2 LENGTE 4 - PATHIAN LEKHABU THIANGTHO (BSI)

Elisha leh Meithâinu Sathau chu

¹ Tu’hin, jawlnei pawlkhat lak ah mi pakhat ji chu Elisha kiang in a hung kap ta’n, “La suak, ka pawsal a thi ta’n; la suak chu Lalpa a la kicha mi ahi ti la hia’i, himaleh, a leibatna pa a hung ah, ka chate pani chu suak dingin a hung kipui mang tai,” a tia.

² Elisha chun amanu kiang in, “Bang hun bawl piak leng la nuam em? Ei hil in, In sung ah bang la nei em?” a tia. Amanu chun, “La suak hin In sung ah sathau buk khat tilo ngal bangmacha a nei puai,” a tia.

³ Ama chun, “Pawlam ah chia inla, la Invêngte zosia kiang in ûm leh bêl awng vakhêl khawm in.

⁴ Ziazaw chuleh, lut inla, la chate tawh kot kikam khum unla, zia ûm leh bêl awng zosia’n sathau chu sung lut unla, a dim taphot chu koidok zel in,” a tia.

⁵ Tichun amanu chun a nusia ah, ama tawh a chate chu kot a kikam khum tau ah; amau chun ûm leh bêlte a hun chawi zel ua, amanu chun a sung lut jel ta’n.

⁶ Ûm leh bêl zosiate a dim phatin, a chapa kiang in, “bêl dang ei hun pia’n,” a tia. Himaleh, ama chun, “A um ta puai,” a tia. Ziaphatchun, sathau chu a kang tai.

⁷ Amanu chu Pathian mi kiang ah chun a hung ah, ama chun, “Chia’n la, la sathau chu vazuak inla, leibatte zosia chu dit in; chuleh, a vâl cheng chun nang leh la chate a la kivâk tau in,” a tia.

Elisha in Shunam Numei Chapa Kaitho kit

⁸ Ni khat chu Elisha in Shunem a hawtheng ah, zia khua chun numei hausa tak khat a chêng in, amanu chun In ah an ne dingin a chial a. Tichun, zia lam chu a haw phot leh zia In ah chun an ne dingin a chawl malam sek hi.

⁹ Amanu chun a pawsal kiang in, “En tiam in, zia lampi hun haw zing sek pa hi Pathian mi ahi ti ka hechian hi.

¹⁰ Pindan khat a chung leh a bângnei in bawl hi tin, zia chun a zalkhun ding pakhat koi hi tin, dawkan khat, chutna khat leh, thaumei pakhat tawh, tichun I kiang ah a hung si’n leh a um sekna dingin,” a tia.

¹¹ Nikhat chu a hung kit phatin, zia pindan ah chun a lut ah, a kizam tai.

¹² A suakpa Gehazi kiang in, “Shunam mi numei chu vako in,” a tia. A vako phatin, amanu chu a ma-âng in a hung ding ta’n.

¹³ A kiang in, “Amanu kiangah chun hitin gen in, kei uh lei buaipi ma ma sek in, nang â dingin bang bawl piak leng la nuam em? Lengpa kiang ahiloleh sepai hotupa kiang a hem ah thumal khatto gen piak la nuam em?” a tia. Amanu chun, “Ka mite lak ah chêng ka hi,” ti’n a dawnhu a.

¹⁴ Ama chun, “Aleh amanu â dingin bang I bawl piak thei diam?” a tia. Gehazi chun a dawnhu a, “A phai, amanu hi chapa bei ahi’n, a pawsal la a têk ta’n,” ti in.

¹⁵ Ama chun, “Amanu chu ko in,” a tia. A vako zaw phatin, amanu chu kotbul in a hung ding a.

¹⁶ Ama chun, “Tu’hun gual hi a hung tun kit phat leh, chapa khat vop ding la hi,” a tia. Amanu chun a dawnhu a, “Ahipuai, ka lalpa, Aw, nang Pathian mi; la suak hi ei thêm kin,” a tia.

¹⁷ A hun a hung tun phatin, Elishan a gen gual ngei in, chapa a hun hing tai.

¹⁸ Naupang chu a hung let deu phatin, bu-âtte lak ah a pa kiang in ama le a vachia a.

¹⁹ A pa kiang in, “Aw, ka luchang, ka luchang!” tia. A pa’n a suakpa kiang in, “A nu kiang ah pui in,” a tia.

²⁰ Ama chun a pâi ah, a nu kiang in a hun pui ta’n; naupang chu a nu pheichung in sûn chan a kichu’n, a thi tai.

²¹ Amanu chu a chia to ah, Pathian mi jalkhun chung ah chun a vasial ah, kot khak khum in, a nusia tai.

²² A pawsal a vakosak ah, a kiang in, “Suakte pakhat in sabiltung hun pui hen la, ka kiang ah hung dingin, ei hun sawl piak in, Pathian mi kiang ah kin tak in vachia ing ka tin, hung kit ding ka hi,” a tia.

²³ Ama chun, “Bangziak ah, tu’ni chia gua la hem? Tha thak ni a hem, sabbath a hem le ahi diak pua’n,” a tia. Amanu chun, “A khawk puai,” a tia.

²⁴ Amanu chun, sabiltung chu a thuam ah, a chung in a chuang ah, a suakpa kiang in, “Gancha chu hawl kin-gang inla; ka hung hil lo ngal leh ei dinsak kin,” a tia.

