2 SAMUEL 15 - PATHIAN LEKHABU THIANGTHO (BSI)

Absalom in Lalchutpha A Chû’na

¹ Zia nung ah chun, Absalom in sakol kângtalai leh sakolte chu a kiguanggal ah, a ma-âng ah tai dingin mi sawmnga le a guanggal a.

² Absalom chu jingkal ma tak ah tho in, kul kotkhak bul ah lamlian pâm ah chun a la ding sek ah; lengpa kiang ah thubuai ngaitua ding nei ah hung kuan taphotte kiang ah chun Absalom in, “Khoi tak khawpi kipat hung la hiu em?” ti’n a la dong sek a. Zia mi chun, “La suak hi Israelte phung lak ah zia chu zia kha ka hi hen,” tia a dawnhu phat leh,

³ Absalom in, “Ngai in, la thil phût chu a pha hen, a dik hi; himaleh, la thubuai hun ngaitua piak dingin lengpa’n kuama a guat puai,” a la ti jel a.

⁴ Absalom ma ma chun, “gam sung ah vaihawm ah pang hitama leng chu aw! Thubuai nei zosia chun ei hung zuan intiu in, keima’n dik tak in thu a la tan piak sek ding ka hi’n,” ti’n a gen nalai a.

⁵ Mite’n ama chibai bûk a guat tak ua leh, a bawkhup mau in a la tûk sek in, a la chibai sek a.

⁶ Lengpa kiang ah thubuai tut gua chia, Israel mi zosiate kiang ah chun Absalom in zia gual chun a la bawl sek ah; tichun, Absalom in Israel mipite zosia lungthim chu a la hîp mang tai.

⁷ Kum li zaw ah chun Absalom in lengpa kiang in, “Lungsiat tak in Hebron khua Lalpa kiang ah ka la kitiamna ka vasukpitin theina dingin ei chiasak in.

⁸ Aram gam ah Geshur ah ka va um sung ah khan la suak in: Lalpa‘n dam ah Jerusalem khua ei pui tung kit chun, Hebron khua’n Lalpa ka vaho tei tei ding ahi, ti’n kitiamna ka la bawl hen,” a tia.

⁹ Lengpa chun, a kiang in, “Thamuang tak in chia ta’n,” ti’n a gen a. Tichun, a kipan ah, Hebron lam in a chia tai.

¹⁰ Himaleh, Absalom in Israelte zosia lak ah chun a gûk ah ama lam ah pang thangko dingte a la sawl masa, amau chun, “Pengkul git la het phat phat ua leh, ‘Absalom chu Hebron ah lengpa ahi tai,’ ti’n la kiko chiat diu ahi,” ti’n a la gen suak tau hi.

¹¹ Jerusalem ah kipat in mi za ni’n Absalom a hun zuidok un; ziate chu a kitonpi ding ah chial a hiu ah, amau chun bangma thu leh la helo ah, lungthim thiangtho tak in a la zui uh ahi’n.

¹² Absalom in a kithoi pet ah chun Giloh khua David thudot pen, Gilon mi Ahithophel chu a ko ah. A thusawmgûk uh chu a hat deu deu in, Absalom lam ah pang mite chu a pung deu deu tau hi.

Jerusalem’ Kipat David Jamna

¹³ Thangko pakhat David kiang in a hung ah, a kiang in, “Israelte lungthim hi Absalom lam ngen in a kihei zo tau hi” a hung tia.

¹⁴ Ziaphatchun, David in Jerusalem ah a kiang ah um milian leh lengte zosia kiang ah chun, “Kipan un la, jam mai hi tiu, achutiloleh, Absalom khut ah kipat suakcha puai tiu. Kin un, ei hun huam man kha’n ah; khawpi hun bulu in, khawpi hi chemjam ah hun do intin, siatna tuak kha’i tiu,” ti’n a gen a.

¹⁵ Lengpa milian leh lalte chun, lengpa kiang ah chun, “Lengpa, ka lalpau in hi ding la ti taphot hiziang ding ah a suakte hi a kisazosa ka hiu,” ti’n a dawnhu tau a.

¹⁶ Tichun, lengpa chu a pawtdok ah, a Inkuante lak ah a In enkol ding thâikem sawmkhat a nutsiate tilo sia chun a zuidok tau hi.

¹⁷ Lengpa a pawt daw phatin mipi zosia chunle a zui tau ah; chuleh, a In tawpna pen ah chun a kichawl malam tau.

¹⁸ A milian leh lalte zosia’n a hun makhel tau ah; ama vengtu Khereth mite, Peleth mite leh Git mi za guk Gath khua kipat hun zui zosia chunle a hun makhel tau hi.

