2 SAMUEL 11 - PATHIAN LEKHABU THIANGTHO (BSI)

David in Bathsheba Tatsualpi

¹ Chun, chavâng hun a hung hita’n, lengte gâl bawl ah a kuan hun lai un, David in Joab leh a sepai hotute chu gâl bawl dingin a sawldok ah; Ammonte chu a vado un, Rabbah khua chu a la tau a. Himaleh, David chu Jerusalem ah a um den hi.

² Sunnung lam vaigei deu ah chun David chu a jalkhun ah kipat hung thodok in, leng In chung ah a vâk vêl vêl leh numei pakhat kisil lai a gâl mu ah; zia nu chu mi mêlpha tak ahi.

³ David in zia nu chu kua ahi em ti kan dingin mi a sawl a. Ziapa chun a kiang in, “Zia nu chu Eliam chanu, Hit mi Uriah ji Bathsheba a hi,” ti’n a hil a.

⁴ Tichun, David in ama chu vapui dingin mi a sawl ah, ama chu a hung phatin, a la luppi tai. (Zia nu chu a thasin buakna a la kisil thiang zo pan ahi’n.) Chuleh, a In lam in a chia kit tai.

⁵ Numei chun nau a vop ta’n; David kiang in, “Nau ka vop hi,” ti va hil dingin mi a sawl tai.

⁶ Ziaphatchun, David in Joab kiang in, “Hit mi Uriah kha hun sawl tiam in,” ti’n a vâithâk a. Joab in Uriah chu David kiang in a hun sawl tai.

⁷ Uriah a hung phatin, David in Joab leh a sepaite bang a ti nau em, chuleh, kidona chule bang gual in a um jelna em tite a dong vêl a.

⁸ Ziazaw chun, David in Uriah kiang in, “La In ah chia suk in la, la keng haw le vasil thiang ta’n,” ti’n a sawl ah. Lengpa In ah kipat Uriah a pawt daw phatin, lengpa’n kipakna thilpiak a thot zui ngâl hi.

⁹ Himaleh, Uriah chu a In lam ah chia lo in, lengpa kotbul ah a lengpa suakte lak ah chun a giak ta mai hi.

¹⁰ David kiang ah, “Uriah kha a In lam in a chia puai,” ti thu a hil phat un, David in Uriah kiang in, “Khual gamla tak ah kipat hung la hi’n. Bang ding ah la In lam ah chia nuam lo ziang la hi em?” ti’n a dong a.

¹¹ Uriah chun David kiang in, “Pathian thuthung thingkuang tawh Israelte leh Judah mite chu gâldo’na bûk in a giak un; chuleh, ka lalpa Joab leh ka lalpa suakte chule gamnuai in a giak un; keima ka In ah chia ah, ne leh dawn ah, ka ji kiang ah vagiak ziang thei ding ka hem? Nang leh la hinna sâl in ka kitiam ahi, zia gual ah chun um lo hial ing ka,” ti’n a dawnhu tai.

¹² Ziaphatchun, David in Uriah kiang in, “Tu’ni hi um nalai in la, jing leh hun sawl kit tading ka hi,” ti’n a gen a. Tichun, Uriah chu zia ni chun Jerusalem khua’n a châm tai. A jing ah chun,

¹³ David in a kiang ah an ne leh dawn dingin a chial ah, a dawn kham sak ah; nitâk phatin a lalpa suakte tawh giak khawm dingin a pawtdok ta’n; himaleh a In lam in vang a chia nuam puai.

David in Uriah That

¹⁴ Jingkal a hung hi’phatin David in Joab lekhathot ding a zik ah, Uriah khut in a thot ta’n.

¹⁵ Zia gual hin lekhathot chu a zik ah: “Uriah hi kidona mun huaisiatna pen ah gâlmatawng in pansak inla, a hun sukkhak ua a thi thei ngeina dingin kizuk dawsan un,” ti in.

¹⁶ Joab chun khawpi bulu ding ah a kisak phatin, gâlhat deute panna mun ding pen pen ah chun Uriah chu a pansak tai.

¹⁷ Khawpi sung ah sepaite chu Joab do ding ah a hung kuandaw phat un, David sepaite lak ah bang a hem zat chu a that tau ah. A lak ua Hit mi Uriah le a thi tai.

¹⁸ Ziaphatchun, Joab in kidona thil umdan haw chu David vahil ding in mi a sawl a;

¹⁹ thangkopa kiang ah chun zia gual hin a hil a: “Kidona chung chang thu la gen zaw phat leh,

²⁰ lengpa chun, ‘Bang ding ah khawpi do dingin zia gual ah chu nai ziang la hiu em? Kulbâng ah kipat hun kap thei ding a hiu ti helo la hiu em?

²¹ Jerubbaal chapa Abimelekh hun that kha kua a hem? Kulbâng chung lam ah kipat numei pakhat in sumhêk suang luchang a khiak khum ah, Thebez kha thi hilo a hem? Bang ding ah kulbâng chuti nai ziang la hiu em?’ a hun ti phat leh, ‘La suak Hit mi Uriah kha le a thi lak in a pang hi,’ ti’n dawnhu in,” ti’n a vaithâk tai.

²² Tichun, thangkopa chu a chia ah, Joab in a hil zosia chu David kiang in a vagen tai.

²³ Thangkopa chun David kiang in, “Gâlte chun ei hun zo tul tul un, gamtalai ah ei do dingin a hung pawtdok ua; himaleh, a kulpi bul tiang un ka del lut tau a.

²⁴ Ziaphatchun, thal kap mite chun kulpi ah kipat in la suakte ei hun kâp un; lengpa suakte lak ah khenkhat a thiu a; chuleh, la sepai Hit mi Uriah kha le a thi lak in a pang hi,” ti’n a gen tai.

²⁵ Thangkopa kiang ah chun David in, “Joab kiang ah zia gual hin la gen ding ahi,” ti’n a vaithâk ah: “Zia gual ah thil a tun ziak chun khawksa kin; chemjam in a chang leh mi khat that intin, a châng leh a dang khat that sek him in ah; khawpi chu bulu ding in hapan zaw diak unla, zo tau in,” ti’n a hil a. “Chuleh, ama chule tilkho in,” a ti tai.

²⁶ Uriah ji chun a pawsal a thi tai ti a het phat in a pawsal sûnna a bawl tai.

²⁷ A pawsal sûnna hun chu a bei phatin, David in a pui dingin mi a sawl ah, a In ah a vapui lûtsak ah, a kichenpi tai; tichun, cha pakhat a hing tai. Himaleh, David thilbawl dan chun Lalpa a lungdam ta puai.