2 SAMUEL 21 - PATHIAN LEKHABU THIANGTHO (BSI)

David in Gibeonte Phuba A Lâkpiakna

¹ David hun lai ah chun kum thum sung a kizom in kial a hung tung ta’n; tichun, David in Lalpa a dong a. Lalpa‘n a kiang in, “Saul in Gibeon mite a thalup ziakin, ama leh a Inkuante’n thisan maw a puau hi,” ti’n a hun dawnhu a.

² Tichun, lengpa chun Gibeonte chu a ko khawm ah, a kiang un thu a gen a. (Gibeonte hi Israel mite hilo in, Amor mi a la hiu ah; Israel mipite chun amau chu hing hawi ding ah thu a la tiam uh ahi’n; himaleh, Saul in Israelte leh Judate â ding ah a phatchuam ngaina lam in tha chimit a la gua ahi.)

³ David in Gibeon mite kiang ah chun, “Bang ka hun bawl piak diam? Lalpa gochante hi la malzawl theina ding un bang gual ah kitatna hun bawl piak ding ka hem?” a tia.

⁴ Gibeonte chun a kiang in, “Kei haw tawh Saul leh a Inkuante kikâl thu hi dangka leh sana thu a hipua’n, Israelte lak ah khat chale ka thalupna ding thuu a um diak puai,” ti’n a dawnhuu a. Ziaphatchun ama’n, “Bang hun bawl piak leng lei tiu em?” a tia.

⁵ Lengpa kiang ah chun, “Israelte gam sung zosia ah um thei lo ding ah ei bawl leh ei sukmangthai gua, ei sukbei gua mipa hi–

⁶ A chapa sagite chu ka khut un ei pedok inla, amau chu Lalpa tâng ah, Gibeon ah Lalpa âng ah khâilum ding ka hiu,” ti’n a don tau a. Lengpa chun, “Hun pedok ding ka hi,” a ti tai.

⁷ Himaleh, Saul chapa Jonathan tawh David kikâl ah Lalpa hetpi ah kitiamna a la nei ziak un, Saul chapa Jonathan chapa Mephibosheth chu vang a pedok puai.

⁸ Lengpa chun Aiah chanu Rizpah in Saul a hinpiak, a chapa panite, Armoni tawh Mephibosheth chu tawh, Meholath mi, Barzillai chapa, Adriel in a ji Saul chanu Mikhal tawh a hinteu pawsal pangate chu a hun puidok a;

⁹ Gibeonte khut in a pedok a; amau chun tâng chung ah chun Lalpa mit mu in a khâilum tau a. Zia mi pasagite chu a thi zo tau a. Bu lâk pat ni, barli bu lâk pat ni chun thalup a hitau hi.

¹⁰ Ziaphatchun, Aiah chanu Rizpah chun saidip puan a la, zia suangpi chung ah chun a phâ ah, bulâk pat lim ah kipat van gua a zuk kit tiang in zia tak ah chun a um den ah; a luang uh chu sun ah chunglêng vachate leh jan ah gamsate’n a hung nêk lona ding un a veng ta’n.

¹¹ Aiah chanu, Saul thâikem Rizpah thil bawlte chu David a hil phat un,

¹² David a kuan ah, Saul gute leh a chapa Jonathan gute, Philistinte’n Gilboah ah Saul a thalup niu ah Philistinte’n Beth-shan ah a khai nau ah kipat Jabesh-gilead mite’n a la gukdawu kha a vala khawm a.

¹³ Zia kipat chun Saul gute leh a chapa Jonathan gute chu a vala to ah; chuleh, a khailupteu gute haw chule a lakhawm tau hi.

¹⁴ Saul gute leh a chapa Jonathan gute chu Benjamin gam ah Zela khua a pa Kish thân ah chun a vui tau a; lengpa thupiak zosia chu a bawl tau hi. Ziazaw chun, gam sung â ding ah dotnate chu Pathian in a ngaisak tai.

David Sepaite Gâlbawlna

¹⁵ Philistinte chun Israelte a hun do kit un, David le a sepaite tawh a kuantha suk tau a. Philistinte tawh a kido ua, David chu a hung chau tha ziang tai.

¹⁶ Miliante suan ah mi, Ishbi-benob chu, a cheicha mai mai le sum-eng shekel za thum ah gik ahi’n; ama chu galvan thak in a kithuam ah, David that dingin a hung kuan a.

¹⁷ Himaleh, Zeruiah chapa Abishai chun a hung panpi ah, Philistin mi chu a do ah, a that tai. Ziaphatchun, David sepaite chu a kiang in a hung kitiam ua, “Israelte thaumei la thi’saklona ding in, tu’khêl gâldo ah ka lak un la hung pan tâk lo ding ahi,” a ti tau hi.

¹⁸ Zia nung ah chun, Gob ah Philistinte tawh kido’na a um kit ah; zia tak ah chun Hushath mi Sibbekai in, miliante suan lak ah mi, Saph chu a that hi.

¹⁹ Gob ah Philistinte tawh kido’na a hung um kit in; zia tak ah chun Beth-lehem ah mi, Jaare-oregim chapa Ethanan chun Git mi Goliath chu a that ah, ama cheicha lung chu puan-gatte tinbupi tia zet ah lian ahi.

²⁰ Gath khua’nle kido’na a um kit ah; zia tak ah chun milian tak khat, khutzung paguk gêl leh, kengzung le paguk, a leng ah sawmni leh li nei hi a um in; ama chule miliante suan lak ah mi ahi’n.

²¹ Ama’n Israelte a hun cho phatin, David suapi Jonathan chapa Shimei in a that tai.

²² Zia mi palite chu Gath khua miliante suan leh pâk a hiu ah; a leng un David leh a sepaite khut in a thi chiat tau hi.