2 PETER 3 - PATHIAN LEKHABU THIANGTHO (BSI)

Lalpa Hungkitna Ding Thutep Chu

¹ Doitakte haw, la kiang ua ka zik hi ka lekhathot niveina ahi tai; ziate chun nang uh a vêl ah hil in, la lungthim thiangtho uh chu ka choktho hi.

² Jawlnei thiangthote thugen lawk leh, la sawlchâkteu kam ah Lalpa leh Hukdampa thupiak chu la het zingna ding un.

³ Zia hi he masau in: Ninunung lam leh mi simmaw hâtte chu amau nopna dungzui in simmaw ah ho kawm in hung intiu in:

⁴ “A hungna ding thutiam chu khoi a hem? I pu leh pateu i-mut ni ah kipat khan, thil kisiamtîl ah a um ngai ngai in bangkim um zing hilo a hem?” ti’n au.

⁵ Zia hi a kihiatlosak un: Pathian thu’n nidang lai in vante a hung um ah, lei chu tui ah kipat in, tui ma ma chu mang ah siam a hi.

⁶ Zia lai ah khawvel chu tui in a chûm ah, a mangthai tai, ti hi.

⁷ Himaleh, zia thu ma ziak ah chun, tu’ ah vante leh leisiat um nalaite hi, mei ah hâl tum ding ah koi a hiu in, Pathian ngaisak lo mite chu vaihawm ni leh manthaina ni ah suksiat ding ah khêk in a um tadi ahi.

⁸ Ahi’n la, doitakte haw, zia thu hi hemil kiu in: Lalpa ngai in ni khat hi kum sang khat gual ahi’n, kum sang khat hile ni khat gual ahi, ti hi.

⁹ Mi khenkhat in chanchûm ah a ngai gual un, Lalpa chu a thutiam lam in a chanchûm puai; kuama manthai ding doilo in, mitin in lunghei leu ti a dawi ziakin la lam un a dawthei zaw ahi.

¹⁰ Himaleh, Lalpa ni chu gucha gual in hung in a; ziaphat chuleh, vante chu git ngai tak ah mangthai in, thilbulte le mei ah haltui hita’n a; lei leh a sung ah thil kibawlte zosia chu kâng tum ta’n a.

¹¹ Zia thilte zosia chu zia gual ah chun mangthai suak ding a hiu leh, umdan thiangtho leh Pathian ngaisakna lam ah bang gual mi la hiu em?

¹² Pathian ni hung tun ding chu kinêm tak ah ngâk zing in, ziate ziak ah chun vante chu kâng in mangthai intin, thilbulte le mei ah hâl tui hita’n a!

¹³ Himaleh, a thutiam gual in van thak leh lei thak, a sung ah dikna um chu I ngâk zing ui.

Tîlkhona Nunung leh Maljawlna

¹⁴ Ziaziakchun, doitakte haw, zia gual thilte chu la kinep ziak un, buak bek lo, gensiat bei leh thamuang tak ah a hun mutheina ding in taimat sua unla;

¹⁵ Lalpa dawtheina chu hukdamna’n guat un. I suapiu doitak Paul in le, pilna piak ahi dungzui in la kiang un a hun zik tai.

¹⁶ A lekhathot zosia’n zia thute hi a gen hi. Ziate ah chun thu het haksate a um ah, ziate chu mi mawl leh detlote’n, Pathian Lekhathu dang a heikawi gual un a heikawi ua, a kisuksiat khawlaw sek ui.

¹⁷ Doitakte haw, zia thute chu la het lawk ziak un; chingthei un; achutiloleh, migilote diklona ah pui mang ah um in, a det lai kha pûk kha’n lau.

¹⁸ I Lalpa leh Hukdampa Jesu Khrista hepina leh hetna ah chun khanglian zaw tau in. Tu’ leh kumtuang tiang in ama kiang in lopina um ta hen. Amen.