2 SAMUEL 23 - PATHIAN LEKHABU THIANGTHO (BSI)

David Kamsuak Nunungte

¹ Tu’hin, ziate hi David kamsuak nunung pente chu ahi: Pathian in a choisân, Jakob Pathian in sathau a nu’ leh, Israelte Mi Hatpa doisakna changpa, Jesse chapa David thugente chu:

² Lalpa thagau in keima kipat thu a gen ah, a thu ka lei ah hin a um hi.

³ Israelte Pathian in thu a gen in, Israelte suangpi chun ka kiang in thu a la gen a; mipite chung ah dik tak ah vaihawm, Pathian lau kawm ah vaihawmpa chu,

⁴ jingkal khawvak lim gual leh, sûmpi umlo jingkal ah nisa suak gual leh; hampa chung ah gawzu, val sit set gual chu ahi.

⁵ Pathian âng in ka Insung mi chu zia gual hi hilo a hem? Ama chun kei tawh kumtuang dai ding thuthung a siam ta’n, bangkim kitup leh det tak in a um tai. Ka thangai leh ka lungtup zosia chu, ama’n ei lawtinsak lo ding a hem?

⁶ Himaleh, Pathian ngaisak lote chu vang, ling kipaimang tawhbang bep a hiu; khutngawn ah vachom daw thei a hita paw’ngal un;

⁷ zia vakhoi dingte chun thik leh, hiamhei a choi uh ngai in a. A umna mun ma mau in mei ah hâltum hita’n au.

David Sepai Liante

⁸ David in sepai hat a neite min chu ziate hi a hiu: Tahkhemon mi Joshebbasshebeth; ama chu a sepai hat Pathumte lak ah lian pen a hi’n; ama hin a cheicha bep mang in, khatvei kidona’n mi za giat a that hi.

⁹ Ama bân ah sepai hat pathumte lak ah chun, Aholi tupa Dodo chapa Eleazar ahi. Amau in Philistinte kido ding ah hung kuante a la cho lai ua khan, ama’n David a umpi ah. Israelte chu a jammang zo tau in,

¹⁰ himaleh, ama chu det tak in a pang ah. A khut kham ma ma tiang tiang inle Philistinte chu a sat pai pek ah, a chemjam chu a tha’suak kha puai. Zia ni’ chun Lalpa‘n galzawna thupi tak a piai. Zia nung ah chun mipite chu a kiang in a hung nungkit un, mi thisate kithuamna lâkpiak ding bep a hitau hi.

¹¹ Ama bân ah chun, Harari mi Agi chapa Shammah ahi. Lehi mun ah chun be lei pha tak a um ah; zia tak ah chun Philistinte a kiko khawm un; sepaite chu Philistinte lau in a jamsia tau a.

¹² Himaleh, ama hin lou lailung ah chun panmun a siam ah, a humbit in, Philistinte chu a that ta’n; tichun Lalpa‘n zaw’na thupi tak a hun tunsak tai.

¹³ Bu ât hun tîlvel ah hin, Adullam kawlbûk ah David lam ah pang dingin khaw hausa sawmthum a vachia suk un, zia lai tak ah chun Rephaim phâijawl ah Philistinte hon khat a kikul un.

¹⁴ David chu kul det tak sung in a um ta’n; Philistin sepaite le Beth-lehem ah a um un.

¹⁵ David chun, “Beth-lehem kul kotkhak bul ah tuikul ah tui kha ei vakhai piak ding um ta ma leh chu aw!” ti’n a thûm vung vung ta’n.

¹⁶ Ziaphatchun, a sepai hat pathumte chun Philistinte giamun chu hawtheng in, Beth-lehem khua kul kotkhak bul ah tui kul tui chu va thal in, David a hung pia tau a. Himaleh, ama’n a dawn nuam pua’n; Lalpa â dingin a buntha tai;

¹⁷ ama chun, “Zia chu ka bawl ding Lalpa‘n ei phal puai. Amau hinna îtcha lo khop ah zia valate thisan chu bang ti’n ke’n dawn ding ka hem?” a ti ziakin, a dawn nuam puai. Sepai hat pathumte chun zia gual chun a bawl tau hi.

¹⁸ Zeruiah chapa Abishai, Joab suapipa chu Sawmthumte lak ah hotu lian ahi. Ama’n a cheicha bep mang in mi za thum a kidopi in, a that sik sek ah; tichun, Pathumte tilo ah chun min phatna a law tai.

¹⁹ Ama chu sawmthumte lak ah chun a challang pen ahi’n, a hotu lian uh a hung hita’n; himaleh, Pathumte chu vang a tuk puai.

²⁰ Kabzeel khua Jehoiada chapa Benaiah chu mi hangsan ahi’n, ama chun thil thupi tam tak a bawl hi; Moab ah Ariel chapate pani a that in. Chuleh, vûk kiak hun lai in, kuak sung khat in a valut ah, zia tak ah chun sakeibaknei khat a vathat hi.

²¹ Aigupta milian pakhat, mêlpha tak khat le a that a. Aigupta mipa chun cheicha a chawi ah; Benaiah in mol chawi in, Aigupta mi chu a kidelpi ah; a cheicha chu lâkpiak in, ama thalupna’n a mang tai.

²² Zia gual chun Jehoiada chapa Benaiah chun thil a bawl hi; mihat pathumte tilo ah chun min phatna a law tai.

²³ Sawmthumte lak ah chun a challang zo hi; himaleh, Pathumte chu vang a tuk puai. Tichun, David in ama vêngtute lak ah hotu’n a pansak tai.

²⁴ Sawmthumte lak ah pangte chu: Joab suapipa Asahel, Beth-lehem mi Dodo chapa Elhanan;

²⁵ Harod khua Shammah; Harod khua Elika;

²⁶ Palti mi Helez; Tekoa khua Ikkesh chapa Ira;

²⁷ Anathoth khua Abiezar; Hushath mi Mebunnai;

²⁸ Aholi mi Zalmon; Netophah mi Maharai;

²⁹ Netophah mi Baanah chapa Heleb; Benjamin phung ah Gibeah khua Ribai chapa Ittai;

³⁰ Pirathon khua Benaiah; Gaash kenliang ah um Hiddai;

³¹ Abath mi Abi-albon; Bahurim ah Azmaveth;

³² Shaalbon khua Eliahba; Jashen chate: Jonathan,

³³ Harar mi Shammah; Harar mi Sharar chapa Ahiam;

³⁴ Maakah khua Ahashai chapa Eliphelet; Gilon mi Ahithophel chapa Eliam;

³⁵ Karmel khua Hezro; Arbi mi Paarai;

³⁶ Zobah khua Nathan chapa Igal; Gad mi Bani;

³⁷ Ammon mi Zelek; Beeroth khua Naharai, Zeruiah chapa Joab gâlvan chawipa kha ahi’n;

³⁸ Ittai mi Ira; Ithri mi Gareb;

³⁹ Hit mi Uriah tawh, a leng un sawmthum leh sagi a hiu hi.