2 PETER 2 - PATHIAN LEKHABU THIANGTHO (BSI)

Jawlnei Lêmte Gawtna Chan Ding

¹ Himaleh, mite lak ah jawlnei lêmte a hung pawt gual un, la lak unle thu diklo hilte hung intin uh, amau chun amau chawpa a puu hial chule kiheisan in, mi susiathei gindan chuamte a gûk in hun paw lut intiu in, amau chung in thakhat in manthaina tung in a.

² Mi tam tak in a hûkna thilteu chu chîng intiu in, amau ziakin lam dik chu gensiat hi’n a.

³ Chuleh, sum etlâna ziakin zuau thu in hun subuai in au. Amau chu malai ah kipat a chung ua a thiamlo channau leh manthaina ding thu, a la um tasa chu kilîng diak lo in a um zing hi.

⁴ Vansawlchâkte’n thil ahi’khial lai un Pathian in a hawi pua’n, gawtmun in a pai a, vaihawm khum dingin thimna thûkpen in a khum tai.

⁵ Chuleh, ama ngaisaklote umna khawvel ah khan tui a lêtsak ah, malai khawvel chu a hawi pua’n; ahi’n la, dikna thugenpa Noah kha midang pasagi tawh a hukhing hi.

⁶ Sodom leh Gomorrah te chu ama ngaisak lo hung um kit dingte etsakna dingin thiamlo a chansak ah, vaivut suaksak in a hi’mangthai tai.

⁷ Chuleh, midik Lot, migilote umdan hûk ziak ah lungkhampa chu a hukhing a;

⁸ (zia midik chu a lak ua um in, dan lo gual ah a thil hi’teu chu mu leh het in a um ah; a ngaituana dik uh chu nisi’n in a hina ngal a.)

⁹ Lalpa‘n ama ngaisakte chu thepna kipat hukdaw dan leh, midiklote chu vaihawmna ni ding ah gawt zing kawm ah koihe dan a henai.

¹⁰ Taksa nopna buak zui leh vaihawmna simmawte chu koidan a he diak hi. Ngolhân leh chapo a hiu a, vansawlchâkte a gensiat unle a kithing puau hi.

¹¹ Vansawlchâk, hatna leh thilhitheina nei zaw te’n bawn, Lalpa ma’n ziate chu a gensia ngai puau hi.

¹² Himaleh, ziate hin thil a hetloteu chu a gensia sek ui. Amau chu ngaituana bei gancha, mat ah hi’bei kit ziang ding gual chu a hiu hi; ganchate gual in mangthai in au.

¹³ Thil hi’khial ziak ah thil phalo tuak in, a siatnau ah chun mangthai in au. Sûn ah kivakva’n a nopchên ua. La kiang un kivâkna ankuang a bawl un, amau kithepna ankuang ahiziak in a thanghuai in, a buak ui.

¹⁴ A mit uh ângkawmna dim, gitlona haisan theilote a hiu a; mi detlote a thêm pûk ua; ênna lungthim a puu ah; hânsia law chate a hiu hi.

¹⁵ Bosor chapa Balaam, diklo tak sum thangaipa lampi chu a haw tâk ziak un, lam dik pêtmangsan in a vâk mang tau hi.

¹⁶ Himaleh, ama chu a sukkhialna ziakin vau in a um a; sabiltung pautheilo chu mihing pau in a pau ah, jawlnei ngolna chu a khâm ta ahi.

¹⁷ Ziate chu tuikhuk tui umlo leh, sûm tui paw lo hui in a mut lumlet a hiu ah, amau â dingin thimna sâ pen chu khêk in a um tai.

¹⁸ Thu manlo chu uang tak in a gen un, a diklo ah umte lak ah kipat taidokte chu taksa nopna hûkna lam in a thêm pûk sek ui.

¹⁹ Amau chu siatna suak hi kawm in, mite chu suak ah kipat pawtna ding thu a tiampiak un; mite chu zaw ah a umnau ma suak in a um sek ui.

²⁰ Lalpa leh Hukdampa Jesu Khrista a het ziak ua khawvel buaknate a taisan nung un, zia ma chun a kihên awk kit ua, thatzaw ah um kit in, a umdan nunung uh chu a masa sâng in a sia zaw tai:

²¹ Dikna lampi a het nung un thupiak thiangtho a kiang ua vopsak ah um chu nungngatsan kit sâng in, dikna lampi chu helo hizaw maileu amau â dingin phazaw ding hive’n!

²² Zia thupil hi a chung un a dik ma ma hi: “Ui a luak lam in a chia kit hi,” ti leh, “Vokpi kisil thiangsa le buanthuak lak ah, kibual dingin a chia kit hi,” ti hi.