2 PETER 1 - PATHIAN LEKHABU THIANGTHO (BSI)

Chibai Bûkna

¹ Simon Peter, Jesu Khrista suak leh nungzui hin, Jesu Khrista I Pathian leh Hukdampa dikna ziak ah ginna man tam tak I chan gual changte kiang in:

² Pathian leh I Lalpau Jesu Khrista hetna ah chun, la chung un hepina leh chamna hi’pun in um ta hen.

Pathian Kona leh Têlna

³ Ama lopina leh phatna ah ei kopa, a chanchin het ziakin Pathian thilhitheina’n hinna leh Pathian ngaisakna lam thu ah thil zosia ei pia ta ahi.

⁴ Ziate ziak ah chun a thutiam lûl leh lopi takte chu ei pia’n; chutichun, nopna ziak ah khawvel ah siatna hung um hi taisan in, zia thutep lûl leh lopi takte ziak ah chun, Pathian nunchan kikoppi thei in lau.

⁵ Ahi, ziaziak tak ah chun taimat suau in; la ginnau ah chun phatna belap unla, la phatnau ah chun hetna pansak unla;

⁶ la hetnau ah chun kisûmna pansak unla, la kisûmnau ah chun thok-hatna pansak unla, la thok-hatnau ah chun Pathian ngaisakna pansak unla,

⁷ la Pathian ngaisaknau ah chun suapite ngainatna pansak unla; la suapite ngainatnau ah chun hepina pansak tau in.

⁸ Ziate chu nang uh â ahi ah, la lak ua a khan zing chun, I Lalpa Jesu Khrista hetna lam in phachuam lo leh ga bei in hun koi lo ding ahi.

⁹ Kuale zia thilte neilo chu mitthûm ahi’n, naicha bep mu thei, a nidang lai gitlonate silthianna chu a hemil ta ahi.

¹⁰ Ziaziakchun, suapite haw, a hun kona leh a têlna chu hi’det dingin taimat sua zaw diak tau in; zia chu la hiu chun bangmatik in kilîk pua’n lau.

¹¹ Tichun, Jesu Khrista I Lalpa leh Hukdampau kumtuang gam ah lûtna chu musak in au.

¹² Ziaziakchun, zia thilte chu hia’n, la kiang ua um thutak ah chu la detna ding un, zia thilte chu hetpi dingin ka kisa zo zing ahi.

¹³ Chuleh, taksa ah ka um sung ah hin nanghaw hun hetpi dingin ka kisazo zing hi.

¹⁴ I Lalpa Jesu Khrista ei hiatsak gual in, zia ka phokbawk hi chawn mang hun chu tung pai ta’n ah ti ka he ngal a.

¹⁵ Ahi, ka pawt nung ah zia thilte chu la het zing theina ding un theitawp in sêm ing ka.

Khrista Lopina Hiatpitute

¹⁶ I Lalpau Jesu Khrista thilhitheina leh a hungna thu ka hun hil lai un, tuanthu pil tak ah ngaitua dawte mai zui ka hi puau ah, a lopina mutute ka hi zawu hi.

¹⁷ Ama chu, Pa Pathian ah kipat in choihoina leh lopina nasa tak a mu lai in, zia gual aw hi a kiang in a hung tung a, “Zia hi ka Chapa doitak, ka kipakna pen chu ahi,” ti in.

¹⁸ Chun, tâng thiangtho ah a kiang ah ka um lai ua khan, zia aw chu van ah kipat in a hung gi’ ti ka hiau hi.

¹⁹ Tichun, genlawkna thu det zaw diak I nei ui, khua a hung vâk ah, jingsol aksi chu la lung sung ua a suak masia, zia chu thim lak ah thaumei vâk a ngaisak gual ua la ngaisak ua leh a hi’pha hi’n lau.

²⁰ Pathian Lekhathu ah genlawkna him him eima doidan ah hilchian ding ei puai, ti hephot hitiu.

²¹ Thu genlawk him him hi mihing thu pawt ahi ngai pua’n; mite’n Thagau Thiangtho sawl in, Pathian ah kipat a muu ah a gen uh ahi zaw sek hi.