2 SAMUEL 12 - PATHIAN LEKHABU THIANGTHO (BSI)

Nathan in David a Kophilna (Sam 51na le sim in)

¹ Lalpa chun David kiang in Nathan a sawl ah. A hung tun phatin, a kiang ah chun, “Khawpi pakhat ah hin mi pani a um un, pakhat chu mi hausa ahi’n, pakhat zawk chu mi chaga ahi.

² Mi hausapa chun belam hon leh bawng hon tam tak a nei a;

³ himaleh, mi chagapa chun belamno anu pakhat a chawk ti bep lo chu bangma dang a nei puai. Zia gancha chu a enkol ah, ama tawh a chate lak in a khanglian ah, a an nei sun ah vâk in, a dawn dingle a pia’n, a pheichung in a lupsak in, ama â dingin chanu gual ah a nei ahi.

⁴ Zia lai chun, mi hausapa In ah chun malzin pakhat a hung ah; a zinpa me dingin a bawng hon lak leh belam hon lak ah kipat gan thapiak ding chu a sumsial ma ma in; ziaphatchun, mi chagapa belamno neisun chu a zinpa me dingin a tha piak tai,” ti’n a hung gen a.

⁵ Ziaphatchun, David chu a mi genpa chung ah chun a lungna ta ma mai a. Nathan kiang ah chun, “Lalpa hinna sâl in ka gen ahi, zia gual thil bawlpa chu a thi tâk ahi,

⁶ lainatna a nei lo ziak leh zia gual ah thil a bawl ziak ah chun, belamno chule a le’li’n a dit ding ahi,” a tia.

⁷ Nathan in David kiang ah chun, “Zia mipa chu nang la hi! Lalpa, Israelte Pathian in zia gual hin a gen hi: Israelte chung ah leng hiding in sathau ka hunnu’ in, Saul khut ah kipat inle ka hun hukdok in;

⁸ la pu In leh lou, ji leh cha ka hun pia hen; chuleh, Israel leh Judah Inkuante zosia le la kiang in ka hun pia ta’n. Zia chu tawm talua nalai a hilehle, hun piakbe ma ma nalai ding ka hi’ngal a.

⁹ Bang ziak ah, a mit mu ah thil phalo tak chu bawl ah, Lalpa thupiak chu musit mai la hi ta’m? Hit mi Uriah chu chemjam in la that ah, a ji chu la kichenpi ah, ama chu Ammonte chemjam in la that hi.

¹⁰ Ziaziakchun, tu’hin, keima lei musit ziak leh Hit mi Uriah ji la kichenpi ziak hin, la In sung ah chemjam in vaihawm zing ziang ta’n a.

¹¹ Lalpa‘n zia gual hin a gen hi: La Insung mite lak ah kipat in nangma subuaitu ding hun pawt dawsak ing ka tin; la mit mu ngei in la jite hun lâkpiak ing ka tin, la Invêngte kiang ah pia ding ka hi; chuleh, zia sunchang lai tak ah hinle la jite chu luppi ding a hiu.

¹² Nang in a gûk in la bawl ah, keima’n vang Israel mite zosia mu leh zia nisa nuai ah hin hun bawl ding ka hi, ti’n a gen hi,” a ti tai.

¹³ David in Nathan kiang ah chun, “Lalpa chung in ka la gilo ta a hi,” a tia. Nathan chun David kiang in, “Tu’hin la gitlona chu Lalpa‘n a lamang tai; thi lo ding la hi.

¹⁴ Himaleh, nasa tak ah Lalpa la musit ziak ah zia gual thil hi a la bawl kha la hiziak in, la cha chu vang thi ding ahi,” ti’n a gen tai.

¹⁵ Ziazaw chun, Nathan chu a In lam in a chia kit tai. Uriah ji tawh David cha nausen chu Lalpa‘n nasa tak in a hun natsak tai.

Bathsheba Cha Thi’na

¹⁶ Ziaziakchun, David in Lalpa kiang in nausen â dingin a dot piak ah; David in anngawl in a lût ah, jankhua’n tuanglai in a lum tai.

