2 SAMUEL 2 - PATHIAN LEKHABU THIANGTHO (BSI)

Judai Gam Lengpa Ding ah David Sathau Nu’na

¹ Zia nung ah chun, David in Lalpa chu a dong a, “Judai gam ah khawpite pakhat pen pen hi do dingin kuan to ding ka hem?” a ti’n. Lalpa‘n a kiang in, “Kuan to in,” ti’n a dawnhu a. David in, “Khoi tak pen ka zuan diam?” ti’n a dong a. Ama’n, “Hebron zuan in,” ti’n a dawnhu a.

² Tichun, David in zia khawpi chu a zuan to ta’n, a jite ni, Jezreel mi Ahinoam tawh, Karmel khua Nabal in a thi’san a ji Abigail inle a zui ua.

³ David in a kiang ah um zosia chule a Inkuanteu tawh a pui to a; Hebron kiang ah chun a chênsak tai.

⁴ Ziaphatchun, Judah mipite chu a hung khawm tau a, zia mun ah chun Judah Inkuante chung ah Leng hidingin David chu sathau a nu’ tau hi. David in, “Saul kha Jabesh-gilead ah mite’n a la vui tau hi,” ti a het phat in,

⁵ Jabesh-gilead ah mipite kiang in thangko a sawl ah, a kiang un, “La lal uh Saul â ding ah la ginumnau tak lang ah pha tak ah la la vui tâk ziak un, Lalpa‘n hun malzawl hen!

⁶ Tu’hin, Lalpa chun a ngilneina leh a ginumna la chung un latsak ta hen! Chuleh, zia thil la bawl ziak ua hin, keima’nle kipakman hun pia ding ka hi.

⁷ Ziaziakchun, la khutteu chu suk-hat hi hen la, hangsan tak in um un; la lalpau Saul chu a thi ta ngal in, chuleh, Judah Inkuante’n a chung ua Leng hi dingin sathau ei nu’ ta’ngal un,” ti’n a vagensak tai.

Ish-bosheth Israelte Leng ah A Panna

⁸ Himaleh, Saul sepai hotu Ner chapa Abner chun, Saul chapa Ish-bosheth chu Mahanaim lam in a hun pui tung a.

⁹ Gilead, Ashur, Jezreel, Ephraim, Benjamin leh Israelte zosia chung ah Leng dingin a siam tai.

¹⁰ Saul chapa Ish-bosheth chu Israelte chung ah vaihawm ah a pan ah chun kum sawmli upa ahi; chuleh, kum ni sung bep vai a hawm ah. Himaleh, Judah Inkuante’n vang David nung a zui ua.

¹¹ Hebron ah David leng ah pang ah, Judah Inkuante chung ah a vaihawm sung chu kum sagi leh thaguk ahi.

Gibeon ah Kido’na

¹² Ner chapa Abner leh Saul chapa Ish-bosheth suakte chu Mahanaim ah kipat pawtdok in Gibeon a hung tung un.

¹³ Zeruiah chapa Joab tawh David suakte chu a vâk dawu leh, Gibeon dilpang ah chun a kisitua tau a. Dilpang langkhat gêl in a pang tau hi.

¹⁴ Abner chun Joab kiang in, “Tangvalte zendok hi tin, A jat kibang gêl in I âng ah kisual sak hi ti,” ti’n a hun gen a. Joab inle, “Hung pawtdok uh hen,” a ti tai.

¹⁵ Tichun, a hung kuandok tau a, Benjamin leh Saul chapa Ish-bosheth lam ah pang mi sawm leh ni tawh, David lam ah pang mi sawm leh ni a hung kipandok tau a.

¹⁶ A kituakpiteu chiat luchang chu tuchak in, a pangcheu chemjam in a kidawt tua chiat tau ah; tichun, a kipuk khawm sik sek tau a. Ziaziak chun, zia mun chu Helkatha-hazzurim a sak tau ah, zia chu Gibeon gam sung ah um ahi.

¹⁷ Zia ni’ kidona chu a huaisia ma ma ah; Abner leh Israel sepaite chu David suakte chun a zo dim dem tau hi.

¹⁸ Zeruiah chapate pathum, Joab, Abishai leh Asahel cheng chule a um un. Asahel chan-gan dan chu zukchal huhel tawh bang hial ahi.

¹⁹ Asahel in Abner chu a del ah, a vei leh chang don lo in a del zui ta’n.

²⁰ Abner chun a vak nung et ah, a kiang in, “Asahel kha la hem?” ti’n a dong a. Ama chun, “Aw, ka hi,” ti’n a dawnhu a.

²¹ Abner in a kiang in, “La changlam a hem, la veilam a hem ah kihei inla, tangvalte lak ah khat man inla, a thil neite kilak ziang in,” a tia. Himaleh, Asahel in ama del chu a haisan nuam puai.

²² Abner chun Asahel kiang in, “Ei del ta kin; bang ding ah lei tual tawh hun sun dên mai ding ka hem? La suapipa Joab ma-âng ah bang ti kilak ding ka hi em?” a ti kit a.

²³ Himaleh, a del chu a chawl nuam diak puai. Tichun, Abner in a cheicha le’lam ah chun a gilpi a dawt piak ah, a cheicha chun a sunlet ta mai hi. Zia tak ah chun a kiseppai ah, a thi den tai. Chuleh, Asahel kisepaina a thi’na mun hun haw kha taphot chu, zia mun ah chun chomkhat a ding den têi sek tau hi.

²⁴ Himaleh, Joab tawh Abishai in Abner chu a delzui un. Nisa tum ding kuan in, Gibeon gamthip zotna lam ah Giah lamkai, Ammah tângdung a hung tung tau a.

²⁵ Benjaminte chu hon khat ah kisiam in Abner huk ding ah a la pang ua; tângvûm lam in a chângpang tau a.

²⁶ Ziaphatchun, Abner in Joab a hun ko ah, “Chemjam pan zing nalai ding I hiu em? A tawp leh kihuatna’n hung dim ding a hi ti helo la hem? Sepaite chu a suapiteu del talo ding ah bangtik leh thotân gua la hi tam?” ti’n a hun ho a.

²⁷ Joab in, “Pathian min in ka gen ahi: zia gual ah chun hun gen lo hi ngei ngei lechin, ka sepaite’n jingkal kit tiang hial in a suapiteu hun delzui nalai ding a hiu,” ti’n a dawnhu tai.

²⁸ Joab chun a pengkul a mut ah, a sepaite chu a kichawl tau ah; zia nung ah chun Israelte delzui talo in, a kidopi diak ta puau hi.

²⁹ Abner tawh a sepaite chu Arabah ah jan khawvak ah chia in, Jordan lui a gâl kâi tau ah; sûnma lam sia a chia kit zaw nung un Mahanaim a tung tau a.

³⁰ Joab chu Abner a delna kipat hung kile’kit in, a sepaite a ko khawm phatin David suakte lak ah mi, Asahel sim lo in sawm leh pakua a mansuau a.

³¹ Ahi’n, David sepaite chun Abner sepaite lak ah Benjamin mite chu za thum leh sawmguk a that tau.

³² Asahel luang chu a lau ah, Beth-lehem khua, a pa thân mun ah chun a vui tau a. Jan khawvak in Joab tawh a sepaite chun lam a zawt un, Hebron a tun un khua a vâk pan bep hi.