2 SAMUEL 1 - PATHIAN LEKHABU THIANGTHO (BSI)

David in Saul Tawh Jonathan A Sûnna

¹ Saul thi’ nung ah David in Amalekte a vazaw nung in, David chu Ziklag ah ni ni a um a.

² A nithum ni’ chun, Saul leh a lawite giabuk ah kipat pawsal pakhat, puanâk tel neng nung leh a luchang ah buanthuak bek net nut in a hung a. David kiang a hung tun phatin leitual ah bokkhup in jâna a hun pia.

³ David in a kiang in, “Khoi lam ah kipat hung la hi em?” ti’n a dong a. Ama chun, “Israelte giabuk ah kipat hung suakcha ka hi,” ti’n a dawnhu a.

⁴ David in a kiang in, “Bang gual in thil a um jel em? ei hil tiam in,” a tia. Ama chun, “Sepaite chu kido’na mun ah kipat in a taijak un, a lak ua tam tak chu thâ leh mat in a um tau hi; chuleh, Saul leh a chapa Jonathan chule a thi tau hi,” ti’n a dawnhu a.

⁵ David in a kiang ah thu hun tut tangval kiang ah chun, “Saul tawh a chapa Jonathan a thiu hi ti chu la bang ti hetthei a hem?” ti’n a dong a.

⁶ Zia tangvalpa chun, “Gilboa tângvûm ah chun ka vavâk lut in; Saul chu a chemjam kisutthil sak in, sakol kângtalai leh a chung chuang mite chun a hun ûm un.

⁷ A hung kihei leh ei hun mu’n, ei ko ah, ke’nle, ‘Zia hin ka um hi, he pu,’ ti’n ka dawnhu a.

⁸ Ama’n ka kiang in, ‘Kua la hi em?’ ei ti’n. Keima’n, ‘Amalek mi ka hi,’ ti’n ka dawnhu a.

⁹ Ama’n ka kiang in, ‘Hung inla, ka kiang ah hung inla, ei that in; ka thisan a pawt tam ta law ta’n, ahi’n la, ka hinna hi a um liai liai nalai hi,’ ei ti’n.

¹⁰ A kiang in ka ding ah, a dam zo lo tho tho ding ahi ti ka hetchian ziakin ka thalup mai ahi. A lallukhuk khuk lai leh a khut ah a khutngawng bû lai ka hun la’, zia tak ah ka lalpa kiang ah hin ka hun paw tung hi,” ti’n a gen tai.

¹¹ Ziaphatchun, David in a puante a botthêk ah; a kiang ah um zosia chunle ama bawl gual in a puan uh a botthêk chiat tau a.

¹² Zia nitâk lam tiang ah chun anngawl in Saul leh a chapa Jonathan tawh Lalpa sepaite leh Israel Inkuan, chemjam ah thi zosia sûn in a kap tau a.

¹³ David in thu hung tut tangval kiang ah chun, “Khoilam ah hung kipan la hem?” ti’n a dong a. Ama chun, “Amalek mi la lak ua chêng chapa ka hi,” ti’n a dawnhu a.

¹⁴ David in a kiang ah chun, “Lalpa sathaunu’, chung ah khut thâk ding chu bangtidan ah tiza lo hial la hem?” ti’n a dong tai.

¹⁵ David in tangval pakhat a ko ah, “Hung inla, ziapa hi that in,” a tia. Tichun, ama chun a vaw pai ah, a thi tai.

¹⁶ David chun, “Nangma kam ngei ngei in, ‘Lalpa sathaunu’, chu ka that hi,’ la ti tâk ziakin la thisan maw la kipuak ding ahi,” a ti tai.

¹⁷ David in zia kâ La hi Saul tawh a chapa Jonathan sûnna’n a sa tai.

¹⁸ (Zia Thalpi La hi Judah mipite hilsawn dingin thu a pia ta’n; zia chu Jashar Lekhabu ah chun zik lut ahi tai.) Ama chun:

¹⁹ “Aw Israel, la lopina chu, la thoimualte ah chun thalup in a um tai! bangtidan ah mi hangsan chu pûk mai ahi tam!

²⁰ Gath khua chun gendok kiu inla, Ashkelon khawpi kotzingte chunle puangjak kiu in; achutiloleh, Philistin chanute chu, kipak talua khan tin uh, zektanlote chanute chu lim talua kha’n au.

²¹ Nanghaw Gilboa munsângte haw, la chung un daitui leh gua zu ki’hen la, ga tam tak le piang ta ki’hen. Zia tak ah chun mihat phaw chu sukbuak ahi’n, Saul phaw ngei sathau ah jutzol chu a um ta puai.

²² Thalup ah umte thisan leh, mihatte thau luang ah kipat in, Jonathan thalpi a lau pua’n; Saul chemjam le a thawn in, a hung kile’kit ngai puai.

²³ Saul leh Jonathan chu a ngai um un a doi um nau e! Hin inle, thi inle a kikhen puau hi; mupi sâng in a chan-gang zawu ah, sakeibakneite sâng in a hatzawu hi.

²⁴ Aw Israel chanute haw, Saul hung kâ khum un; ama’n nunnop bawl ni’n puan sandup in a hun thuam in, la kicheina ding un sana a hun pesek a.

²⁵ Bangtidan ah pawsal hat chu, kido’na mun ah thi ziang a tam! Jonathan chu la thoimualteu ah chun a thi tai.

²⁶ Ka suapi Jonathan, nang chung ah lungngai ka hi; kei â ding ah la ngainat um siat tawh! Lei hepina hi a mak talua’n, numeite hepina sâng in a thupi zawi.

²⁷ Mihat chu a pûk ta’n, kido’na matchâkte chu, bangmalo a suak mai ta ahi!” ti’n a sa tai.