¹⁷ A Insung ah upate chu a kiang in a ding ua, lei tual ah kipat thodok dingin a thêm un; himaleh, a thodok nuam pua’n, a lak un an le a ne nuam diak puai.

¹⁸ A ni sagi tin ni chun nausen chu a thi ta’n. Chun, David suakte chun, “Nausen a dam lai ah bawn I thugen uh ngai lo ahi’n, nausen a thi tai ti thu bangti’n I hil ta diam uh? Ama leh ama kihi’na kha lo ding a hem?” ti a lau ziak un, ama chu a hil ngam ta puau hi.

¹⁹ Himaleh, David in a suakte kihogukna kipat chun, nausen chu a thi tai ti a het phat in, David in a suakte kiang ah chun, “Nausen chu a thi ahi tam?” ti’n a dong a. Amau inle, “A thi tai,” ti’n a dawnhu tau hi.

²⁰ Ziaphatchun, David chu tuanglai ah kipat in a thodok ah, a kisil ah, sathau a kinu’ ah, chuleh, a sil leh chênte chule a theng ah. Lalpa In ah a vachia ah, Pathian a vaho tai; chuleh, a dot dungzui in an a piau ah, ama’nle a ne ngal tai.

²¹ Ziaphatchun, a suakte’n a kiang in, “La thilbawl dan hi bangti a hem? Nausen dam sung ah khan ama â ding ah anngawl in la kap ah; nausen a thi phatin la thodok ah an la ne ziang ah,” a tiu a.

²² Ama chun, “Nausen kha a dam lai in anngawl ah pauchap him ka hi; Lalpa‘n ei hepi ah, nausen hi a hun damsak kit ziang thei khâk leh ka ti ahi.

²³ Himaleh, tu’hin vang a thi tâk ziakin, bang ding ah anngawl ding ka hem? Ama chu hinsak kit thei ding ka hia hem? Ama kiang ah keima chia ing ka tin, ama vang kei kiang lam ah hung kit talo ding ahi,” ti’n a dawnhu tai.

Solomon Pianna

²⁴ Ziaphatchun, David in a ji Bathsheba chu a thamuan ah, a kiang in a vachia ah, a luppi ta’n; tichun, chapa pakhat a hun nei un, a min in Solomon a sak tau hi.

²⁵ Lalpa‘n ama chu a hepi in; chuleh, jawlnei Nathan chu thugen ding in a sawl ah; ama chun Lalpa jal in a min dingin Jedidiah a sak tai.

David in Ammonte A Lâkna

²⁶ Zia hun ah chun Joab in Ammonte khawpi Rabbah a do ah, lengpa khawpi chu a zo tai.

²⁷ Joab in David kiang ah thangko a sawl ah, a kiang in, “Rabbah khua chu ka bulu ta’n; zia bep chule hilo in, a tuinâk khawpi chule ka la tai.

²⁸ Tu’hin, la sepai dang cheng kha ko khawm inla, khawpi la ding in hung kuan un; achutiloleh khawpi chu keima’n a la la’ng ka tin, keima lâksa ahi tin ka min sak mai ding ka hi,” ti’n a vagensak a.

²⁹ Tichun, David in a sepaite zosia a ko khawm ah, Rabbah khua la dingin a kuan tau ah, a do un, a la tau hi.

³⁰ Milkom luchang ah lallukhuk chu a lâkpiak ah; zia chu sana talent khat ah gik suang mantam ah kijem ahi; zia chu David in a kikhuk ta’n. Khawpi ah kipat gal lâk thil tam tak le a pawdok tau hi.

³¹ Khawpi sung ah mite chule a kipui ah, thing-âtna, hiamkhup leh heicha mang ding leh chektang siam dingin a gawi tau hi. Zia gual chun Ammonte khawpi zosia chu a bawl tai. Ziaphat ah chun, David tawh a sepai zosia chu Jerusalem lam in a chia kit tau hi.