2 SAMUEL 22 - PATHIAN LEKHABU THIANGTHO (BSI)

David Pâkna La

¹ Lalpa‘n a mêlmate zosia leh Saul ah kipat a hukdaw phatin, David in zia La hi Lalpa kiang in a sa tai:

² Ama chun: Lalpa chu ka suangpi, ka kulpi, ei hukdampa leh,

³ ka Pathian, ka suangpi leh ka kisêlna ahi’n, ka phaw leh ka hukdamna kî, ka kuldet leh ka kisêlna, ka hukdampa ahi; nang in thagum suate lak ah kipat in lei hukdok tai.

⁴ Lalpa chu ka ko in, ama chu pâk tâk him ahi’n, ka gâlte lak ah kipat hukdaw ka hi tai.

⁵ Thi’na tuifawn in ei chup ta’n, siatna tuikhang in ei subuai in;

⁶ Sheol khauhual in ei kântom ta’n, thi’na thâng in ei dâl hi.

⁷ Ka lungjin lai in Lalpa ka ko ah; ka Pathian ka ko ahi. A tempul ah kipat in ka aw a hia’n, ka kiko thawm chu a bil in a he tai.

⁸ Ziaphatchun, lei chu a kizial in a kilîng ah; ama lungnat ziakin van kingaknate chu a kithing in, a kilîng tau hi.

⁹ A nâk hawm ah kipat meikhu a pawt in, a kam ah kipat in hâltumna mei a kuangdok in, zia chun meihol le a al lut lut sak hi.

¹⁰ Vante chu a kai khûn ah, a hung suk in; a keng nuai in thimna sâ tak a um hi.

¹¹ Cherub chung in a chuang ah a leng ta’n, huite chung lam pek in ama chu a kimu tai.

¹² Ama ûm kîmvêl thimna, sûmpi leh tuifawnte chu, kisêlna bûk in a mang hi.

¹³ A ma-âng ah vak nasa tak ziakin, suangmeihol le a kuangdok hi.

¹⁴ Lalpa chun vanpi a gitsak in, Chungnung penpa chun a aw a sua tai.

¹⁵ Thalchangte a sawldok in, amau a thejak in, kawlphe’n a naw mang tai.

¹⁶ Ziaphatchun, tuisuagiat lampite chu a hung kilang ta’n, Lalpa‘n a nâk hawm ah a hu thâdaw ah, a vauna ziakin, khawvel leilung kingaknate chu suklat ahi tai.

¹⁷ Sâng tak ah kipat in ei hun bân ah, tui nasa tak lak ah kipat in ei kaidok tai.

¹⁸ Ka mêlma hat tak ei muda ma ma te lak ah kipat chun, ei hukdok a; amau chu kei â dingin a hât talua ngâl un.

¹⁹ Siat ka tuak ni’n a hung kuan un, himaleh, Lalpa chu ka kingakna ahi.

²⁰ Mun thawveng tak in ei pui lût ah, keima ah a kipak ziakin, ei hukdok tai.

²¹ Ka dikna dungzui in Lalpa‘n kipakman ei piai; ka khut nasepte a thiantho dungzui in ei dit ta ahi.

²² Lalpa dante chu ka zui in, ka Pathian ah kipat nunsia tak in ka jam mang paw’ngâl a.

²³ A vaihawmna dan zosia ka ma’n a um in, a thuguatte chu ka pêl ngai puai.

²⁴ A ma-âng ah demna bei ka hi’n, diklona kipat ka kihêmdok sek hi.

²⁵ Ziaziakchun, ka dikna tawh kigûn in, a mit mu ah ka thiantho tawh kigûn in, Lalpa‘n ei dit tai.

²⁶ Mi ginumte kiang ah la ginumna la latsak in, mi demkailote kiang in la demkai lona la latsak hi;

²⁷ mi lungthim thiangte kiang in, la lungthim thianna la latsak in, mi lungkawite kiang in, chinchanbei tak in la kilang sek hi.

²⁸ Mi kingainiamte chu la hukdok in, himaleh, la mit chun mi huhamte a kiak theina ding un, la châng zing sek hi.

²⁹ Ahi, aw Lalpa, nang chu ka thaumei la hi, Lalpa‘n ka thimna lei hivâk piak tai.

³⁰ Nang ziakin sepai hon ka zo thei in, ka Pathian jal in kulbâng ka chopkhûp thei hi.

³¹ Zia Pathian hi a dik bukim in; Lalpa thutiam chu a guitung hi; ama bêl zosiate â dingin phaw ahi.

³² Lalpa tilo Pathian kua dang a um em? I Pathian uh ti lo ngâl suangpi dang a um ah a hem?

³³ Hâtna ka tâi ei gâkpa Pathian chun, ka lampi ding lian tak in ei hon piak hi.

³⁴ Ka kengte hi sazuk keng gual in ei siam piak a, munsâng ah bit tak in ei koi tai.

³⁵ Ka khutte hi gâldo dan ei zil thiamsak ah, ka khutbân in sum-eng thalpi, lawi thep zo ding khop in ei hi’hat hi.

³⁶ Nang in la hukdamna phaw leipe ta’n, lei panpi’na zal in lei sulian tai.

³⁷ Thawveng tak ah taitheina lei pia’n, ka kengte chunle a chuanthol ngai puai.

³⁸ Ka mêlmate ka delzui in ka that tai, ka zawthian masia ka nungjam puai.

³⁹ Ka that gam ta’n; a hung thawkit lona ding un ka chuan buang ah; ka keng nuai in a kipuk zo tau hi.

⁴⁰ Galdo dingin hatna’n lei thuam in, ei do’te chu ka ma’n la pûk lut sak tai.

⁴¹ Ka mêlmate ka ma’n la jam sak in, ei mudate chu ka that gam tai.

⁴² A en vêl un, maleh amau hukdok ding kuama a um puai; Lalpa kiang in a kapdok unla, himaleh, ama’n a dawnhu puai.

⁴³ Leivui gual in ka khen buang ta’n, lampi chung ah buanthuak gual in ka chil tai.

⁴⁴ Mipite tawh kisubuai lo dingin ei hukdok a, namte luchang in lei siam ah; ka het ngai lo mite’n ka na a sêm tau hi.

⁴⁵ Gamdang mite ka kiang in a hung kitulut un; ka chanchin a het phat ua leh, ka thu a jawm ngâl sek ui.

⁴⁶ Gamdang mite a lungthuai zo tau in, A kulpiu ah kipat kithing sa’n a hung pawtdok tau hi.

⁴⁷ Lalpa chu a hing hi! Ka suangpi chu pâk in um hen la; ka hukdamna suangpi leh ka Pathian chu, choisân in um hen;

⁴⁸ mite ei chot densak ah phuba ei lâksak pa Pathian;

⁴⁹ ka mêlmate lak ah ei hukdokpa; nang in ka gâlte zosia chung ah lei dom sâng ah, thagum sua chîng mite lak ah kipat lei hukdok tai.

⁵⁰ Ziate haw ziak ah chun aw Lalpa, namtin lak ah hun chawihoi ing ka tin, la pâkna La sa’ng ka.

⁵¹ A lengpa â dingin ama chu, hukdamna Insâng ahi’n, David leh a suante, a sathaunu’te chung ah chun, kumtuang in ngilneina a latsak tai.