¹⁹ Ziaphatchun, lengpa’n Git mi Ittai kiang in, “Bang ding ah nang inle ei zui gua la hem? Nang hi la In ua kipat jam mang, gam dang mi la hiziak in chia kit inla, lengpa kiang ah chun um den ziang ta’n.

²⁰ Nang hi ja’ni’ kha hung tung bep la hi’n, bang ding ah tu’ni hin a suk a to ah, ka chiatheina lam lam ah chia mai ding hi ei zui gua la hem? Chia kit mai inla, la suapite hile pui kit in; Lalpa‘n la chung ah ja’ngaina leh ginumna’n hun umpi zing ta hen,” ti’n a gen a.

²¹ Himaleh, Ittai chun, lengpa kiang in, “Lalpa hinna leh ka lalpa sâl in ka kitiam ahi, lengpa, ka lalpa chiana taphot ah chun thi’na ding hi’n hinna ding hilehle, la suak hin hun zui ding ka hi,” ti’n a dawnhu a.

²² David in Ittai kiang ah chun, “Chuti ahileh, chia inla, chia theng mai in,” a ti tai. Tichun, Git mi Ittai chu a chia ah, ama zuite leh a kiang ah naupangte zosia chu tawh a zui theng tau hi.

²³ Chutia, mite a chia zung zung phat ua chun mipite chu a kap jak ziang tau a. Lengpa chu Kidron guam a gâl kâi phatin, mipite chu gamthip lam zuan in a chia tau hi.

²⁴ Abiathar, Zadok leh Levite chunle, Pathian thuthung thingkuang chu a hun jawn ua. Khawpi sung ah kipat mipite zosia a pawt daw suak masangsiau chu, Pathian thuthung thingkuang chu a nga tau hi.

²⁵ Ziaphatchun, lengpa chun Zadok kiang in, “Pathian thuthung thingkuang kha khawpi sung lam in jawn lut kit tau in. Lalpa mit tung ka hi chun, ka mit ngei ah hin zia thuthung thingkuang chu a umna mun ngei ah hin mu kit dingin ei pui kit na’n a.

²⁶ Himaleh, ama’n, ‘Ka hun doisak ta puai,’ a ti leh vang, pha a ti gual gual in ka chung ah bawl mai hen, a khawk puai,” a tia.

²⁷ Lengpa chun thiampu Zadok kiang ah chun, “En tiam in, nang tawh, Abiathar tawh, la chate ni tawh, la chapa Ahimaz tawh Abiathar chapa Jonathan hi tawh khawpi lam in chia kit tau in.

²⁸ Ngai in, kei vang zia gamthip kaina luicha palmun ah hin, la thu ei hun vaithâk ngak in a la um den mai ing ka,” a tia.

²⁹ Tichun, Zadok tawh Abiathar chun Pathian thuthung thingkuang chu Jerusalem in a jawn lut kit tau a; chuleh, amau chule a um den tau hi.

³⁰ Himaleh, David chu Oliv tâng lamto ah chun kengtaw but lo leh puan kilukhu ah kap kawm kawm in a kal to ah; a kiang ah um zosia chunle puan kilukhu chiat ah kap kawm kawm in a zui tau hi.

³¹ Ahithophel in Absalom a kithuapi hi ti David a hil un. Zia phat ah chun, David in, “Aw Lalpa, Ahithophel thuhilna chu bangmalo suaksak in,” ti’n a gen tai.

David â Ding ah Hushai Gukpanna

³² David chu tângvûm ah Pathian a ho sek nau mun chu a tun phatin, Arkha mi Hushai chu a puanâk kêk net nut leh a lujang ah leibuan net nut in a hung a.

³³ David in a kiang in, “Nang in lei zui leh vang ka puakgik na bep hi ding la hi.

³⁴ Himaleh, khawpi lam ah chia kit inla, Absalom kiang in, ‘Aw lengpa, la suak in pang ing ka; tu’ma lam ah la pa suak ah ka la pan gual khan tu’hin le nangma suak ah pang ing ka,’ vati lechin, Ahithophel thuhilna zosia chu lei zaw piak hi mai ding a hi.

³⁵ Thiampu Zadok leh Abiathar tawh zia tak ah chun um khawm in la tiu in. Tichun, lengpa Inkuante ah kipat thu la het taphot chu, Zadok leh Abiathar thiampute kiang ah hilsawn sek in.

³⁶ A chateu pawsal pani, Zadok chapa Ahimaz leh Abiathar chapa Jonathan chule a kiang un a um ui; la thu het taphot chu ka kiang ah amau hung hilsak sek in,” ti’n a gen a.

³⁷ Tichun, Absalom in Jerusalem khawpi sung a hung lut tawh kituak in, David gualpa Hushai chule khawpi sung in a hung lut tai.