2 SAMUEL 17 - PATHIAN LEKHABU THIANGTHO (BSI)

¹ Zia lo ah chun, Ahithophel in Absalom kiang in, “Mi sîng khat leh sang ni teldok ing ka, tu’jan ma ma’ hin David delzui dingin kipan ing kau.

² Chawl leh lungthuai tak ah a um lai tak in vabulu leng buaisia gawp mai ding ahi; chutileh, a kiang ah mipi zosia chu taijak mai ding a hiu. Lengpa bep chu that ing ka tin uh,

³ mipite chu vang mo nuakjam, a pawsal kiang ah hung kit gual in la kiang ah hun pui mai ding ka hiu. Mi pakhat bep la hawl ahi’n, mipi dang zosia chu thamuang tak in um ziang thei ding a hiu,” ti’n a gen a.

⁴ Zia thuhilna chu Absalom leh Israel upate zosia’n lem a sa tau hi.

Hushai Lemguatna

⁵ Ziaphatchun, Absalom in, “Arkha mi Hushai le hun ko tiam un, ama’nle bang gual in a gen diam ngai tiam hitiu,” ti’n a gen a.

⁶ Absalom kiang ah Hushai a hung phatin, Absalom in a kiang in, “Ahithophel in zia gual chun a gen ah; ama ei hilna gual ah chun bawl ding I hiu em?” ti’n a dong a.

⁷ Ziaphatchun, Hushai in Absalom kiang in, “Ahithophel lemguatna chu tu’hun ah hin a pha puai,” ti’n a dawnhu a.

⁸ Hushai in, “La pa tawh a mite chu gamlak ah savom no kiluak piak gual ah lungna a hiu ti la hia’i. Zia bep chule hilo in, la pa chu gâl bawldan thiam tak ahi ziakin, tu’jan ah hin a sepaite lak ah umlo ding ahi.

⁹ Tu’ziang ah hinle, kawlhawm khat a hem, mun dang khat a hem ah kiselgu ta ding ahi. I sepaiteu lak ah khat to in a do phat ua leh, zia husa chu a la he tapo chun, ‘Absalom nungzui sepaite chu a thi gei gui ziang ui,’ hun ti’n au.

¹⁰ Ziaphat chuleh, sakeibaknei gual ah hangsante nasan chu hung lungthuai ding a hiu; Israel mi zosia’n la pa gâlhat dan leh ama lam ah pang sepaite gâlhat dan a hiatsau ahi ngal in.

¹¹ Zia sâng ah chun, Dan ah kipat’ Beer-sheba tiang ah mipi, tuisuagiat pâm ah piaunêl gual ah tam in kikokhawm hen la, gâl do dingin nangma ma’n ma pui zaw lechin ka ti ahi.

¹² Tichun, a umna ding ah kilawmna taphot chu daikia gual in dâpsuak zawleu hin; chutileh, ama suakcha pua’n tin, a kiang ah umte le suakcha diak pua’n au.

¹³ Khawpi khat pen pen ah a tailut leh, Israel mi zosia’n zia khawpi chu khauhual ah kai chim in, phâijawl tawh kikim in kai puk leu hin, suangchang khat ziangle mukhial umlo ding khop in bawl leu hin a cham hita ding a hem,” a tia.

¹⁴ Absalom tawh Israelte zosia chun, “Arkha mi Hushai lemguat dan chu Ahithophel lemguatna sâng in a pha zawi,” a ti chiat tau a. Lalpa chun Absalom chung ah siatna a tunsak theina dingin, Ahithophel lemguatna pha tak chu bangmalo sua dingin Lalpa‘n a la lemguatsa ahi ta’ngal a.

Hushai in David Jam Ding ah Hil

¹⁵ Ziaphatchun, Hushai in thiampu Zadok tawh Abiathar kiang ah chun, “Ahithophel in zia gual ah chun Absalom leh Israel mipite chu lem a la guatpi sek in; ke’n le zia gual chun lem ka la guat piak sek in.

¹⁶ Ziaziakchun, kin tak in mi sawl inla, David kiang in, ‘Tu’jan ah hin gamthip tângbul ah giak lo in, a thei liai leh gâl kâi un, achutiloleh lengpa leh a kiang ah mipi zosia chu val zaw ah hung um mai ding a hiu,’ ti’n vahil sak in,” ti’n a sawl a.

¹⁷ Khawpi sung ah a hung lut uh kuama’n a mu lona dingin, Jonathan leh Ahimaz chun En-rogel ah a la ngak zing ua; suak nungak pakhat in chanchin a hung hil sek ah, zia chu amau in lengpa David kiang ah a vahilsawn sek uh ahi’n.

¹⁸ Himaleh, pawsal naupang pakhat in amau chu a la mu’n, Absalom kiang in a vahil ta’n; tichun, a paniu in kin tak in a chia tau ah, Behurim ah mi pakhat In ah a hung tung tau ah, zia pa chun a In kiang ah chun tuikul pakhat a nei in; zia sung ah chun a lut tau a.

¹⁹ In neinu chun tuikul chu a sîn ah, a sit chung ah bu a pho phat in bangma ginmaw ding a um ta puai.

²⁰ Absalom sepaite chu zia numei In a hung tun phat un a kiang in, “Ahimaz leh Jonathan kha khoilam a tung tau em?” ti’n a dong un. Numei chun a kiang un, “Lui gâl lam a kâiman tau hi,” ti’n a dawnhu ah. A hawl un a mu zaw tâk lo phat un, Jerusalem lam in a vaikit tau hi.

²¹ Amau chia mang nung in amau teni chu tuikul ah kipat a hung pawtdok un, Lengpa David kiang in thil umdan chu a hil tau a. David kiang ah chun, “Kin tak in chiau inla, luigâl lam gâl kâi un; Ahithophel in la siatna ding ngaitua in lem a guat ta’ngal a,” a tiu a.

²² Tichun, David tawh a kiang ah um zosia chu a kipandok un, Jordan lui a gâl kâi tau ah; jingkal khawvak phatin khat chale a gâl kâi lo a um ta puau hi.

²³ Ahithophel chun a lemguatna a zui puau hi ti a het phat in, a sabiltung chung ah chuang in, khawpi lam ah a In zuan in a chia tai. A Insung a suktup zaw phatin a kikhâi lum ta’n; a thi phatin a pa thânkhuk in a vui tau hi.

²⁴ Absalom chu Israel mi zosia tawh a gâl kâi sung un, David chu Mahaniam khua a tung ta’n.

²⁵ Absalom in a sepai hotu lianpen Joab thasâng in Amasa chu a pansak a. Amasa chu Ishmael mi Ithra chapa ahi. A nu chu Joab nu, Zeruiah suapi Nahash chanu Abigail ahi.

²⁶ Israelte leh Absalom chu Gilead gam in a kikul tau hi.

²⁷ Mahanaim khua David a tun phatin, Rabbah khua um Nahash chapa Shobi, Ammonte suan ah mi tawh, Lo-debar khua um Ammiel chapa Makhir tawh, Rogehim ah um Gilead mi Barzillai chun,

²⁸ jalkhun, kuang, lei bêl, gehu, barli, sa, bu kikang gam, be leh havai ga te,

²⁹ khuaizu leh bawngnawi kîng, belam, bawngnawi thau haw chu David tawh a kiang ah um zosiate nêk dingin a hun piau a; amau chun, “Gamthip ah sepaite chu gilkial leh dangchâk ah chawl ma ma ding a hiu in,” a ti ziak un ahi.