2 SAMUEL 16 - PATHIAN LEKHABU THIANGTHO (BSI)

David Mêlmate

¹ Chun, David in tângvûm a lêp phatin, Mephibosheth suakpa Ziba chun, sabiltung tuak bang zat a hem in a puak uh, vaithum chûn za ni leh, grep ho chûn za khat tawh, nipithei gamin thak za khat tawh, uain thawl khat dim in a la lamtua a.

² Lengpa chun Ziba kiang in, “Bang ding ah zia haw hi la hun puak a hem?” ti’n a dong ah. Ziba chun, “Zia sabiltungte hi lengpa Inkuante chuanna ding, vaithum leh theiga minthakte hi tangvalte nêk ding, chuleh, zia uain hi gamthip ah a chau taphot dawn ding ka ti ahi,” ti’n a dawnhu tai.

³ Lengpa chun, “Aleh, la pu chapa kha khoi ah um a hem?” ti’n a dong ah. Ziba chun lengpa kiang in, “Tu’ni hin Israel mipite’n ka pu lenggam chu ei pia ding a hiu, a ti ziakin, Jerusalem ah a um den tai,” ti’n a dawnhu tai.

⁴ Ziaphatchun, lengpa chun, Ziba kiang in, “Mephibosheth thil nei zosia chu tu’hin nang â ahi tai,” a ti ta’n. Ziba chun, “Ka lalpa chun, a mit mu ah doisakna ei pia zing ta hen, ti’n kingainiam tak in ka ni la hi,” a ti tai.

Shimei in David hânsia A Lawkhumna

⁵ Lengpa David chu Bahurim a tun phatin, Saul Inkuante lak ah mi pakhat, a min Shimei kiti, Gera chapa a um in. Ama chun a hun zawt kawm in hânsia a law khum malam pek a.

⁶ David chu suang in a hun sep ah, chuleh, Lengpa David suakte zosia chule suang in a hun sep ah; zia lai tak ah chun, mipi zosia leh sepai hangsan zosia chu David changlam leh veilam in a um dim lai tak uh ahi.

⁷ Shimei chun, “Chia mang in, chiamang in, tualthatpa, mi dukdak lo!

⁸ A lalna la suandaw, Saul Inkuante zosia thisan phuba chu Lalpa‘n la chung ah a hun lak a hita hi; chuleh, Lalpa‘n la lenggam chu la chapa Absalom khut ah a piak a hita hilam. En in, la chung ah siatna tung ahi tai; nang hi thisan sua hat mi la hi’ngal in,” ti’n hânsia law khum in a kiko malam pek hi.

⁹ Ziaphatchun, Zeruiah chapa Abishai in lengpa kiang ah chun, “Bang ding ah zia uicha thisa bep hin ka lengpa chu hânsia law khum mai mai a hem? Chia ing ka tin, a luchang vala ding ka hi,” a tia.

¹⁰ Himaleh, lengpa chun, “Nanghaw Zeruiah chapate haw, bang a hem la kisakla piu? Lalpa‘n a kiang ah, ‘David hânsia valaw khum in,’ a ti hi kha leh, kua’n bangti awimaw thei ding a hem?” ti’n a dawnhu a.

¹¹ David in Abishai tawh a sepaite zosia kiang ah chun, “Ka chapa ma ma’n thalup guan ei hawl ahileh, zia Benjamin mi vang chun bang bawldâ ding a hem! Limsak dâ mai un, a nop dan dan in ei hân khum mai hen, Lalpa‘n a sawl ahi ngal in.

¹² Ka lungkhamna hi Lalpa‘n ei mu piak ahi chun, tu’ni zia gual ah hânkhum ah ka umna hile Lalpa‘n a pha lam ah ei hei piak zaw mai thei tho ahi,” a tia.

¹³ Tichun, David leh a lawite chu lamlian ah chun a chia pek un, Shimei chule tângpang lam ah chun amau zawn ah chun a chia pek ah, a chia kawm in hânsia a lawkhum pek ah, suangchang leh leivui a the’khum malam pek hi.

¹⁴ Lengpa tawh a kiang ah mipi um zosia chu Jordan lui a tun phat un a chau ma ma tau a; zia tak ah chun a kichawldam tau hi.

Ahithophel Lemguatna

¹⁵ Tu’hin, Absalom tawh Israel mipite zosia chu Jerusalem khua a hung tung tau a; Ahithophel le a lak un a pang a.

¹⁶ David gualpa, Arkha mi Hushai chu Absalom kiang a hung tun phat in, Hushai in Absalom kiang ah chun, “Lengpa Damsawt hen! Lengpa Damsawt hen!” a hun tia.

¹⁷ Absalom in Hushai kiang in, “La gualpha chung ah la ginumna chu zia gual bep hi maw? Bang ding ah la gualpha chu zui lo la hem?” ti’n a dong a.

¹⁸ Hushai in Absalom kiang ah chun, “Hilo e; Lalpa‘n a têldaw pen pen leh, zia mipite leh Israelte zosia’n a têldaw pen pen uh thu’n um ing ka tin, ama lam ah chun ka pan ding ahi.

¹⁹ Kua dang na sêm diak ding ka hem? A chapa na sêm lo ding ka hia hem? La pa na ka la sep gual ah khan, nang na le ka sep ding a hi,” ti’n a dawnhu tai.

²⁰ Ziaphatchun, Absalom in Ahithophel kiang in, “Bang bawl ding I hitau em? Lem hun guat tiam in,” ti’n a dong a.

²¹ Ahithophel in Absalom kiang ah chun, “Chia inla, la pa’n lal In ngak ding ah a nutsia, a thâikemte kha valuppi in; chutileh, Israelte zosia’n la pa muda ding ah um la hi ti hia’n, la kiang ah umte’n a thau suhat chuam ma ma ding a hiu,” ti’n a hil tai.

²² Tichun, Inchung cham ah chun Absalom â dingin puanbûk a siam ua; Israel mite zosia mit mu in Absalom in a pa thâikemte chu a luppi tai.

²³ Zia lai chun, min Ahithophel lemguatte chu Pathian kiang ah kipat thupawt a batsak un; ziaziakchun, Ahithophel lemguatna chu David leh Absalom chung ah tung chu min dik a sau in, a ngaisâng ma mau hi.