2 LENGTE 5 - PATHIAN LEKHABU THIANGTHO (BSI)

Naaman Sukdamna

¹ Aram lengpa sepaite hotupa, Naaman chu mi lopi tak leh a pu’n a doisak ma ma mi ahi, a ziak chu ama ngawn ah Aram mite â dingin zaw’na Lalpa‘n a la pia ta ahi. Ama chu gâlhâng tak himaleh, phâk ahi.

² Tichun, Aram mite’n a pawl pawl ah mi a la bulu’nau mun khat ah chun, Israel ah kipat ngaklak khat sal in a la pui ua, amanu chun Naaman ji na a sep piak a.

³ Amanu chun a pi kiang in, “Ka Lalpa hi Samaria ah jawlnei kiang in vachia leh aw! Ama chun a phâkna hi a la sudam ding hiven,” a tia.

⁴ Tichun, Naaman chu a Lalpa kiang in a lut ah, Israel gam ah kipat numei naupang thugen cheng chu a vahil tai.

⁵ Aram lengpa chun, “Chia ta’n la leh, keima’n Israel lengpa lekhathot ding tawh hun sawl ding ka hi,” a tia. A chia ta’n, dangka talent sawm, sana shekel sang guk leh kivanna puan tuak sawm le a keng a.

⁶ Israelte lengpa kiang in lekhathot chu a peta’n, zia kizik chu, “Zia lekhathot hi la kiang a hung tun phat leh, ka suak Naaman chu la kiang ah a phâkna la sukdam piak dingah ka hun sawl ahi,” ti a la hi.

⁷ Israelte lengpa chun lekhathot chu a sim zaw phatin, a puante a botthêk ah, “Kei hi thi’na a hem hinna a hem pia ziang thei Pathian ka hia hem, zia mipa hin ka kiangah mi pakhat a phâkna ka sukdam piak ding ah a hun sawl ziang hi? En maleu chin, ei kinakpi gaw him him a hi hilam,” a tia.

⁸ Israel lengpa’n a puante a botthêk hi ti Elisha in a het phat in, lengpa kiang in thu a thot ah, “Bangziak ah, la puante botthêk la hem? Kei kiang ah hung sawl in, Israel ah jawlnei khat a um hi ti a hetna dingin,” a tia.

⁹ Tichun, Naaman chu a sakolte leh kângtalaite tawh a hungah, Elisha In lutna bul ah chun a hung kichawl tai.

¹⁰ Elisha in a kiang in mi khat a sawlah, “Chia in, Jordan ah sagivei vakisil in; chutileh, la taksa hung pha kit intin, thiang ta’n la,” a vati sak a.

¹¹ Himaleh, Naaman chu lungna tak ah chia mang gaw kawm in, “Ka kiang ah hung in hung ding in tin, Lalpa a Pathian min chu hung ko intin, a khut in ei jut piak intin, ka phâkna chu hun sudam in ah ka ti a hia!

¹² Abana, Pharphar leh Damaska luite kha Israel gam ah luite zosia sâng inle phazaw hilo a hem? Ziate ah chun vakisil in thiang thei lo ding ka hia a hem?” a tia. Lungna tak mai in a kihei ah a chia mang tai.

¹³ Himaleh, a suakpa chun a hun nai ah a kiang in, “He pu, jawlnei chun haksa tak ah bawl dingin thu hun peleh le bawl ziang ding hilo a hem? Bailam tak ah, ‘Vakisil inla, thiang ta’n’ a ti chu bawl ziang in,” a tia.

¹⁴ Tichun a chia ah, Pathian mi thugen dungzui ah chun Jordan ah chun sagivei a vakidia ah; a taksa chu pawsal naupang taksa gual a hung hi kit ah a hung thiang tai.

¹⁵ Ziaphatchun, Pathian mi kiang in ama leh a pawlte zosia chu a hung kile’kit ua; ama chu a ma-âng in a hung dingah, “Tu’hin, Israel ah tilo ngal lei chung zosia ah Pathian a um puai ti ka he tai; lungsiat tak in la suak ah kipat hin thilpiak pakhat ei pom piak in,” a tia.

¹⁶ Himaleh, ama chun, “A na ka sep piak, Lalpa hinna chu sâl in, bangmacha la lo ding ka hi!” a tia. La dingin a naw ah, himaleh ama chu a nuam puai.

¹⁷ Ziaphatchun, Naaman in, “Ahiloleh, la suak hi sakolneu pani puak khop lei tang ei puaksak in; la suak hin Lalpa tilo ngal pathian dang âng ah hâlmang thilpiak lân leh kithawi talo ding ka hi’ngal a.

¹⁸ Himaleh, Lalpa‘n la suak hi thil pakhat chung thu’n ei ngaithiam hen: Ka pu chu Rimmon In ah pathian ho ding ah a lut ah a khut a jak ah, Rimmon In ah ka kûn suk phat leh, Lalpa‘n la suak hi zia thil pakhat thu ah hin ei ngaithiam hen,” a tia.

¹⁹ Ama chunle a kiang in, “Thamuang tak in chia ta’n,” a tia.

Gehazi Du-âmna

²⁰ Himaleh, Naaman chu ama ah kipat gamla lo a chia zaw in, Pathian mi, Elisha suakpa Gehazi chun a lungthim in, “Ka pu’n zia Aram mi Naaman ah thilpiak haw chu la lo in bailam tak in a tha’suak ziang ta’n. Lalpa min sâl in, va nungdel ing ka tin, ama ah kipat bang hem khat bêk vala leng pha’n a,” a tia.

²¹ Tichun, Gehazi in Naaman a va nungdel tai. Naaman in a nung ah kua a hem hung tai chu a mu phât in, a la lamtua dingin a kângtalai ah kipat a hung kichawm tha’n, a kiang in, “Thil bangkim a pha nai maw?” a tia.

²² Ama chun, “Pha e! Himaleh, ka pu’n, ‘Ephraim tânggam ah kipat in jawlnei pawlte lak ah mi pani ka kiang ah a hung un; lungsiat tak in amau chu dangka talent khat tawh kivanna puan tuak ni hun pia leh,’ ti ding ah ei sawl ka hi,” ti’n a dawnhu a.

²³ Naaman in, “Lungsiat tak in talent ni hi kilâk in,” a tia. A naw tei tei ah; tichun, sakhau pani ah hin dangka talent ni a khit chak ah, kivanna puan tuak ni tawh, ziate chu a suakte lak ah pani kiang in a pia, amau chun Gehazi ma-âng in a puak piak tau a.

²⁴ Gâlvênna mun a hung tun phat un, sakhau chu a la, a sung in a siam lut ah; amau chu a chiasak ta’n, a nusia tau hi.

²⁵ A chia ah, a pu âng in a vading kit a; Elisha chun a kiang in, “Gehazi, khoilam ah vachia la hem?” a tia. Ama chun, “La suak hi khoima’n ka chia puai,” ti’n a dawnhu a.

²⁶ Himaleh, ama chun a kiang in, “Mi pakhat in nang lamtua dingah a kângtalai ah a hung kum thâk lai tak khan, thagau ah la kiang in ka um pua a hem? Tu’hun hi sum lâk hun, nîk leh puan, Oliv huante leh grep huante, belamte leh bawngchalte leh, suaknu leh suakpate lâk hun a hia hem?

²⁷ Ziaziakchun, Naaman phâkna chu nang tawh la suante chung ah kumkhua’n um den ta hen,” a tia. Tichun, vûk gual ah vam hial in a phâk tai.