²⁵ Tichun a kipan ah, Karmel tâng ah Pathian mi kiang a hung tung tai. Pathian mi chun amanu hung lai chu a la mu phât in, a suakpa Gehazi kiang in, “En tiam in, Shunam numei kha zia khun a hung hi;

²⁶ amanu lamtua dingin tai ngal inla, a kiang in, La pha na em? La pawsal a pha na em? Naupang kha a pha na em? vati’n,” a tia. Amanu chun a dawnhu a, “A pha nai,” a tia.

²⁷ Tâng chung ah Pathian mi kiang a hung tun phatin, a keng a hung tu ta’n. Gehazi chun sawt mang gua’n a hun nai a. Himaleh, Pathian mi chun, “Limsak kin, lunggimna lian tak nei ahi; Lalpa‘n zia chu kei ah kipat a selgu’n, ei hil nai lo ahi,” a tia.

²⁸ Ziaphatchun, amanu chun, “Ka lalpa kiang in chapa ka la don ah a hem? Ei thêm kin, ka hun ti him hilo a hem?” a tia.

²⁹ Gehazi kiang ah chun, “La kawng gâk det in, ka tiangkhut kha chawi in la, chia in. Mi la kituakpi leh le chibai bawl malam kin, mi khatto in chibai a hun bûk guat leh le limsak kin; chuleh ka tiangkhut hi naupang mai chung ah vazam in,” a tia.

³⁰ Ziaphatchun, naupang nu chun, “Lalpa a hin ziakin leh, nangma ngei la hin zing ziakin; nang in lei zui lo leh chia lo hial ding ka hi,” a tia. Tichun a kipan ah, amanu chu a zui tai.

³¹ Gehazi chu a ma-âng un a la chia pek ah, naupang mai chung in a tiangkhut chu a zam ta’n; himaleh, husa leh a hin hiattheina bangma a um puai. Ama lamtua dingin a hung nungkit ah, a kiang in, “Naupang chun khua a henai diak puai,” a tia.

³² Elisha chu In sung ah a hung lut phatin, jalkhun ah naupang thisa kizam chu a mu ta’n.

³³ Tichun a lut ah, a paniu ah chun kot a kikhak khum ua, Lalpa kiang in a pauchap tai.

³⁴ Jalkhun ah chun a kaldok ah, naupang chu a kam leh ama kam, a mit leh ama mit, a khutte leh ama khutte a situa ah; tichun, naupang ti’ chu a hung lumdok tai.

³⁵ Tichun, a hung kum kit ah, pindan sung ah chun khatvei a chia kual ah, lupna chun kaldok kit in a chung ah a vakhûn ah; naupang chu sagivei a hung kichiphit ah a mit a hun hak tai.

³⁶ Elisha in Gehazi a ko ah, a kiang in, “Shunam mi numei chu hun ko in,” a tia. Tichun a vako ah. Amanu chu a kiang ah a hung phatin, “La chapa chu kipui in,” a tia.

³⁷ Amanu chu a hung in a kengbul in a hung bokkhup ah, lei tual ah chun a a mai ah leisi’n chibai a bûk ah; chun, a chapa chu kipai kawm in a chia tai.

Elisha in An A Sukthianna

³⁸ Elisha chu Gilgal ah a vaikit phatin, gam ah chun kial a tung ta’n. Jawlneite pawl khat chu a ma-âng ah a kichut zing lai un, a suakpa kiang in, “Leibêl lian kha suang inla, jawlneite pawlkhat â ding hi an huan in,” a tia.

³⁹ A lak ua mi pakhat chu loulai ah anche sik dingin a vachia leh; gam baha gui a vamu ta’n, zia ah kipat chun gam baha a âng dim set in a hun pâi a, bang ahi he lo in bubêl ah chun a huan tai.

⁴⁰ An chu nêk dingin a hun thûk tau a. Himaleh, a nêk lai tak un, a kikodok tau a, “Aw Pathian mi, bubêl sung ah hin thitheina a um hi!” a tiu a. A nethei ta puau hi.

⁴¹ Ama chun, “Ahileh, changbuang hun lau in,” a tia. Zia chu bubêl sung ah chun a sep lut a, “Mipi chu thuk piak unla, nêksak tau in,” a tia. Tichun, bubêl ah chun bangma thitheina a um ta puai.

Elisha in Mi Za khat A Vâkna

⁴² Baal-shalishah ah kipat mi pakhat a hung in, thâiga masate ah kipat Pathian mi an ding a hun chawi piak a: Barli bu ah kisiam vaithum tang sawmni tawh a dip sung ah buhum kila thak haw ahi’n. Elisha chun, “Zia chu mipite kiang ah pia’n la, nêksak in,” a tia.

⁴³ Himaleh, a suakpa chun, “Zia hi mipi za khat âng ah ka bangti lui ding a hem?” a tia. A vêl in a gen kit ah, “Mipite kiangah pia’n la, nêksak in, Lalpa‘n zia gual hin a gen hi, Amau chun ne’n tin uh, a vâl le umsak ding a hiu,” ti’n, a tia.

⁴⁴ Mipite âng ah chun a lui ta’n, a ne tau ah; tichun, Lalpa thu dungzui in, a vâl le a umsak tau hi.