ni hin Israelte lak ah lal chapa leh milian pakhat thi ahi lam he lo la hiu em?

³⁹ Tu’ni hin sathaunu’, a la hilengle thunei zo lo ka hi. Zia Zeruiah chapate hi kei â dingin a thok hak ma mau hi. Zia tawhbang thil bawlte hi Lalpa‘n a nunsiatnau tawh kituak in a chung un dit kit zaw mai ta hen!” ti’n a gen tai.